Maamannan: చివరి నిమిషంలో తొలగిన కోర్టు చిక్కులు.. టాక్ ఏంటంటే?

ABN , First Publish Date - 2023-06-29T21:43:46+05:30 IST

‘‘సినిమా విడుదలకు సెన్సార్‌ బోర్డు అనుమతి ఇచ్చింది. సినిమాను చూసిన ప్రేక్షకులు ఆ చిత్రం గురించి రెండు రోజుల్లో మరిచిపోతారు. ఇక శాంతిభద్రతల సమస్య అంశాన్ని పోలీసులు చూసుకుంటారు. అందువల్ల విడుదలపై స్టే విధించలేం’’ అంటూ కోర్టు తీర్పునివ్వడంతో తమిళ నాట ‘మామన్నన్’ చిత్రం గ్రాండ్‌గా విడుదలైంది. ప్రస్తుతం చిత్రానికి పాజిటివ్ టాకే వినిపిస్తోంది.

Maamannan: చివరి నిమిషంలో తొలగిన కోర్టు చిక్కులు.. టాక్ ఏంటంటే?

Maamannan Movie Still

హీరో ఉదయనిధి స్టాలిన్ (Udhayanidhi Stalin) - డైరెక్టర్‌ మారి సెల్వరాజ్‌ (Mari Selvaraj) కాంబినేషన్‌లో తెరకెక్కిన ‘మామన్నన్‌’ (Maamannan) చిత్రం విడుదలకు ముందు ఎదురైన న్యాయపరమైన చిక్కులు వీడిపోయాయి. దీంతో ఈ చిత్రం ముందుగా ప్రకటించినట్టుగానే జూన్‌ 29న గ్రాండ్‌గా విడుదల చేశారు. ఉదయనిధి, వడివేలు (Vadivelu), కీర్తిసురేష్‌ (Keerthi Suresh), ఫహద్‌ ఫాజిల్‌ (Fahadh Faasil) తదితరులు ఇందులో కీలక పాత్రలను పోషించారు. అయితే, ఈ చిత్రాన్ని విడుదల చేయకుండా స్టే విధించాలని కోరుతూ నెల్లై జిల్లా పాలయంకోట్టైకు చెందిన మణికంఠన్‌ (Manikantan) అనే వ్యక్తి హైకోర్టు మదురై బెంచ్‌లో పిటిషన్‌ దాఖలు చేసి అత్యవసరంగా విచారణ చేపట్టాలని కోరిన విషయం తెలిసిందే. (Maamannan Released)

‘‘ఈ సినిమా ఒక సామాజిక వర్గానికి చెందిన మూవీ. ఈ చిత్ర దర్శకుడు మారి సెల్వరాజ్‌ తెరకెక్కించిన గత చిత్రం ‘కర్ణన్‌’ కూడా కొడియన్‌కుళం గ్రామంలో జరిగిన ఒక సంఘటన ఆధారంగా తెరకెక్కింది. ఇపుడు విడుదల చేసిన ‘మామన్నన్‌’ ట్రైలర్‌, పాటలు కూడా రెండు వర్గాల మధ్య ఘర్షణలను చూపిస్తున్నాయి. ఈ సినిమా విడుదలైతే దేవర్‌, దేవేంద్రకుళ వేలాలర్‌ వర్గాల మధ్య ఘర్షణలు జరిగే అవకాశం ఉంది. రాష్ట్రంలో శాంతిభద్రతలకు విఘాతం కలిగే అవకాశం ఉంది. అందువల్ల చిత్రం విడుదలపై స్టే విధించాలి’’ అని పిటిషన్‌లో పేర్కొన్నారు.

దీనిపై విచారణ జరిపిన హైకోర్టు మదురై బెంచ్‌... ‘‘సినిమా విడుదలకు సెన్సార్‌ బోర్డు అనుమతి ఇచ్చింది. సినిమాను చూసిన ప్రేక్షకులు ఆ చిత్రం గురించి రెండు రోజుల్లో మరిచిపోతారు. ఇక శాంతిభద్రతల సమస్య అంశాన్ని పోలీసులు చూసుకుంటారు. అందువల్ల విడుదలపై స్టే విధించలేం’’ అంటూ కోర్టు తీర్పునిచ్చింది (Court Verdict on Maamannan Case). దీంతో ‘మామన్నన్‌’ విడుదలకు అడ్డు తొలగిపోయింది. ప్రస్తుతం ఈ చిత్రానికి కోలీవుడ్‌ (Kollywood)లో పాజిటివ్ స్పందనే వినిపిస్తోంది. మారి సెల్వరాజ్ మరో హిట్ కొట్టాడంటూ.. సోషల్ మీడియాలో సైతం టాక్ వైరల్ అవుతోంది.