NTR: శ్రీలంకలో.. 'డ్రాగన్' వేట

ప్రస్తుతం 'డ్రాగన్'కు సంబంధించిన కీలక సన్నివేశాలను ఆర్.ఎఫ్.సి.లో చిత్రీకరిస్తున్నారు. యన్టీఆర్ తో పాటు ప్రధాన పాత్రధారులందరూ ఈ షూటింగ్ లో పాలు పంచుకుంటున్నారు. ఈ షెడ్యూల్ కాగానే 'డ్రాగన్' టీమ్ శ్రీలంకకు పయనం కానుందట. అక్కడ ఒళ్ళు గగుర్పొడిచేలా యాక్షన్ సీన్స్ తెరకెక్కించనున్నారని విశేషంగా వినిపిస్తోంది. ప్రశాంత్ నీల్ మూవీస్ లో యాక్షన్ సీన్స్ ఎలా ఉంటాయో అందరికీ తెలిసిందే. ఇందులో యన్టీఆర్ పోషిస్తోన్న 'లూగర్' రోల్ ను మరింత వైల్డ్ గా చూపించనున్నారని తెలుస్తోంది. అంతేకాదు 'ట్రిపుల్ ఆర్'లో యన్టీఆర్ పోషించిన కొమురం భీముడు పాత్రను, లూగర్ రోల్ ను బేరీజు వేస్తున్నారు సినీజనం.

'ట్రిపుల్ ఆర్'లో తమ తెగకు చెందిన పసిపాపను బ్రిటిష్ వారు తీసుకుపోగా, ఆ అమ్మాయిని తిరిగి తీసుకు రావడానికి ఎంతకైనా తెగించే కొమురం భీముడు పాత్రలో నటించి అలరించారు యన్టీఆర్. అదే తీరున 'డ్రాగన్'లో 'ఆఫ్ఘన్ ట్రేడింగ్ కంపెనీ' పోటీదారులను మట్టుపెట్టే క్రమంలో లూగర్ ప్రత్యర్థుల ప్రాణాలను తీసేస్తారట. పాప కోసం సాహసం చేసే కొమురం భీమ్ రోల్, తన కంపెనీ కోసం పోరాడే లూగర్ పాత్ర ఒకటి ఎలా అవుతాయి అన్న సందేహం రావచ్చు. అయితే 'లూగర్' పాత్ర ఎందుకలా మారింది అన్నఅంశం కూడా హృదయాలను కదిలించేలా ఉంటుందని తెలుస్తోంది. అందువల్లే భీమ్, లూగర్ పాత్రలను కంపేర్ చేస్తున్నారు మూవీ లవర్స్.

'ట్రిపుల్ ఆర్'లో బ్రిటిష్ వారిమీదే పోరాటం చేసే యోధుడుగా కనిపించారు యన్టీఆర్. 'డ్రాగన్'లో బ్రిటిష్ వారు వదిలేసిన ఓ మాదకద్రవ్య వ్యాపారం కోసం 'గోల్డెన్ ట్రేడింగ్ కంపెనీ', 'ఆఫ్ఘన్ ట్రేడింగ్ కంపెనీ' ఆధిపత్య పోరు సాగిస్తూ ఉంటాయి. ఇందులోనే మృగం లాంటి లూగర్ కనిపిస్తాడు. అతను అలా ఎందుకు మారాడు అన్నదే ఇందులోని ప్రధానాంశమని తెలుస్తోంది. రుక్మిణీ వసంత్ నాయికగా నటిస్తోన్న 'డ్రాగన్'లో అనిల్ కపూర్ 'రఘువీర్ రాథోడ్' అనే పవర్ ఫుల్ రోల్ లో కనిపించనున్నారు. బిజూ మీనన్, అశుతోష్ రానా, ఖుష్బూ ఇతర ముఖ్యపాత్రధారులు. 2027 జూన్ 11న జనం ముందుకు రానుంది 'డ్రాగన్'. మరి ఈ సినిమాలో లూగర్ గా యన్టీఆర్ ఏ తీరున అలరిస్తారో చూడాలి.

ఇవి కూడా చదవండి:

Maa Inti Bangaram Movie Review: మా ఇంటి బంగారం మూవీ రివ్యూ

హాజరు కావాల్సిందే.. అల్లు అర్జున్‌కు నాంపల్లి కోర్టు సమన్లు

నా భర్త నుంచి ప్రాణహాని: నటుడి మొదటి భార్య

NBK111: కళ్లజోడు పెట్టిన కాజల్.. బాలయ్య మూవీలో లుక్ వచ్చేసింది