Gaurav Bora: 'మిరాయ్'లో శ్రీరాముడితనే...

తేజ సజ్జా 'మిరాయ్' సినిమాలో శ్రీరాముడి పాత్రను పోషించింది గౌరవ్ బోరా. ఉత్తరాఖండ్ కు చెందిన గౌరవ్ కొన్ని సీరియల్స్, యాడ్ ఫిలిమ్స్ తో పాటు హిందీ సీరియల్స్ లో నటించాడు. ఐదేళ్ళ పాటు రంగస్థలంలో నటించిన అనుభవం ఉన్న గౌరవ్ కు 'మిరాయ్'లో రాముడి పాత్ర లభించడం విశేషం.

గత యేడాది సంక్రాంతికి వచ్చిన 'హను-మాన్' (Hanu-man) సినిమాతో తేజ సజ్జా పాన్ ఇండియా స్టార్ గా జాతీయ స్థాయిలో గుర్తింపు పొందాడు. ఇప్పుడు వచ్చిన 'మిరాయ్' (Mirai) సినిమాతో మరోసారి ఘన విజయాన్ని సొంతం చేసుకుని... నేషనల్ వైడ్ తన సత్తాను చాటుకున్నాడు. 'హను-మాన్'లో హనుమంతుడు హీరోకి బాసటగా నిలిచినట్టే... 'మిరాయ్'లోనూ శ్రీరామచంద్ర ప్రభువు కథానాయకుడికి సాయం చేస్తాడు. అయితే అక్కడా ఇక్కడా చిన్న తేడా ఉంది. 'హను-మాన్'లో హనుమంతుడి పాత్రను దర్శకుడు ప్రశాంత్ వర్మ (Prasanth Varma) పూర్తి స్థాయిలో వి.ఎఫ్.ఎక్స్. లో క్రియేట్ చేస్తే... 'మిరాయ్'లో మాత్రం శ్రీరాముడిగా ఓ వ్యక్తి తెరపైన తళుక్కున మెరిశారు. అతను ఎవరు? భగవాన్ శ్రీరామ పాత్రను చేసే అవకాశం, అదృష్టం ఎవరికి లభించింది? అనే పలు ప్రశ్నలు ఎంతో మంది మదిలో మెదిలాయి.

రాముడి పాత్ర అంటే... మాటలు కాదు... తెలుగు సినిమా రంగంలో ఉద్దండులైన మహానటుడు పోషించిన పాత్ర ఇది. ఇక నందమూరి తారక రామారావు (NT Ramarao) అంటే తెలుగువారికి వెండితెర వేలుపు... స్వయంగా శ్రీరాముడే అని భావించే పరిస్థితి. అలాంటి గొప్ప పాత్రను పోషించే అరుదైన అవకాశం ఉత్తరాఖండ్ కు చెందిన గౌరవ్ బోరా (Gaurav Bora) కు దక్కింది. ఖతీమా కు చెందిన గౌరవ్ బోరా డెహ్రాడూన్ లో మాస్ కమ్యూనికేషన్ చేశారు. ఆ తర్వాత నటన మీద మక్కువతో న్యూ ఢిల్లీ చేరి, అక్కడ ఐదేళ్ళ పాటు 'కింగ్ డమ్ ఆఫ్ డ్రీమ్స్, రాస్ థియేటర్ గ్రూప్'లో నటించారు. పలు షార్ట్ ఫిలిమ్స్ లోనూ, హిందీ సీరియల్స్ లోనూ నటించిన అనుభవం గౌరవ్ బోరాకు ఉంది. అలానే ఓ వెబ్ సీరిస్ లోనూ గౌరవ్ నటించాడు. టీవీయస్ ఐ క్యూబ్, బజాజ్ ఫ్రీడమ్, సపోలా ఆయిల్, ఆక్వా గార్డ్, టాటా క్యాపిటల్ కు సంబంధించిన యాడ్ ఫిలిమ్స్ లో గౌరవ్ నటించాడు. ఢిల్లీలో ఉంటున్న గౌరవ్ బోరాకు నటన కాకుండా వంట చేయడం, ఈత కొట్టడం, ట్రెక్కింగ్ కు వెళ్ళడమంటే ఇష్టం!

'మిరాయ్'లో శ్రీరాముడి పాత్ర కోసం అతనిపై రెండు రోజుల పాటు షూటింగ్ చేశారు. ఆ తర్వాత ఆ పాత్రను మరింత గొప్పగా ఎలివేట్ చేయటం కోసం దానికి వి.ఎఫ్.ఎక్స్. జోడించి అద్భుతంగా ఆవిష్కరించాడు దర్శకుడు కార్తీక్ ఘట్టమనేని (Karthik Gattamaneni). 'మిరాయ్' సినిమా క్లయిమాక్స్ లో శ్రీరాముడి పాత్ర తెర మీద కనిపించగానే థియేటర్లోని ప్రేక్షకులందరికీ ఒక్కసారిగా గూస్ బంప్స్ వచ్చాయి. జై శ్రీరామ్ అనే నినాదాలు మిన్నుముట్టాయి. అక్కడ నుండి సినిమాను శ్రీరాముడే ముందుకు తీసుకెళ్ళిపోయినట్టుగా అయ్యింది. ఈ సినిమా రేంజ్ పెరగడానికి గౌరవ్ బోరా పోషించిన శ్రీరాముడి పాత్ర ఎంతో ఉపయోగ పడిందనేది ట్రేడ్ వర్గాలు చెబుతున్న మాట.

మరి 'మిరాయ్'లో కనిపించీ, కనిపించనట్టుగా ఉన్న గౌరవ్ బోరా... తెలుగులో మరిన్ని అవకాశాలు అందిపుచ్చుకుంటాడేమో చూడాలి.

Also Read: Vidya Balan@20: నన్ను నేను ప్రేమించుకోవడం మొదలెట్టాను

Also Read: The Paradise: ప్యారడైజ్ లో మోహన్ బాబు.. కన్ఫర్మ్ చేసిన లక్ష్మీ మంచు