కుల వివక్షపై సోషల్ థ్రిల్లర్.. వరుణ్ సందేశ్ కొత్త సినిమా టీజర్ రిలీజ్

వరుణ్ సందేశ్, గగన్ బాబు, సత్యం రాజేశ్ ప్రధాన పాత్రల్లో నటిస్తున్న ‘కాస్ట్’ సినిమా టీజర్ విడుదలైంది. కుల వివక్ష, వరుస హత్యల నేపథ్యంలో రూపొందిన ఈ సోషల్ థ్రిల్లర్ విశేషాలివే.

వరుణ్ సందేశ్ (Varun Sandesh), గగన్ బాబు (Gagan Vihari) , సత్యం రాజేశ్ (Satyam Rajesh), రవి ప్రధాన పాత్రల్లో నటిస్తున్న సోషల్ డ్రామా ‘కాస్ట్’ (CASTE) . ఏకే జంపన్న ( AK Jampanna) రచన, దర్శకత్వం వహిస్తున్న ఈ చిత్రాన్ని గోల్డెన్ ప్రొడక్షన్స్ బ్యానర్‌పై తోట లక్ష్మీ కోటేశ్వరరావు నిర్మిస్తున్నారు. కశిక కపూర్ (Kashika Kapoor), దివి వద్యా (Divi) కథానాయికలుగా నటిస్తున్నారు. ఇప్పటికే విడుదలైన ప్రమోషనల్ కంటెంట్‌తో ఆసక్తిని పెంచిన చిత్ర బృందం తాజాగా ఇంటెన్స్ అండ్ గ్రిప్పింగ్ టీజర్‌ను లాంచ్ చేసింది.

కుల వివక్ష అనే ప్రధాన ఇతివృత్తాన్ని పరిచయం చేస్తూ టీజర్ ప్రారంభమవుతుంది. అగ్రకులానికి చెందిన వారి ఇంట్లోకి తమకు ప్రవేశం లేదని ఓ తండ్రి తన కొడుకుకు చెప్పే సన్నివేశంతో కథలోని సామాజిక అంశాన్ని పరిచయం చేశారు. ఆ తర్వాత కుల వ్యవస్థను తీవ్రంగా వ్యతిరేకించే ఓ పోలీస్ అధికారి పాత్రను చూపించారు. గ్రామంలో వరుసగా జరిగే దారుణ హత్యలతో కథ మరింత ఉత్కంఠభరితంగా మారుతుంది. వరుణ్ సందేశ్, సత్యం రాజేశ్, నాగబాబు, రాజా రవీంద్ర, యాంకర్ రవి, దివి వద్యా పోషిస్తున్న కీలక పాత్రల తాలూకు గ్లింప్స్ టీజర్‌లో ఆకట్టుకున్నాయి.

దర్శకుడు ఏకే జంపన్న సున్నితమైన సామాజిక అంశాన్ని ఎంచుకుని, దానికి డ్రామా జోడిస్తూ ఆసక్తికరమైన సోషల్ థ్రిల్లర్‌గా తెరకెక్కించినట్లు టీజర్ చూస్తే అర్థమవుతోంది. కథను ముందుకు నడిపించడంలో ప్రతి పాత్రకూ ప్రాధాన్యం ఉన్నట్లు కనిపిస్తోంది.

వరుణ్ సందేశ్ తన ఇంటెన్స్ నటనతో ఆకట్టుకోగా, పోలీస్ అధికారి పాత్రలో గగన్ బాబు పవర్‌ఫుల్‌గా కనిపిస్తున్నారు. సత్యం రాజేశ్ తన పాత్రతో ఆసక్తిని పెంచారు. దివి వద్యా విభిన్నమైన పాత్రలో కనిపిస్తూ సర్‌ప్రైజ్ చేశారు. వీకే రామరాజు సినిమాటోగ్రఫీ, అనూప్ రూబెన్స్ సంగీతం ఈ చిత్రానికి ప్రధాన ఆకర్షణలుగా నిలవనున్నాయి. అవినాష్ జీ ఎడిటర్‌గా పనిచేస్తున్నారు. విడుదలకు సిద్ధమవుతున్న ‘కాస్ట్’ టీజర్ సినిమాపై మరింత ఆసక్తిని పెంచింది.