నేను యాక్టర్ అయినప్పటి నుంచి ఉన్న డ్రీమ్ ఇది - సత్యదేవ్

నేను యాక్టర్ అయినప్పటి నుంచి నాకు ఉన్న డ్రీమ్ ఇది. నా డ్రీమ్ ‘రావు బహదూర్’ (Rao Bahadur)తో నెరవేరిందని అన్నారు వెర్సటైల్ యాక్టర్ సత్యదేవ్ (Satyadev). దర్శకుడు వెంకటేష్ మహా (Venkatesh Maha) దర్శకత్వంలో ఆయన నటించిన సైకాలజికల్ థ్రిల్లర్ ‘రావు బహదూర్’. సూపర్‌స్టార్ మహేష్ బాబు, నమ్రతా శిరోద్కర్‌ల జిఎంబి ఎంటర్‌టైన్‌మెంట్‌ (GMB Entertainment) సగర్వంగా సమర్పిస్తున్న ఈ చిత్రాన్ని ఏ+ఎస్ మూవీస్, శ్రీచక్రాస్ ఎంటర్‌టైన్‌మెంట్స్ బ్యానర్స్ పై చింతా గోపాలకృష్ణ రెడ్డి, అనురాగ్ రెడ్డి అండ్ శరత్ చంద్ర నిర్మించారు. ఇప్పటికే విడుదలైన ప్రమోషనల్ కంటెంట్ సినిమాపై అంచనాలు పెంచాయి. జూలై 3న ప్రపంచవ్యాప్తంగా థియేటర్లలోకి వచ్చేందుకు సిద్ధమైన ఈ మూవీ విశేషాలను హీరో సత్యదేవ్ మీడియాకు తెలియజేశారు.

ఈ సందర్భంగా ఆయన మాట్లాడుతూ.. ‘రావు బహదూర్’పై మా టీమ్ అంతా చాలా కాన్ఫిడెంట్‌గా ఉన్నాం. అందుకు కారణం సినిమా చూసిన తర్వాత వచ్చిన నమ్మకమే. మేము సినిమా మొదలుపెట్టినప్పుడు ‘మునుపెన్నడూ చూడని విధంగా తెలుగు సినిమా’ అనే ట్యాగ్‌లైన్‌ను అనుకున్నాం. మహేష్ బాబు ఈ సినిమా చూసిన తర్వాత కూడా అదే ట్యాగ్‌లైన్ చెప్పారు. ఇప్పటివరకు సినిమా చూసిన ఫిలిం మేకర్స్ కూడా అదే చెబుతున్నారు. ఇదంతా మాకు సినిమా చూసిన తర్వాత వచ్చిన నమ్మకమే. ఇది కంప్లీట్ సైకాలజికల్ డ్రామా. మ్యాజికల్ రియలిజం, డార్క్ కామెడీ సబ్‌జానర్స్‌గా ఉంటాయి. ఏదైనా మెటాఫర్‌ను విజువల్‌గా చేసి చూపించడం మ్యాజికల్ రియలిజం. కాకపోతే, కొన్నిసార్లు ఇది హారర్‌లా అనిపించవచ్చు.

సినిమా చేసే ముందే మామూలుగా చేసే సినిమాల కంటే 300 శాతం ఎక్కువగా ఈ సినిమాకు కష్టపడాలని తెలుసు. అలాగే ఇది హెవీ మేకప్ సినిమా అని కూడా తెలుసు. కమల్ హాసన్, సూర్య, విక్రమ్.. వంటి వారు ఇలాంటి హెవీ మేకప్ సినిమాలు ప్రయత్నిస్తుంటారు. వారిని, వారు చేసే సినిమాలను చూస్తున్నప్పుడు నేను కూడా ఎప్పుడైనా అలాంటి సినిమా చేయాలని అనుకునేవాడిని. నేను యాక్టర్ అయినప్పటి నుంచి.. నిజంగా ఇది నా డ్రీమ్. నా డ్రీమ్ ‘రావు బహదూర్’తో నెరవేరింది. మనం కోరుకున్నది మనకు వచ్చినప్పుడు కచ్చితంగా ఆనందంగా ఉంటుంది. ఇలాంటి సినిమాకు మేకప్ కంటే మైండ్ మేకప్ చాలా ఇంపార్టెంట్. ఈ సినిమాకు అలాంటి మైండ్ మేకప్ చాలా చేశాను. ప్రతిరోజూ వెళ్లి 16 గంటలు పని చేయాలని ముందే నిర్ణయించుకునేవాడిని. అలా ప్రతిరోజూ హ్యాపీగా వెళ్లి, ఎంజాయ్ చేస్తూ చేసిన సినిమా ఇది. నా క్యారెక్టర్‌కు మేకప్ వేయడానికి ఐదు గంటలు పట్టేది, తీయడానికి గంటన్నర పట్టేది. ఇలాంటి పాత్రలు చేయడానికి చాలా సహనం కావాలి. ఈ సినిమా చేసిన తర్వాత నాకు కూడా చాలా సహనం ఉందని అర్థమైందని సత్యదేవ్ చెప్పుకొచ్చారు.

ఇవి కూడా చదవండి:

దర్శకుడు మెహర్ రమేష్ కుమార్తె పెళ్లిలో చిరు, వెంకీ, పవన్ సందడి

‘జాంబి రెడ్డి 2’ ఫస్ట్ షెడ్యూల్ పూర్తి.. దర్శకుడెవరో తెలుసా?

వెంకీ కోసం చేసిన పాటలు.. ఉదయ్ కిరణ్ సినిమాకు వాడేశారు