‘వారణాసి’తో.. ‘రామాయణ 2’కు కొత్త తలనొప్పి

భారతీయ సినిమా ఇప్పుడు ప్రపంచ స్థాయిలో తన సత్తా చాటుతోంది. ముఖ్యంగా భారీ బడ్జెట్ చిత్రాలు, అత్యాధునిక సాంకేతికతతో తెరకెక్కుతున్న విజువల్ వండర్స్ ప్రేక్షకుల్లో ఆసక్తిని పెంచుతున్నాయి.

భారతీయ సినిమా ఇప్పుడు ప్రపంచ స్థాయిలో తన సత్తా చాటుతోంది. ముఖ్యంగా భారీ బడ్జెట్ చిత్రాలు, అత్యాధునిక సాంకేతికతతో తెరకెక్కుతున్న విజువల్ వండర్స్ ప్రేక్షకుల్లో ఆసక్తిని పెంచుతున్నాయి. ఈ నేపథ్యంలో రెండు భారీ ప్రాజెక్టుల గురించి ఆసక్తికరమైన చర్చ మొదలైంది. అందులో ఒకటి నితీష్ తివారీ (Nitesh Tiwari) తెరకెక్కిస్తున్న ‘రామాయణ’ (Ramayana 2) రెండో భాగం కాగా.. మరొకటి ఎస్.ఎస్. రాజమౌళి (Rajamouli) రూపొందిస్తున్న ‘వారణాసి’ (Varanasi). ఈ రెండు సినిమాల కథలు వేర్వేరైనా.. పురాణ ఘట్టాలను తెరపై ఆవిష్కరించే విషయంలో మాత్రం వీటి మధ్య పోలికలు వచ్చే అవకాశం ఉంది. ముఖ్యంగా ‘వారణాసి’లో చూపించబోయే రామాయణ ఘట్టం ఇప్పుడు అందరి దృష్టిని ఆకర్షిస్తోంది.

దర్శకధీరుడు రాజమౌళి సినిమా అంటేనే భారీ స్థాయిలో అంచనాలు ఉంటాయి. అందులోనూ మహేష్ బాబు ప్రధాన పాత్రలో తెరకెక్కుతున్న ‘వారణాసి’పై ప్రపంచవ్యాప్తంగా ఆసక్తి నెలకొంది. ఈ సినిమా ప్రీ గ్లింప్స్‌లోనే రామాయణానికి సంబంధించిన ఓ కీలక ఘట్టాన్ని పరిచయం చేసి ప్రేక్షకుల్లో ఉత్కంఠ పెంచారు. ఈ ఎపిసోడ్‌ను రాజమౌళి అత్యంత భారీ స్థాయిలో రూపొందిస్తున్నారనే ప్రచారం జరుగుతోంది. సుమారు 30 నిమిషాల నిడివి ఉండే ఈ ఘట్టం సినిమాలో ప్రధాన ఆకర్షణగా నిలవనుందనే అంచనాలు వినిపిస్తున్నాయి.

పౌరాణిక అంశాలను భావోద్వేగాలతో ముడిపెట్టి, భారీ విజువల్స్‌తో ప్రేక్షకుల ముందుకు తీసుకురావడంలో రాజమౌళికి ప్రత్యేకమైన శైలి ఉంది. ఇప్పుడు ‘వారణాసి’లో ఆయన చూపించబోయే రామాయణ ఘట్టం కూడా అదే స్థాయిలో ఉంటుందని అభిమానులు ఆశిస్తున్నారు. ముఖ్యంగా ఐమ్యాక్స్ తెరపై ఈ సన్నివేశాలు ఎలాంటి అనుభూతిని అందిస్తాయన్నది ఆసక్తికరంగా మారింది.

మరోవైపు రణ్‌బీర్ కపూర్ రాముడిగా నటిస్తున్న ‘రామాయణ’ 2పై కూడా భారీ అంచనాలున్నాయి. నితీష్ తివారీ దర్శకత్వంలో రూపొందుతున్న ఈ ప్రాజెక్ట్‌లో భారతీయ ఇతిహాసాన్ని అత్యాధునిక సాంకేతికతతో ప్రపంచ ప్రేక్షకులకు పరిచయం చేశారు. ఇక రానున్న రెండో భాగంలో రామసేతు నిర్మాణం, లంకాదహనం, రావణుడితో రాముడి యుద్ధం వంటి కీలక ఘట్టాలు తెరపై కనిపించనున్నాయి. సహజంగానే వీటిని అత్యున్నత స్థాయి విజువల్ ఎఫెక్ట్స్‌తో చూపించాల్సి ఉంటుంది. ఇలాంటి సమయంలో ‘వారణాసి’లోని రామాయణ ఎపిసోడ్ ప్రేక్షకులను విశేషంగా ఆకట్టుకుంటే.. ‘రామాయణ 2’పై కూడా అంచనాలు మరింత పెరిగే అవకాశం ఉంది.

అయితే ‘రామాయణ’ చిత్ర బృందం కూడా ఈ విషయంలో ఏమాత్రం తగ్గేలా కనిపించడం లేదు. సినిమా కోసం ప్రత్యేక శ్రద్ధ తీసుకుంటోంది. అంతర్జాతీయ స్థాయి సాంకేతిక నిపుణులు, ప్రముఖ విజువల్ ఎఫెక్ట్స్ సంస్థల సహకారంతో ఈ చిత్రాన్ని రూపొందిస్తున్నారు. ముఖ్యంగా రెండో భాగంలోని యుద్ధ సన్నివేశాలు, లంకా నగర నిర్మాణం, ఇతర పౌరాణిక ఘట్టాలను తెరపై ఎలా చూపిస్తారనేది ఆసక్తికరంగా మారింది. ఇప్పటికే గ్రౌండ్ వర్క్ వేగవంతం చేశారు.

ఒకవైపు రాజమౌళి తనదైన విజువల్ టేకింగ్‌తో ‘వారణాసి’ని ప్రపంచ స్థాయిలో నిలబెట్టాలని ప్రయత్నిస్తుంటే.. మరోవైపు నితీష్ తివారీ భారతీయ ఇతిహాసాన్ని భారీ సినిమాటిక్ అనుభూతిగా మలిచేందుకు సిద్ధమవుతున్నారు. ఈ రెండు సినిమాల మధ్య ప్రత్యక్ష పోటీ లేకపోయినా.. ప్రేక్షకుల అంచనాల విషయంలో మాత్రం పోలికలు తప్పేలా లేవు. చివరకు ఎవరి విజువల్ ప్రపంచం ప్రేక్షకులను ఎక్కువగా ఆకట్టుకుంటుందో తెలియాలంటే ఈ సినిమాలు తెరపైకి వచ్చే వరకు వేచి చూడాల్సిందే.