మూస పాత్రలు నా వల్ల కాదు.. నా లక్ష్యమిదే: రెజీనా

దక్షిణాది చిత్ర పరిశ్రమలో హీరోయిన్‌గా తనకంటూ ప్రత్యేక గుర్తింపు తెచ్చుకున్న అందాల తార రెజీనా కసాండ్రా. కేవలం గ్లామర్ పాత్రలకే పరిమితం కాకుండా, నటనకు ఆస్కారమున్న విభిన్న పాత్రలను ఎంచుకుంటూ తన కెరీర్‌ను విజయవంతంగా కొనసాగిస్తున్నారు.

దక్షిణాది చిత్ర పరిశ్రమలో హీరోయిన్‌గా తనకంటూ ప్రత్యేక గుర్తింపు తెచ్చుకున్న అందాల తార రెజీనా కసాండ్రా (Regena Cassandrra). కేవలం గ్లామర్ పాత్రలకే పరిమితం కాకుండా, నటనకు ఆస్కారమున్న విభిన్న పాత్రలను ఎంచుకుంటూ తన కెరీర్‌ను విజయవంతంగా కొనసాగిస్తున్నారు. సాధారణంగా సినిమా రంగంలో హీరోయిన్‌గా పీక్ స్టేజ్‌లో ఉన్నప్పుడు లేదా ముప్పై ఏళ్ల వయసు దాటాక ప్రతినాయక పాత్రలు చేయడానికి కథానాయికలు పెద్దగా ఆసక్తి చూపించరు. ఒకసారి నెగెటివ్ పాత్రలు చేస్తే హీరోయిన్ అవకాశాలు తగ్గుతాయన్న భయం చాలామందిలో ఉంటుంది. కానీ రెజీనా మాత్రం ఈ సంప్రదాయ ధోరణిని పూర్తిగా పక్కనపెట్టి, పాత్ర ప్రాధాన్యతను బట్టి హీరోయిన్‌గా, పవర్‌ఫుల్ విలన్‌గా, స్పెషల్ రోల్స్‌తో పాటు గెస్ట్ అప్పీరెన్స్‌లలోనూ మెప్పిస్తూ ఇండస్ట్రీలో అత్యంత బిజీ నటిగా దూసుకుపోతున్నారు.

తాజాగా ఇచ్చిన ఓ ఇంటర్వ్యూలో తన కెరీర్, భవిష్యత్ ప్రణాళికలపై రెజీనా ఆసక్తికర వ్యాఖ్యలు చేశారు. ‘‘నాకు రొటీన్, మూస ధోరణితో కూడిన క్యారెక్టర్లు చేయడం ఏమాత్రం ఇష్టం ఉండదు. ఒకే తరహా పాత్రల్లో నన్ను నేను బంధించుకోలేను. హీరోయిన్‌గా చేస్తూనే, నటనకు సవాల్ విసిరే లేడీ విలన్ రోల్స్, కథను మలుపు తిప్పే అతిథి పాత్రలు.. ఇలా వైవిధ్యభరితమైన పాత్రలను ఎంచుకోవడమే నాకు సంతోషాన్నిస్తుంది. ఇండస్ట్రీలో విభిన్నమైన యాక్టర్‌గా నన్ను నేను ప్రూవ్ చేసుకుంటూ, కెరీర్ పరంగా ఎంతో బలంగా నిలదొక్కుకోవడమే నా ప్రధాన లక్ష్యం’’ అని ఆమె స్పష్టం చేశారు. నటిగా ఎల్లప్పుడూ కొత్తదనాన్ని వెతుక్కునేందుకే తాను ప్రాధాన్యతనిస్తానని తెలిపారు.

ఇటీవల అజిత్ కుమార్ హీరోగా రూపొందిన భారీ చిత్రం ‘విడాముయర్చి’ (Vidaamuyarchi)లో లేడీ విలన్‌గా కనిపించి అందరినీ ఆశ్చర్యపరిచిన రెజీనా, ఇప్పుడు నయనతార ప్రధాన పాత్రలో వచ్చిన ‘మూక్కుత్తి అమ్మన్-2’ (తెలుగులో ‘మహాశక్తి’)లో కూడా పవర్‌ఫుల్ నెగెటివ్ షేడ్ ఉన్న పాత్రలో నటించారు. వీటితో పాటు తమిళంలో ‘ఫ్లాష్‌బ్యాక్’, హిందీలో ‘ది వేవ్స్’, ‘సెక్షన్ 108’ వంటి క్రేజీ ప్రాజెక్ట్‌లతో బాలీవుడ్, కోలీవుడ్‌లలో వరుస సినిమాలతో బిజీగా ఉన్నారు. భాషతో సంబంధం లేకుండా లీడ్ రోల్స్ నుంచి ప్రతినాయక పాత్రల వరకు.. ప్రతి ఒక్కదాంట్లో తన మార్క్ చూపిస్తూ రెజీనా సరికొత్త ప్రయాణాన్ని కొనసాగిస్తున్నారు.

ఇవి కూడా చదవండి:

నాన్నను కోల్పోయినంత బాధగా ఉంది: వివి వినాయక్

‘టైసన్ నాయుడు’ ఫోక్ బ్యాంగర్ ‘మదరాసి రబ్బరు బొమ్మ’ అదిరింది

Sunday Tv Movies: దీవాళి బొనాంజా.. ఆదివారం టీవీ సినిమాల లిస్ట్