ఆస్కార్ రేసులో చరణ్ ‘పెద్ది’కి మిస్సైన ఛాన్స్.. ఫైనల్‌గా ఆ చిత్రం ఎంపిక!

ప్రపంచ సినీ రంగంలో అత్యంత ప్రతిష్టాత్మకంగా భావించే ఆస్కార్స్ (99వ అకాడమీ అవార్డ్స్ - 2027) రేసులో భారత అధికారిక ఎంట్రీ ఏదనే దానిపై ఫిల్మ్ ఫెడరేషన్ ఆఫ్ ఇండియా (FFI) అధికారిక ప్రకటన చేసింది.

ప్రపంచ సినీ రంగంలో అత్యంత ప్రతిష్టాత్మకంగా భావించే ఆస్కార్స్ (99వ అకాడమీ అవార్డ్స్ - 2027) రేసులో భారత అధికారిక ఎంట్రీ ఏదనే దానిపై ఫిల్మ్ ఫెడరేషన్ ఆఫ్ ఇండియా (FFI) అధికారిక ప్రకటన చేసింది. ‘ఉత్తమ అంతర్జాతీయ ఫీచర్ ఫిల్మ్’ (Best International Feature Film) విభాగంలో భారతదేశం తరఫున ప్రాతినిధ్యం వహించే చిత్రంగా మరాఠీ మూవీ ‘గోంధళ్’ (Gondhal) ఎంపికైంది. శుక్రవారం ముంబైలో జరిగిన మీడియా సమావేశంలో సెలక్షన్ కమిటీ చైర్‌పర్సన్ పి. శేషాద్రి ఈ వివరాలను వెల్లడించారు. మొత్తం 33 చిత్రాలతో కూడిన తుది జాబితా నుంచి పరిశీలన అనంతరం ‘గోంధళ్’ను దేశ అధికారిక ఎంట్రీగా ఏకగ్రీవంగా ఎంపిక చేసినట్లు ప్రకటించారు.

ఆస్కార్ పరిశీలనలో రామ్ చరణ్ ‘పెద్ది’

గ్లోబల్ స్టార్ రామ్ చరణ్ నటించిన భారీ చిత్రం ‘పెద్ది’ (Peddi) ఈసారి ఆస్కార్స్ అధికారిక ఎంట్రీ పరిశీలన జాబితాలో నిలవడం టాలీవుడ్ వర్గాల్లో తీవ్ర ఆసక్తిని రేకెత్తించింది. తెలుగు చిత్ర పరిశ్రమ నుంచి అత్యున్నత సాంకేతిక విలువలు, బలమైన భావోద్వేగాలతో రూపొందిన ‘పెద్ది’ కోసం ఎఫ్‌ఎఫ్‌ఐ సభ్యులు ప్రత్యేకంగా చర్చించారు. ‘పెద్ది’తో పాటు దేశవ్యాప్తంగా వివిధ భాషల నుంచి మొత్తం 33 చిత్రాలు ఈ ఏడాది పోటీపడ్డాయి. ఇందులో సన్నీ డియోల్ ‘బోర్డర్ 2’, రణ్‌వీర్ సింగ్ ‘ధురందర్’, ‘ధురందర్: ది రివెంజ్’, యామీ గౌతమ్ ‘హక్’, ఫర్హాన్ అక్తర్ ‘120 బహదూర్’, ఇంతియాజ్ అలీ ‘మై వాపస్ ఆవుంగా’, ‘హనుమాన్ అంశ్’ వంటి ప్రముఖ చిత్రాలు ఉన్నాయి. గత పది రోజులుగా ఈ 33 చిత్రాలను స్క్రీనింగ్ చేసి చర్చించిన కమిటీ.. చివరకు ‘గోంధళ్’, ‘అంఘ్’, ‘ఇక్కిస్’లను టాప్-3 జాబితాలోకి తీసుకుని, అంతిమంగా ‘గోంధళ్’కు ఓటు వేసింది. దీంతో చరణ్ ‘పెద్ది’ చిత్రానికి స్వల్ప తేడాతో అధికారిక ఎంట్రీ అవకాశం చేజారినట్లయింది.

‘గోంధళ్’ కథాంశం ఏమిటంటే..

మహారాష్ట్ర గ్రామీణ నేపథ్యంలో సాగే ప్రాచీన, సంప్రదాయ ‘గోంధళ్’ నృత్యోత్సవం బ్యాక్‌డ్రాప్‌లో ఈ చిత్రం తెరకెక్కింది. అణచివేతతో కూడిన వివాహ బంధంలో చిక్కుకున్న 'సుమన్' అనే మహిళ.. తన ప్రియుడితో కలిసి అక్కడి నుంచి తప్పించుకోవడానికి చేసే హత్యాయత్నం, ఆ క్రమంలో భక్తి, మోసం, విధికి మధ్య నడిచే ఉత్కంఠభరిత కథగా ఈ సినిమాను దర్శకుడు సంతోష్ దావాఖర్ అద్భుతంగా మలిచారు. ఇషితా దేశ్‌ముఖ్ ప్రధాన పాత్ర పోషించగా.. దిగ్గజ సంగీత దర్శకుడు ఇళయరాజా స్వరాలు సమకూర్చడం విశేషం.

కాగా, ఆస్కార్ బరిలోకి భారత్ తరఫున ఎంపికైన నాలుగో మరాఠీ చిత్రంగా ‘గోంధళ్’ నిలిచింది. గతంలో ‘శ్వాస్’ (2005), ‘హరిశ్చంద్రాచి ఫ్యాక్టరీ’ (2009), ‘కోర్ట్’ (2015) చిత్రాలు మరాఠీ నుంచి ప్రాతినిధ్యం వహించాయి. ఇప్పటివరకు భారతీయ చిత్ర పరిశ్రమ నుంచి ఏ చిత్రమూ ఈ విభాగంలో ఆస్కార్ ట్రోఫీని గెలవలేదు. మరి 99వ అకాడమీ అవార్డ్స్ బరిలో ‘గోంధళ్’ భారత్‌కు చిరకాల స్వప్నమైన ఆస్కార్ అవార్డును తెచ్చిపెడుతుందో లేదో వేచి చూడాలి!

ఇవి కూడా చదవండి:

సుహాస్ రంగుపై కామెంట్స్‌తో వివాదం.. ‘మండాడి’ డైరెక్టర్ వివరణ ఇదే!

టైర్ 2 హీరోస్ థియేట్రికల్ బిజినెస్.. ఇమేజ్ డ్యామేజ్ అయ్యే ఛాన్స్!

‘జాంబీ రెడ్డి 2’లో రియల్ స్టార్ ఉపేంద్ర.. ఫస్ట్ లుక్ చూస్తే వణకాల్సిందే