డిసెంబర్ 11న థియేటర్లలోకి.. 'రాయవలస'

దసరా సందర్భంగా ‘రాయవలస’ సినిమా రిలీజ్ డేట్ ప్రకటించారు. కార్తీక్ జయంతి, శ్రీషా నులు ప్రధాన పాత్రల్లో నటించిన ఈ గ్రామీణ నేపథ్య చిత్రం డిసెంబర్ 11న థియేటర్లలోకి రానుంది. ఇప్పటికే ‘రింగుడు రింగుడు’ పాట మిలియన్‌కు పైగా వ్యూస్ సాధించింది.

కొత్త హీరో కార్తీక్ జయంతి టాలీవుడ్ ఎంట్రీకి రంగం సిద్ధమైంది. ఆయన కథానాయకుడిగా నటిస్తున్న గ్రామీణ నేపథ్య చిత్రం ‘రాయవలస’ విడుదల తేదీ ఖరారైంది. దసరా పండుగ సందర్భంగా ప్రత్యేక పోస్టర్‌ను విడుదల చేసిన చిత్ర బృందం.. డిసెంబర్ 11న సినిమాను ప్రేక్షకుల ముందుకు తీసుకురానున్నట్లు ప్రకటించింది. ఇప్పటికే పోస్టర్లు, గ్లింప్స్, టీజర్‌తో ఆసక్తి పెంచిన ఈ సినిమా.. ‘రింగుడు రింగుడు’ పాటకు యూట్యూబ్‌లో మిలియన్‌కు పైగా వ్యూస్ రావడంతో వార్తల్లో నిలిచింది.

దసరా పోస్టర్‌లో ఇంటెన్స్ లుక్

‘రాయవలస’ రిలీజ్ డేట్‌ను వెల్లడిస్తూ విడుదల చేసిన పోస్టర్ ఆకట్టుకుంటోంది. ఇందులో హీరో కార్తీక్ జయంతి సీరియస్ లుక్‌తో కనిపిస్తుండగా.. వెనుక అమ్మవారి ప్రతిరూపం కథపై ఆసక్తిని పెంచుతోంది. గ్రామీణ వాతావరణం, భావోద్వేగాలు, వాస్తవ సంఘటనల స్ఫూర్తితో రూపొందిన ఈ చిత్రం ప్రేక్షకులకు ఎలాంటి అనుభూతిని అందిస్తుందో చూడాలి.

రాధిక జయంతి దర్శకత్వంలో గ్రామీణ కథ

రేసన్ ప్రొడక్షన్స్ బ్యానర్‌పై గోపీ కృష్ణ జె నిర్మిస్తున్న ఈ చిత్రానికి ఎన్నారై దర్శకురాలు రాధిక జయంతి దర్శకత్వం వహిస్తున్నారు. కార్తీక్ జయంతి, శ్రీషా నులు ప్రధాన పాత్రల్లో నటిస్తున్నారు. అమెరికా నుంచి వచ్చి తెలుగు చిత్ర పరిశ్రమలో హీరోగా అడుగుపెడుతున్న కార్తీక్‌కు ‘రాయవలస’ తొలి సినిమా. ఇందులో శ్రీషా నులు ‘రాణి’ పాత్రలో కనిపించనున్నారు. సహజమైన నటనతో ఈ పాత్రకు ప్రత్యేకత తీసుకొచ్చినట్లు చిత్ర బృందం తెలిపింది. ఈ సినిమాను నటీనటులు, సాంకేతిక బృందం కలిసి ఒకే షెడ్యూల్‌లో పూర్తి చేయడం విశేషం.

సంగీతం నుంచి సినిమాటోగ్రఫీ వరకు

‘రాయవలస’కు అర్జున్ బాల సంగీతాన్ని అందించారు. పూర్ణాచారి, కార్తీక్ జయంతి, తరుణ్ సైదుల్ పాటలు రాశారు. రాహుల్ సిప్లిగంజ్, ధనుంజయ్, రోహిత్ పరిటాల, రమ్య బెహరా, సాహితి చాగంటి, సౌజన్య భగవతుల, వాగ్దేవి, అర్జున్, కార్తీక్ జయంతి గాత్రం అందించారు. వి.ఆర్.కె. నాయుడు (కిట్టు) సినిమాటోగ్రాఫర్‌గా, గ్యారీ బీహెచ్ ఎడిటర్‌గా పనిచేశారు.

ఇప్పటికే పాటలు, ప్రచార చిత్రాలతో ప్రేక్షకుల్లో ఆసక్తిని పెంచిన ‘రాయవలస’ డిసెంబర్ 11న థియేటర్లలోకి రానుంది. కొత్త హీరో కార్తీక్ జయంతికి ఈ సినిమా ఎలాంటి గుర్తింపును తీసుకొస్తుందో వేచి చూడాలి.