కర్ణుడిగా రాఘవ లారెన్స్.. భారీ బడ్జెట్‌ పాన్ ఇండియా చిత్రం!

కొరియోగ్రాఫర్, దర్శకుడు, నటుడు రాఘవ లారెన్స్ (Raghava lawrence) తొలిసారిగా పౌరాణిక పాత్రలో అలరించేందుకు సిద్ధమయ్యారు. మహాభారతంలోని కర్ణుడి (karna) జీవిత కథ ఆధారంగా తెరకెక్కుతున్న ‘మహావీర్ కర్ణ’ (Mahaveer Karna) చిత్రంలో ఆయన ప్రధాన పాత్ర పోషిస్తున్నారు.

బెల్లంకొండ శ్రీనివాస్ న‌టించిన ‘రాక్షసుడు’ ఫేమ్ రమేష్ వర్మ (Ramesh Varma) దర్శకత్వంలో రూపొందుతున్న ఈ మైథలాజికల్ యాక్షన్ డ్రామా చిత్రం ఫస్ట్ లుక్ పోస్టర్‌ను లారెన్స్ పుట్టినరోజు సందర్భంగా విడుదల చేశారు. యుద్ధ వీరుడి గెటప్‌లో లారెన్స్ లుక్ ఆకట్టుకుంటోంది.

ప్రముఖ బాలీవుడ్ నిర్మాణ సంస్థ పెన్ స్టూడియోస్ సుమారు ₹150 కోట్ల భారీ బడ్జెట్‌తో నిర్మిస్తున్న ఈ సినిమా తెలుగు, తమిళం, హిందీతో పాటు ప్రధాన భారతీయ భాషల్లో పాన్ ఇండియా స్థాయిలో 2027లో ప్రేక్షకుల ముందుకు రానుంది.

లారెన్స్ కెరీర్‌లోనే ఇది మొదటి మైథలాజికల్ ప్రాజెక్ట్ కావడంతో సినీ వర్గాల్లో భారీ ఆసక్తి నెలకొంది. ఇదిలాఉంటే.. లారెన్స్ స్వీయ ద‌ర్శ‌క‌త్వంలో తెర‌కెక్కిస్తున్న కాంచ‌న 4 చిత్రం ప్ర‌స్తుతం షూటింగ్ ద‌శ‌లో ఉండ‌గా 2027 వేస‌వికి థియేట‌ర్ల‌కు రానుంది.