Drishyam 3: అక్షయ్ ఖన్నా తప్పిదం.. జైదీప్‌కు జాక్‌పాట్
ABN, Publish Date - Oct 03 , 2026 | 02:33 PM
బాక్సాఫీస్ వద్ద కలెక్షన్ల సునామీ సృష్టిస్తూ, సోషల్ మీడియాలో మీమ్స్, విశ్లేషణలతో హోరెత్తిస్తోంది అజయ్ దేవగన్ సంచలన ఫ్యామిలీ క్రైమ్ థ్రిల్లర్ ‘దృశ్యం: ది కన్‌క్లూజన్’. ఈ మూవీకి సంబంధించి ఇప్పుడో వార్త వైరల్ అవుతోంది.
బాక్సాఫీస్ వద్ద కలెక్షన్ల సునామీ సృష్టిస్తూ, సోషల్ మీడియాలో మీమ్స్, విశ్లేషణలతో హోరెత్తిస్తోంది అజయ్ దేవగన్ సంచలన ఫ్యామిలీ క్రైమ్ థ్రిల్లర్ ‘దృశ్యం: ది కన్‌క్లూజన్’ (Drishyam 3). అంచనాలకు ఏమాత్రం తగ్గకుండా వచ్చిన ఈ ముగింపు భాగం ప్రేక్షకులను సీట్ ఎడ్జ్‌లో కూర్చోబెడుతోంది. అయితే, సినిమా సక్సెస్‌తో పాటు సినీ వర్గాల్లో అత్యంత ఆసక్తికరమైన చర్చగా మారింది మాత్రం సీనియర్ నటుడు అక్షయ్ ఖన్నా ఈ ప్రాజెక్ట్ నుంచి తప్పుకోవడమే అని చెప్పుకోవాలి. ఆయన స్థానంలో వచ్చిన జైదీప్ అహ్లావత్ విశ్వరూపం చూపించారు.
‘దృశ్యం 2’లో ఐజీ తరుణ్ అహ్లావత్‌గా అక్షయ్ ఖన్నా చేసిన రచ్చ అంతా ఇంతా కాదు. అజయ్ దేవగన్ పాత్రకు సమానమైన పవర్‌ఫుల్ నెగెటివ్ షేడ్స్‌తో అద్భుత నటన కనబరిచి, ఆ సినిమా ఘనవిజయంలో కీలక పాత్ర పోషించారు. దీంతో మూడో భాగమైన ‘దృశ్యం: ది కన్‌క్లూజన్’ కోసం కూడా తొలుత ఆయన్నే ఎంపిక చేశారు. కానీ, రెమ్యూనరేషన్ విషయంలో వచ్చిన విభేదాలతో పాటు కథాపరమైన కొన్ని క్రియేటివ్ డిఫరెన్సెస్ తలెత్తడంతో అక్షయ్ ఖన్నా ప్రాజెక్ట్ నుంచి తప్పుకున్నారు. అక్షయ్ ఖన్నా (Akshaye Khanna) తప్పుకోవడంతో మేకర్స్ ఏమాత్రం ఆలస్యం చేయకుండా వర్సటైల్ యాక్టర్ జైదీప్ అహ్లావత్ (Jaideep Ahlawat)ను రంగంలోకి దించారు. కేవలం నటుడిని మార్చడమే కాకుండా, ఆయన శరీరభాషకు తగ్గట్టుగా స్క్రిప్ట్‌లో మార్పులు చేసి ‘రాజ్‌వీర్ సింగ్ తోమర్’ అనే సరికొత్త పవర్‌ఫుల్ పోలీస్ క్యారెక్టర్‌ను సృష్టించారు.
ఇప్పుడు థియేటర్లలో జైదీప్ నటనకు ప్రేక్షకులు ఫిదా అయిపోతున్నారు. తెరపై అజయ్ దేవగన్‌ను ఢీకొట్టే సన్నివేశాల్లో జైదీప్ చూపించిన ఇంటెన్సిటీ, భయపెట్టే ప్రెజెన్స్ గూస్‌బంప్స్ తెప్పిస్తున్నాయి. ముఖ్యంగా ఇంటర్వెల్‌కు ముందు అజయ్ దేవగన్, జైదీప్ మధ్య వచ్చే ఫేస్-ఆఫ్ సీన్ థియేటర్లను షేక్ చేస్తోంది. ఇటీవలే ‘ఛావా’ (Chhaava), ‘ధురంధర్’ (Dhurandhar) వంటి భారీ విజయాలతో అక్షయ్ ఖన్నా కెరీర్ మళ్లీ ఫుల్ ఫామ్‌లోకి వచ్చింది. సరిగ్గా ఇలాంటి సమయంలో అత్యంత ప్రతిష్టాత్మకమైన ‘దృశ్యం 3’ని వదులుకోవడం ఆయన చేసిన పెద్ద పొరపాటని నెటిజన్లు, సినీ విశ్లేషకులు అభిప్రాయపడుతున్నారు. ఒకవేళ ఈ సినిమాలోనూ అక్షయ్ ఉండి ఉంటే ఆయన స్టార్‌డమ్ నెక్స్ట్ లెవెల్‌కు వెళ్లి ఉండేది.
అక్షయ్ ఖన్నా మిస్ చేసుకున్న ఈ సువర్ణావకాశాన్ని జైదీప్ అహ్లావత్ రెండు చేతులా ఒడిసిపట్టుకున్నారు. మాస్టర్‌క్లాస్ పెర్ఫార్మెన్స్‌తో వెండితెరపై ప్రతినాయకుడిగా తాండవం చేసి, తన కెరీర్‌కు మరో మైలురాయి లాంటి విజయాన్ని ఖాతాలో వేసుకున్నారు. మొత్తం మీద అక్షయ్ ఖన్నా తప్పిదం.. జైదీప్ అహ్లావత్‌కు ఊహించని జాక్‌పాట్‌గా మారిందనేలా బాలీవుడ్ అంతా మాట్లాడుకుంటున్నారు.
ఇవి కూడా చదవండి:
రెండు పార్టులుగా సాయిపల్లవి రెండు సినిమాలు
‘టాక్సిక్’ ఓటీటీ రిలీజ్ మరింత ఆలస్యం.. అక్టోబర్‌లోనూ డౌటే!
స్మిత్ మచ్చార్ సాహసం ప్రతి భారతీయుడికీ గర్వకారణం: చిరంజీవి