యాంగ్రీ యంగ్‌ మ్యాన్‌ సెకండ్‌ ఇన్నింగ్స్‌ వర్కవుట్‌ అయిందా..?

సీనియర్ హీరో రాజశేఖర్ కెరీర్‌లో కొత్త అధ్యాయం మొదలైంది. సెకండ్ ఇన్నింగ్స్ లో స్ట్రాంగ్ కమ్ బ్యాక్ ఇచ్చారు. 'బైకర్' మూవీలో రాజశేఖర్ పర్ఫామెన్స్ ను ఆకాశానికెత్తేస్తున్నారు.

ఒకప్పుడు టాలీవుడ్‌లో యాంగ్రీ యంగ్ మ్యాన్ అంటే మనకు గుర్తొచ్చే ఏకైక పేరు డాక్టర్ రాజశేఖర్. తనదైన మేనరిజమ్స్, పవర్‌ఫుల్ డైలాగ్ డెలివరీతో యాక్షన్ హీరోగా ఒక వెలుగు వెలిగారు. అయితే కాలక్రమేణా కెరీర్‌లో ఎత్తుపల్లాలు సహజం. గత కొంతకాలంగా రాజశేఖర్ గారికి బ్యాడ్ టైమ్ నడుస్తోందనేది అందరికీ తెలుసు. వరుస సినిమాలు లేకపోవడం, చేసిన ఒకటి రెండు చిత్రాలు కూడా బాక్సాఫీస్ వద్ద ఆశించిన ఫలితాన్ని ఇవ్వకపోవడంతో ఆయన అభిమానులు సైతం కాస్త నిరాశ చెందారు. కానీ, ఒక్క హిట్ మనిషి తలరాతను మారుస్తుంది. ఇప్పుడు రాజశేఖర్ విషయంలో అదే జరుగుతోంది!

రాజశేఖర్ గారు సోలో హీరోగా మాత్రమే కాకుండా, క్యారెక్టర్ ఆర్టిస్ట్‌గా కూడా తన అదృష్టాన్ని పరీక్షించుకోవాలని నిర్ణయించుకున్నారు. అందులో భాగంగానే నితిన్ నటించిన 'ఎక్స్‌ట్రార్డినరీ మ్యాన్' చిత్రంలో ఒక కీలక పాత్ర పోషించారు. ఆ సినిమాతో తన సెకండ్ ఇన్నింగ్స్ గ్రాండ్‌గా మొదలవుతుందని అందరూ ఆశించారు. కాకపోతే, ఆ చిత్రం బాక్సాఫీస్ వద్ద బోల్తా కొట్టడంతో రాజశేఖర్ ఆశలపై నీళ్లు చల్లినట్లయింది. ఇక రీసెంట్‌గా 'బైకర్' మూవీ ప్రెస్ మీట్‌లో ఆయన మాట్లాడిన మాటలు అందరినీ కలిచివేసాయి. దయచేసి నాకు ఒక అవకాశం ఇవ్వండి... మంచి పాత్ర వస్తే చేయడానికి సిద్ధంగా ఉన్నాను అని ఆయన అన్నప్పుడు ఫ్యాన్స్ గుండె బరువెక్కింది. పట్టుదల ఉంటే విజయం వరిస్తుందని ఈ శుక్రవారం నిరూపితమైంది. రాజశేఖర్ నటించిన తాజా చిత్రం 'బైకర్' థియేటర్లలోకి వచ్చింది. ఈ సినిమా చూసిన ప్రేక్షకులు ఒక్కటే మాట చెబుతున్నారు.. రాజశేఖర్ ఈజ్ బ్యాక్. ఇందులో యాక్షన్ కంటే కూడా ఎమోషనల్ సీన్స్‌లో ఆయన చూపించిన నటన అమోఘం. తండ్రీకొడుకుల మధ్య వచ్చే సన్నివేశాలు థియేటర్లో ఆడియెన్స్‌ మదిని దోచాయి. నటుడిగా ఆయనను ఈ సినిమా మరో మెట్టు ఎక్కించింది. విమర్శకులు సైతం రాజశేఖర్ పెర్ఫార్మెన్స్‌ను ఆకాశానికెత్తేస్తున్నారు.

ప్రస్తుతం ఎక్కడ చూసినా 'బైకర్' టాక్ వినిపిస్తోంది. ఈ సినిమాకు వస్తున్న పాజిటివ్ రెస్పాన్స్‌తో రాజశేఖర్ సెకండ్ ఇన్నింగ్స్ ఈసారి పక్కాగా వర్కవుట్ అయినట్లే కనిపిస్తోంది. టాలెంట్ ఉన్న నటుడికి ఒక్క మంచి అవకాశం వస్తే ఎలా ఉంటుందో 'బైకర్' నిరూపించింది. ఈ విజయంతో రాజశేఖర్ గారికి మరిన్ని క్రేజీ ఆఫర్లు క్యూ కడతాయని ఇండస్ట్రీ వర్గాలు అంచనా వేస్తున్నాయి. మనందరి ఫేవరెట్ యాంగ్రీ మ్యాన్ మళ్ళీ బిజీ హీరో అయిపోవాలని కోరుకుందాం.

Read Also:'టైర్ 2' హీరోస్‌లో 'నంబర్ వన్'గా నాని!

Read Also: 'సైరాబాను'.. అంటున్న ఆది సాయికుమార్‌