Tollywood: మహానటి తేదీనే శుభం అంటున్న సమంత
ABN , Publish Date - May 01 , 2025 | 12:15 PM
సమంత ఇప్పుడు నటి మాత్రమే కాదు నిర్మాత కూడా. ఆమె నిర్మించిన తొలి చిత్రం 'శుభం' మే 9న విడుదల కాబోతోంది. ఇది సమంతకు అచ్చివచ్చిన తేదీ కావడం విశేషం.
కొందరికి కొన్ని రిలీజ్ డేట్స్ భలే కలిసి వస్తాయి. స్టార్ హీరోయిన్ సమంత (Samantha) ఇప్పడంటే సినిమాలకు కొద్దిగా దూరంగా ఉంది కానీ ఆరోగ్యం బాగున్నప్పుడు యేడాది మూడు నాలుగు సినిమాల్లో నటించింది. అయితే నాగచైతన్య (Naga Chaitanya) తో విడాకులు తీసుకున్న తర్వాత... అనారోగ్యంతో బాధపడుతున్న సందర్భంలో ఆ వేగాన్ని తగ్గించింది. జాతీయ స్థాయిలో వెబ్ సీరిస్ లను చేస్తున్నా... సినిమాల మీద మాత్రం అంత ఫోకస్ పెట్టడం లేదు. పైగా సమంత నటించిన 'యశోద' (Yasoda), 'ఖుషీ (Khushi)' ఫర్వాలేదనిపించినా... 'శాకుంతలం' (Shakunthalam) నిరాశకు గురిచేసింది. అయితే... ఇప్పుడు సొంత నిర్మాణ సంస్థను స్థాపించి, తనకు నచ్చిన సినిమాలను, నచ్చిన వారితో నిర్మిస్తోంది సమంత. నిజానికి ఆమె హోమ్ బ్యానర్ లో 'మా ఇంటి బంగారం' (Maa Inti Bangaram) అనే సినిమాను సమంత ప్రకటించింది. అందులో తానే కీలక పాత్ర పోషిస్తున్నట్టు ఆ ప్రకటనలో తెలిపింది. అయితే ఉరుములు మెరుపులు లేకుండా ఆ మధ్య మరో సినిమాకు సమంత నే నిర్మాత అనే వార్త వెలువడింది. అదే 'శుభం' (Shubham).
టీవీ సీరియల్స్ నేపథ్యంలో తెరకెక్కిన హారర్ కామెడీ డ్రామా 'శుభం'. కొత్త, చిన్న నటీనటులు కీలక పాత్రలు పోషించిన ఈ మూవీని 'సినిమా బండి' (Cinema Bandi) ఫేమ్ ప్రవీణ్‌ కాండ్రేగుల డైరెక్ట్ చేస్తున్నారు. సెన్సార్ కార్యక్రమాలను సైతం పూర్తి చేసుకున్న 'శుభం' చిత్రం మే 9న విడుదల కాబోతోంది. విశేషం ఏమంటే... ఇదే తేదీన సమంత కీలక పాత్ర పోషించిన 'మహానటి' సినిమా విడుదలైంది. సమంత, విజయ్ దేవరకొండ జంటగా నటించిన ఈ సినిమాలో టైటిల్ పాత్రను కీర్తి సురేశ్‌ పోషించి, ఉత్తమ నటిగా జాతీయ అవార్డును అందుకుంది. అందులో సమంత నాయిక కాకపోయినా ఆమె పోషించిన జర్నలిస్ట్ పాత్ర మంచి పేరు తెచ్చిపెట్టింది. ఆ సినిమా విడుదలై చక్కని విజయాన్ని అందుకున్న మే 9వ తేదీనే సమంత నిర్మిస్తున్న మొట్టమొదటి సినిమా 'శుభం' వస్తుండటం విశేషం. మరి 'మహానటి' సెంటిమెంట్ కలిసొచ్చి... 'శుభం' మూవీ కూడా మంచి విజయాన్ని అందుకుంటుందేమో చూడాలి.
Also Read: Bhogi: భీమ్స్ ను తప్పించారా... తప్పుకున్నాడా...
మరిన్ని సినిమా వార్తల కోసం ఇక్కడ క్లిక్ చేయండి