శివాజీ గణేశన్.. కుమార్తె క‌న్నుమూత‌

ABN , Publish Date - Sep 21 , 2026 | 08:10 AM

త‌మిళ‌నాడు లెజండ‌రీ న‌టుడు శివాజీ గణేశణ్ కుటుంబంలో విషాదం నెలకొంది.

Sivaji Ganesan

త‌మిళ‌నాడు దివంగత నటుడు, నడిగర్ తిలకం శివాజీ గణేశన్ కుటుంబంలో విషాదం నెలకొంది. దివంగత తమిళ సినీ దిగ్గజం శివాజీ గణేశణ్ (Sivaji Ganesan) , కమలా గణేశన్ (Kamala) దంపతుల పెద్ద కుమార్తె, నటుడు ప్రభు సోదరి శాంతి నారాయణస్వామి (71) (Shanthi Narayanaswamy) ఆదివారం అనారోగ్యంతో కన్నుమూశారు. గత కొన్ని రోజులుగా అనారోగ్యంతో బాధపడుతూ ఆదివారం ఆస్పత్రిలో తుది శ్వాస విడిచారు. ఆమె మృతిపై తమిళ సినీ వర్గాలు, అభిమానులు తీవ్ర దిగ్భ్రాంతి వ్యక్తం చేస్తున్నారు.

శాంతి నారాయణస్వామి సినీ రంగంలో ప్రత్యక్షంగా ఎక్కువ కాలం కొనసాగకపోయినా, కుటుంబ వారసత్వాన్ని కొనసాగిస్తూ కొన్ని చిత్ర నిర్మాణ కార్యక్రమాల్లో భాగస్వామ్యమయ్యారు. ముఖ్యంగా తన తండ్రి శివాజీ గణేశణ్ నటించిన క్లాసిక్ చిత్రం ‘తంగపతకం’ చిత్రాన్ని నిర్మించడం విశేషం. సినీ కుటుంబానికి చెందిన వ్యక్తిగా ఆమెకు తమిళ చిత్ర పరిశ్రమలో ప్రత్యేక గుర్తింపు ఉంది. శాంతికి భర్త నారాయణ స్వామి, కుమార్తెలు విజయలక్ష్మి, సత్యవతి ఉన్నారు.

శాంతి నారాయణస్వామికి సోదరిగా తన్మోళి ఉండగా, సోదరులు రామ్‌కుమార్ (Ramkumar), ప్రభు (Prabhu) తమిళ సినీ పరిశ్రమలో తమకంటూ ప్రత్యేక స్థానం సంపాదించుకున్నారు. రామ్‌కుమార్‌ నిర్మాతగా పలు చిత్రాలను నిర్మించగా, ప్రభు స్టార్ నటుడిగా దశాబ్దాలుగా ప్రేక్షకులను అలరిస్తున్నారు.శివాజీ గణేశణ్ తన పెద్ద కుమార్తెపై ఉన్న ప్రేమకు గుర్తుగా చెన్నై అన్నా నగర్‌లోని ఓ ప్రముఖ థియేటర్‌కు ‘శాంతి థియేటర్’ అనే పేరు పెట్టారు. ఈ థియేటర్ తమిళనాడులో అత్యంత గుర్తింపు పొందిన సినిమా హాళ్లలో ఒకటిగా నిలిచింది.

కాగా.. శాంతి భౌతికకాయాన్ని ఆస్పత్రి నుంచి వల సరవాక్కం, వెస్ట్ కామకోఠి నగర్, అరుణగిరి వీధిలో కొద్దిసేపు వుంచి ఆ తర్వాత వలసర వాక్కంలోని శ్మశానవాటికలో అంత్యక్రి యలు పూర్తి చేశారు. శాంతి నారాయణస్వామి మరణంతో సినీ ప్రముఖులు, అభిమానులు ఆమె మృతికి సంతాపం తెలియజేస్తూ కుటుంబ సభ్యులకు ప్రగాఢ సానుభూతి వ్యక్తం చేస్తున్నారు.

ప్ర‌ముఖుల నివాళులు

శాంతి మరణవార్త తెలియగానే డీఎంకే అధ్యక్షుడు, మాజీ ముఖ్య మంత్రి స్టాలిన్ దంపతులు ఆస్పత్రికి వెళ్ళి శాంతి భౌతికకాయానికి పూలమాల వేసి నివాళులర్పించారు. సీఎం వెంట డీఎంకే నేతలు పూచ్చి మురుగన్, అన్బిల్ మహేశ్, మాజీ ఎమ్మెల్యేల వీజీ రాజేంద్రన్ తదితరులున్నారు. శాంతి భౌతికకాయం చూడాగానే సీనియర్ నటుడు శివకుమార్ బోరున విలపించారు. వీరితో పాటు పి.వాసు, విజయకు మార్, విక్రమ్ ప్రభు, దుష్యంత్ తదితర ప్రముఖులు శాంతికి నివాళులర్పించారు. కాగా, శివాజీ గణేశన్ తన కుమార్తె శాంతి పేరుతో నగరం నడిబొడ్చున శాంతి థియేటర్ నిర్మించారు.

మరోవైపు శాంతి మృతిపై స్టాలిన్ తన ప్రగాఢ సంతాపం, సానుభూతిని తెలుపుతూ, మా కుటుంబ సభ్యురాలిగా ప్రేమ, గౌరవానికి నోచుకున్న సోదరి శాంతి మరణం తీవ్ర మనోవేదన కలిగిస్తోంది. ఆమె మృతి పట్ల నా ప్రగాఢ సానుభూతి తెలుపుతున్నాను' అంటూ తన సంతాప సందేశంలో పేర్కొన్నారు.