‘డ్యూన్ 3’ దెబ్బకు ‘ద ఒడిస్సీ’ రికార్డ్ బద్దలైంది
ABN, Publish Date - Oct 22 , 2026 | 01:02 PM
హాలీవుడ్ ప్రముఖ దర్శకుడు డెనిస్ విల్లెనెవ్ దర్శకత్వంలో రూపొందుతున్న భారీ సైన్స్ ఫిక్షన్ విజువల్ వండర్ ‘డ్యూన్: పార్ట్ త్రీ’. ఈ సినిమా ‘ద ఒడిస్సీ’ రికార్డును అధిగమించి.. సరికొత్త రికార్డును క్రియేట్ చేసింది.
హాలీవుడ్ ప్రముఖ దర్శకుడు డెనిస్ విల్లెనెవ్ దర్శకత్వంలో రూపొందుతున్న భారీ సైన్స్ ఫిక్షన్ విజువల్ వండర్ ‘డ్యూన్: పార్ట్ త్రీ’ (Dune: Part Three) అడ్వాన్స్ బుకింగ్స్‌లో సరికొత్త చరిత్ర సృష్టించింది. యూకేలోనే అత్యంత ప్రతిష్టాత్మకమైన, అతిపెద్ద స్క్రీన్ కలిగిన BFI IMAXలో ఈ చిత్రం బాక్సాఫీస్ వద్ద రికార్డుల సునామీని సృష్టించింది. టికెట్ బుకింగ్స్ ప్రారంభమైన మొదటి 24 గంటల్లోనే రికార్డు స్థాయిలో కలెక్షన్లు రాబట్టి, గతంలో ఉన్న ఆల్-టైమ్ రికార్డులను తిరగరాసింది.
అడ్వాన్స్ బుకింగ్స్ మొదలైన తొలి రోజునే BFI ఐమాక్స్‌లో ఏకంగా 33,000 టికెట్లు అమ్ముడయ్యాయి. దీంతో మొదటి 24 గంటల్లోనే దాదాపు £880,000 (సుమారు 8.8 లక్షల పౌండ్లు) గ్రాస్ వసూళ్లను సాధించి సరికొత్త రికార్డు నెలకొల్పింది. గతంలో దిగ్గజ దర్శకుడు క్రిస్టోఫర్ నోలన్ తెరకెక్కించిన బ్లాక్‌బస్టర్ చిత్రం ‘ద ఒడిస్సీ’ (The Odyssey) మొదటి 24 గంటల్లో £750,000 వసూలు చేసి ఈ వేదిక వద్ద ఆల్-టైమ్ రికార్డును సొంతం చేసుకుంది. ఇప్పుడు ఆ రికార్డును ‘డ్యూన్ 3’ సునాయాసంగా తుడిచిపెట్టేసి అగ్రస్థానానికి చేరింది.
డ్యూన్ ఫ్రాంచైజీకి ముగింపుగా వస్తున్న ఈ ఆఖరి భాగంలో పాల్ అట్రీడెస్ (తిమోతీ చాలమెట్) తన పాలన తాలూకు పరిణామాలను ఎదుర్కొనే ఉత్కంఠభరిత కథాంశంతో దర్శకుడు డెనిస్ విల్లెనెవ్ ఈ చిత్రాన్ని తెరకెక్కించారు. పాత మిత్రుల పునరాగమనం, భయానక ఆటంకాలు, ఊహించని నమ్మకద్రోహాల నడుమ కథనం ఆద్యంతం ఉత్కంఠభరితంగా సాగనుంది. ఈ ప్రతిష్టాత్మక చిత్రంలో తిమోతీ చాలమెట్‌తో పాటు జెండయా, జాసన్ మోమోవా, రాబర్ట్ ప్యాటిన్సన్, ఫ్లోరెన్స్ ప్యూ కీలక పాత్రల్లో నటిస్తున్నారు. అడ్వాన్స్ బుకింగ్స్ జోరు చూస్తుంటే వరల్డ్‌వైడ్‌గా ‘డ్యూన్ 3’ బాక్సాఫీస్ వద్ద సరికొత్త బెంచ్‌మార్క్ సెట్ చేయడం ఖాయంగా కనిపిస్తోంది.
ఇవి కూడా చదవండి:
అల్లు అర్జున్‌కి అర్ధరాత్రి విజయ్ దేవరకొండ ఫోన్.. అసలేం జరిగిందంటే
‘కిల్లర్’ సెకండాఫ్ ట్విస్ట్ చెప్పండి.. రూ. కోటి గెలుచుకోండి: దర్శకుడు పూర్వాజ్
RC17కు ‘దేవి శ్రీ ప్రసాద్’ ఉంటారా? క్లారిటీ ఇచ్చిన మైత్రీ రవిశంకర్