మోక్షజ్ఞ ఎంట్రీ.. బాలయ్య ప్లానింగ్ అదిరింది

నందమూరి అభిమానులు కొన్ని సంవత్సరాలుగా కళ్లు కాయలు కాచేలా ఎదురుచూస్తున్న క్షణం రానే వచ్చింది. నటసింహం నందమూరి బాలకృష్ణ తనయుడు మోక్షజ్ఞ ఎంట్రీపై ఎట్టకేలకు స్పష్టత వచ్చేసింది.

నందమూరి అభిమానులు కొన్ని సంవత్సరాలుగా కళ్లు కాయలు కాచేలా ఎదురుచూస్తున్న క్షణం రానే వచ్చింది. నటసింహం నందమూరి బాలకృష్ణ (Nandamuri Balakrishna) తనయుడు మోక్షజ్ఞ (Mokshagna) ఎంట్రీపై ఎట్టకేలకు స్పష్టత వచ్చేసింది. ఇప్పటికే వచ్చిన అధికారిక ప్రకటనతో ఇండస్ట్రీ వర్గాలతో పాటు అభిమానుల్లోనూ అంచనాలు ఆకాశాన్ని తాకాయి. బింబిసార, విశ్వంభర లాంటి భారీ సోషియో ఫాంటసీ డ్రామాలతో దర్శకుడిగా సత్తా చాటుకున్న వశిష్ఠ (Vassishta) ఈ ప్రాజెక్ట్‌ను తెరకెక్కిస్తుండటంతో సినిమా చుట్టూ ఎన్నో క్రేజీ చర్చలు మొదలయ్యాయి.

మోక్షజ్ఞను ఇండస్ట్రీకి పరిచయం చేయబోయేది ఒక రొటీన్ కమర్షియల్ మాస్ సినిమాతో కాదనే విషయం ఇప్పుడు ప్రధాన చర్చగా మారింది. ఈ చిత్రం పూర్తిస్థాయి సోషియో-ఫాంటసీ యాక్షన్ ఎంటర్‌టైనర్‌గా సిద్ధమవుతోందని విశ్వసనీయ వర్గాల సమాచారం. కథలో పునర్జన్మలు, మల్టీపుల్ టైమ్‌లైన్స్ వంటి ఆసక్తికర అంశాలు హైలైట్‌గా నిలవనున్నాయట. కేవలం ఎమోషన్స్, యాక్షన్ మాత్రమే కాకుండా భారీ విజువల్ ఎఫెక్ట్స్ (VFX) సినిమాను సరికొత్త స్థాయికి తీసుకెళ్లేలా ప్లాన్ చేస్తున్నారు. తొలి సినిమాతోనే ఒక కొత్త ప్రపంచాన్ని సృష్టించి, సరికొత్త కాన్సెప్ట్‌తో వెండితెరపై కనిపించబోతుండటం మోక్షజ్ఞ లైనప్‌కు ప్రధాన ఆకర్షణగా మారింది. ఈ ప్రాజెక్ట్‌పై వినిపిస్తోన్న మరో సెన్సేషనల్ అప్‌డేట్ ఏంటంటే.. ఇందులో నందమూరి బాలకృష్ణ స్వయంగా కనిపించనున్నారు. కేవలం వచ్చిపోయే గెస్ట్ అప్పియరెన్స్ లాంటిది కాకుండా, కథను కీలక మలుపు తిప్పే బలమైన పాత్రలో బాలకృష్ణ సుమారు 40 నిమిషాల పాటు తెరపై సందడి చేయనున్నారని సమాచారం. తండ్రీకొడుకులు ఇద్దరూ ఒకే ఫ్రేమ్‌లో కనిపిస్తే థియేటర్లలో పూనకాలు రావడం ఖాయం. కథాగమనాన్ని పూర్తిగా మార్చే అత్యంత ప్రభావవంతమైన సన్నివేశాల్లో బాలయ్య ఎంట్రీ ఉంటుందని, స్క్రీన్ ప్రెజెన్స్ సినిమాకు ప్రధాన బలంగా మారుతుందని ఇండస్ట్రీ టాక్.

మరోవైపు, మోక్షజ్ఞ – వశిష్ఠ కాంబినేషన్ అనౌన్స్ అవ్వగానే సోషల్ మీడియాలో భిన్నమైన అభిప్రాయాలు వ్యక్తమయ్యాయి. వశిష్ఠ ట్రాక్ రికార్డ్ చూస్తే ‘బింబిసార’ ఒక్కటే పూర్తిస్థాయి బ్లాక్‌బస్టర్. అటు ఆయన తాజా ప్రాజెక్ట్ ‘విశ్వంభర’కు సంబంధించి నడిచిన చర్చలు, విజువల్స్ పరంగా వచ్చిన రకరకాల కామెంట్స్ కారణంగా కొందరు ఫ్యాన్స్‌లో కాస్త సందిగ్ధత కనిపించింది. గత మూడున్నరేళ్లుగా విశ్వంభర సినిమాకు వర్క్‌ చేయడం, నందమూరి వారసుడి లాంచ్ కోసం స్టార్ మాస్ డైరెక్టర్లను కాకుండా వశిష్ఠను ఎందుకు ఎంచుకున్నారనే ప్రశ్నలు వచ్చాయి. అయితే, దీని వెనుక బాలకృష్ణ ఆలోచన చాలా స్పష్టంగా కనిపిస్తోంది. రొటీన్ తొడగొట్టే మాస్ క్యారెక్టర్లతో మోక్షజ్ఞను పరిచయం చేస్తే అంచనాల ఒత్తిడి ఎక్కువైపోతుంది. పైగా ప్రస్తుత ఆడియన్స్ కంటెంట్-ఓరియెంటెడ్, విజువల్ డ్రివెన్ సినిమాలకే ఎక్కువ ప్రాధాన్యం ఇస్తున్నారు. అందుకే, రొటీన్ రొడ్డకొట్టుడు కథల జోలికి వెళ్లకుండా, సోషియో-ఫాంటసీ కథలను డీల్ చేయడంలో ప్రతిభ నిరూపించుకున్న వశిష్ఠను ఎంచుకోవడం ఒక వ్యూహాత్మక అడుగు. కథపై పట్టు సాధించి, సాంకేతికంగా బలమైన కథనాన్ని సిద్ధం చేస్తే.. మోక్షజ్ఞ కెరీర్‌కు ఇది గ్రాండ్ లాంచ్‌గా మారడం ఖాయం. మరి ఈ భారీ కాన్సెప్ట్‌తో వెండితెరకు పరిచయమవుతున్న నందమూరి వారసుడు బాక్సాఫీస్ వద్ద ఎలాంటి ప్రభంజనం సృష్టిస్తాడో వేచి చూడాలి!

ఇవి కూడా చదవండి:

‘ది ప్యారడైజ్’ అడ్వాన్స్ బుకింగ్స్.. అసలు ఊహించలేదు కదా

మెగాస్టార్‌తో బుచ్చిబాబు.. నిర్మాణ సంస్థ కూడా రెడీ!

జనసైనికుడి కుటుంబానికి నాగబాబు ఓదార్పు