‘మకుటం’ ఫస్ట్ సింగిల్ అప్డేట్.. అందుకే ఆలస్యమైంది!

సూపర్ గుడ్ ఫిలిమ్స్ (Super Good Films) నిర్మాణంలో.. విశాల్ (Vishal) హీరోగా నటిస్తూ.. దర్శకత్వం వహిస్తోన్న ప్రతిష్టాత్మక చిత్రం ‘మకుటం’ (Makutam). సూపర్ గుడ్ ఫిల్మ్స్ బ్యానర్‌లో 99వ సినిమాగా రూపుదిద్దుకుంటోన్న ఈ సినిమాకు జీవీ ప్రకాష్ కుమార్ సంగీతం అందిస్తున్నారు. ఈ సినిమాకు సంబంధించిన ఒక ముఖ్యమైన అప్‌డేట్‌ను చిత్ర బృందం విడుదల చేసింది. వాస్తవానికి ఈ సినిమాలోని మొదటి పాట జూన్ 16న విడుదల కావాల్సి ఉంది. ఈ మేరకు అధికారిక ప్రకటన కూడా వచ్చింది. కానీ, ఆ తేదీన పాట విడుదల కాలేదు. కొన్ని అనివార్య కారణాల వల్ల ఈ పాట విడుదలను వాయిదా వేస్తున్నట్లు దర్శకుడు విశాల్ అధికారికంగా ప్రకటించారు.

ఈ విషయాన్ని తెలియజేస్తూ చిత్రబృందం ఒక ప్రత్యేక పోస్టర్‌ను విడుదల చేసింది. ‘‘కొన్నిసార్లు ఒక అద్భుతమైన పాట ప్రపంచానికి పరిచయం కావడానికి ముందు, దానికి మరికొంత సమయం, ప్రేమ అవసరమవుతాయి. అందుకే మా ఫస్ట్ సింగిల్‌ను వాయిదా వేస్తున్నాం. ఈ పాటను జూన్ 19న (నేడు) ప్రేక్షకుల ముందుకు తీసుకురాబోతున్నాం’’ అని దర్శక హీరో విశాల్ ఈ ప్రకటనలో పేర్కొన్నారు. ఈ ఆలస్యానికి క్షమాపణలు చెబుతూనే, ప్రేక్షకులు వేచి ఉన్న సమయానికి తగ్గట్టుగానే సంగీతం అత్యంత అద్భుతంగా ఉంటుందని ఆయన భరోసా ఇచ్చారు.

‘‘సహనంతోనే అద్భుతాలు ఆవిష్కృతమవుతాయి. కేవలం విడుదల తేదీ మాత్రమే మారింది కానీ, సినిమాపై ఉన్న అంచనాలు, ఉత్సాహం ఏమాత్రం తగ్గలేదు. ఏ మాస్టర్‌పీస్ అయినా అది పూర్తిగా సిద్ధమైనప్పుడే బయటకు వస్తుంది’’ అంటూ దర్శకుడు విశాల్ ఈ ప్రకటనలో రాసుకొచ్చారు. ఈ చిత్రం జూలై 2026లో థియేటర్లలోకి రావడానికి సిద్ధమవుతోంది. విశాల్ త్రిపాత్రాభినయం చేస్తున్న ఈ మూవీలో దుషార విజయన్, అంజలి, తంబి రామయ్య, అర్జై తదితరులు ఇతర కీలక పాత్రలను పోషిస్తున్నారు. రవి అరసు ఈ చిత్రానికి కథను సమకూర్చారు.

ఇవి కూడా చదవండి:

డిప్యూటీ సీఎంగా లారెన్స్.. అభిమానులతో జాగ్రత్త!

రౌడీ హీరో విజయ్ దేవరకొండ రేర్ ఫీట్.. గ్లోబల్ రేంజ్ అంటే ఇది!

వెంకీ, కళ్యాణ్ రామ్, అనిల్ రావిపూడి సినిమాకు క్లాప్ ఎవరు కొట్టారంటే