ప్రముఖ ఓటీటీ లైన్‌లోకి.. ‘విశ్వంభర’ రిలీజ్‌కు క్లియరెన్స్ వచ్చినట్టేనా?

టాలీవుడ్ బాక్సాఫీస్ వద్ద మెగాస్టార్ చిరంజీవి నటిస్తున్న భారీ సోషియో ఫాంటసీ విజువల్ స్పెక్టాకిల్ ‘విశ్వంభర’. ఈ మూవీ ఓటీటీ డీల్‌కు సంబంధించి ఇప్పుడో వార్త వైరల్ అవుతోంది.

టాలీవుడ్ బాక్సాఫీస్ వద్ద మెగాస్టార్ చిరంజీవి (Megastar Chiranjeevi) నటిస్తున్న భారీ సోషియో ఫాంటసీ విజువల్ స్పెక్టాకిల్ ‘విశ్వంభర’ (Vishwambhara). ‘బింబిసార’ ఫేమ్ వశిష్ఠ దర్శకత్వంలో, యువి క్రియేషన్స్ పతాకంపై చిరంజీవి కెరీర్‌లోనే అత్యంత ప్రతిష్టాత్మకంగా, కనీవినీ ఎరుగని బడ్జెట్‌తో ఈ చిత్రం రూపుదిద్దుకుంటోంది. ఎప్పుడో షూటింగ్ పూర్తి చేసుకున్నప్పటికీ.. ఈ సినిమా ఎప్పుడు థియేటర్లలోకి వస్తుందనేది ఇప్పటికీ ఒక పెద్ద మిస్టరీగానే మారింది. గత నెలలో చిరంజీవి పుట్టినరోజు సందర్భంగానైనా రిలీజ్ డేట్‌పై ఒక అధికారిక స్పష్టత వస్తుందని మెగా అభిమానులు గంపెడాశతో ఎదురుచూశారు. కానీ, అప్పుడు కూడా ఎలాంటి విడుదల తేదీ ప్రకటన రాకపోవడంతో అభిమానులు తీవ్ర నిరాశకు గురయ్యారు. అయితే, ఆ నిరాశలో ఉన్న సినీ ప్రియులందరికీ త్వరలోనే ఒక అదిరిపోయే తీపి కబురు అందనుందని టాలీవుడ్ సర్కిల్స్ నుంచి పక్కా సమాచారం అందుతోంది.

విశ్వసనీయ వర్గాల సమాచారం ప్రకారం.. ‘విశ్వంభర’కు సంబంధించిన అత్యంత కీలకమైన విజువల్ ఎఫెక్ట్స్ (VFX) పనులు దాదాపు చివరి దశకు చేరుకున్నాయి. స్క్రీన్‌పై విజువల్స్ అద్భుతంగా, అంతర్జాతీయ ప్రమాణాలకు ఏమాత్రం తీసిపోని రీతిలో వచ్చాయని యూనిట్ వర్గాలు ధీమా వ్యక్తం చేస్తున్నాయి. అయితే, ఇంతకాలం ఈ సినిమా రిలీజ్ డేట్ ఖరారు కాకపోవడానికి అసలు కారణం వీఎఫ్ఎక్స్ మాత్రమే కాదని, పోస్ట్-థియేట్రికల్ ఓటీటీ డీల్ విషయంలో నెలకొన్న స్తబ్దతే ప్రధాన అడ్డంకిగా మారిందనే వార్తలు వినిపించాయి. నిర్మాతలు కోట్ చేస్తున్న భారీ మొత్తానికి, మార్కెట్‌లో డిజిటల్ ప్లాట్‌ఫామ్‌లు ఆఫర్ చేస్తున్న ధరకు మధ్య పెద్ద గ్యాప్ ఉండటం వల్లే బిజినెస్ పరంగా డీల్ క్లోజ్ కాలేదని ఇండస్ట్రీలో గుసగుసలు వినిపించాయి.

తాజాగా ఈ సినిమా ఓటీటీ డీల్‌పై వస్తున్న రూమర్స్‌కు తెరదించుతూ ఒక శుభవార్త బయటకు వచ్చింది. ఈ క్రేజీ ప్రాజెక్ట్ డిజిటల్ రైట్స్‌ను దక్కించుకునేందుకు ప్రముఖ అంతర్జాతీయ ఓటీటీ దిగ్గజం ‘సోనీ లివ్’ (SonyLIV) తీవ్ర ఆసక్తి చూపుతున్నట్లు తెలిసింది. నిర్మాతలు ఆశిస్తున్న ఫ్యాన్సీ రేటుకు తగ్గట్లే చర్చలు దాదాపు కొలిక్కి వచ్చాయని, త్వరలోనే ఈ డీల్‌పై అధికారిక సంతకాలు కూడా జరగనున్నాయని సమాచారం. ఓటీటీ బిజినెస్ క్లియర్ అయితే ఇక సినిమా విడుదలకు ఉన్న చివరి అడ్డంకి కూడా తొలగిపోయినట్లే. అంతా అనుకున్నట్లు జరిగితే రానున్న కొద్ది రోజుల్లోనే ఓటీటీ పార్ట్‌నర్‌తో పాటు సరికొత్త పోస్టర్‌తో ‘విశ్వంభర’ గ్రాండ్ రిలీజ్ డేట్‌ను మేకర్స్ అనౌన్స్ చేయనున్నారని తెలుస్తోంది. దీంతో మెగా అభిమానుల్లో మళ్లీ ఉత్సాహం రెట్టింపైంది.

ఇవి కూడా చదవండి:

రామాయణం టు శ్రీమద్భాగవతం.. భారీ సినిమాటిక్ యూనివర్స్‌కు సాగర్ పిక్చర్స్ శ్రీకారం

స్టార్ హీరోలతోనూ సినిమాలు నిర్మిస్తా.. నన్నిలా కనెక్ట్ అవ్వొచ్చు: ఉదయభాను

‘ఇడుపు కాయితం’ నుంచి ‘శ్రీలత..’ సాంగ్ రిలీజ్.. ఎలా ఉందంటే