శ్రీకృష్ణుడిగా.. రామ్ చరణ్!

గుజరాతీ ఇండస్ట్రీలో సంచలనం సృష్టించిన ‘లాలో’ తెలుగు రీమేక్‌పై ఆసక్తికర వార్తలు వినిపిస్తున్నాయి.

గుజరాతీ చిత్రసీమలో (Gujarati Cinema) సంచలన విజయాన్ని అందుకున్న ఆల్‌టైమ్ బ్లాక్‌బస్టర్ ‘లాలో: కృష్ణ సదా సహాయతే’ (Laalo: Krishna Sada Sahaayate) ఇప్పుడు తెలుగు ప్రేక్షకుల ముందుకు రీమేక్ రూపంలో రానుందనే వార్తలు సినీ వర్గాల్లో హాల్ చ‌ల్ చేస్తున్నాయి. ముఖ్యంగా ఈ ప్రాజెక్ట్‌లో గ్లోబల్ స్టార్ రామ్ చరణ్ శ్రీకృష్ణుడి పాత్రలో కనిపించనున్నారనే ప్రచారం అభిమానుల్లో భారీ ఆసక్తిని రేకెత్తిస్తోంది. కేవలం రూ.50 లక్షల బడ్జెట్‌తో తెరకెక్కిన ‘లాలో’ బాక్సాఫీస్ వద్ద అద్భుత విజయాన్ని నమోదు చేసింది. ప్రపంచవ్యాప్తంగా రూ.120 కోట్లకు పైగా వసూళ్లు సాధించి, రూ.100 కోట్ల క్లబ్‌లో చేరిన తొలి గుజరాతీ చిత్రంగా రికార్డు సృష్టించింది. ఆధ్యాత్మికత, ఎమోష‌న్‌, కామెడీ కలగలిపి రూపొందించిన ఈ చిత్రం ప్రేక్ష‌కుల‌ను థియేట‌ర్ల‌కు ప‌రుగులు పెట్టించింది.

ఈ నేప‌థ్యంలోనే.. ఈ సినిమా సాధించిన ఘన విజయంతో తెలుగు సహా ఇతర భాషల నిర్మాతల దృష్టి ఇప్పుడు ఈ చిత్రంపై పడినట్లు తెలుస్తోంది. ప్రస్తుతం తెలుగు రీమేక్ హక్కుల కోసం చర్చలు జరుగుతున్నాయని సమాచారం. కథలోని అంశాలు తెలుగు ప్రేక్షకులకు కూడా బాగా కనెక్ట్ అవుతాయని, ఇక్క‌డి వారికి చాలా ద‌గ్గ‌ర‌గా ఉంటుంద‌ని సినీ విశ్లేషకులు భావిస్తున్నారు. ఇదిలాఉంటే.. ఈ రీమేక్‌కు ప్రముఖ త‌మిళ దర్శకుడు కార్తీక్ సుబ్బరాజ్ (Karthik Subbaraj) ద‌ర్శ‌క‌త్వం వ‌హించే అవకాశాలు ఉన్నాయని టాక్ వినిపిస్తోంది. డిఫ‌రెంట్ స్క్రీన్ ప్లేతో, కథలను తనదైన శైలిలో విభిన్నంగా చెప్పడంలో త‌న‌కంటూ ప్ర‌త్యేక బ్రాండ్ సంపాదించుకున్న‌ ఆయన, ‘లాలో’ కథను తెలుగు ప్రేక్షకుల అభిరుచికి తగ్గట్టుగా మరింత భారీ స్థాయిలో ఆవిష్కరించే అవకాశం ఉందని అంటున్నారు.

కృష్ణుడి పాత్రలో రామ్ చరణ్?

అయితే.. ఈ ప్రాజెక్ట్‌కు సంబంధించి అత్యంత ఆసక్తికరమైన అంశం ఏంటంటే అది రామ్ చరణ్ (Ram Charan) పేరు వినిపించడం. ఈ సినిమా ప్ర‌ధానంగా శ్రీకృష్ణుడి పాత్ర‌ చుట్టూ సాగే క‌థ‌ కావ‌డంతో ఈ పాత్ర చ‌ర‌ణ్‌కు ఫ‌ర్‌ఫెక్ట్‌గా సెట్ అవుతుంద‌ని ఆయనను సంప్రదించినట్లు ప్రచారం జరుగుతోంది. ప్రస్తుతం ఈ ప్రాజెక్ట్‌కు సంబంధించిన వార్తలు సోషల్ మీడియాలో వైరల్ అవుతున్నప్పటికీ, నిర్మాతలు లేదా నటీనటుల నుంచి ఎలాంటి అధికారిక ప్రకటన వెలువడలేదు. అయితే ఈ న్యూస్‌ నిజమైతే మాత్రం తెలుగు సినీ పరిశ్రమలో ఇది అత్యంత క్రేజీ ప్రాజెక్ట్‌లలో ఒకటిగా నిలిచే అవకాశముంది. ఇటీవ‌ల డివైన్ కాన్సెప్ట్‌తో వ‌స్తున్న సినిమాలు అధిక శాతం విజ‌యం సాధిస్తుండ‌డంతో ఈ చిత్రంలోని క‌థ యూనివ‌ర్స‌ల్ స‌బ్జెక్ట్ కావ‌డంతో రామ్‌ చరణ్ న‌టిస్తే సినిమా ఇంకా చాలామందికి రీచ్ అవుతుంద‌ని మేక‌ర్స్ అంచ‌నాలు వేస్తున్నారు. కాగా క‌థ‌లో మెయిన్ క్యారెక్ట‌ర్ కోసం స‌త్య‌దేవ్ లాంటి న‌టుడిని సంప్ర‌దిస్తున్న‌ట్లు తెలుస్తోంది.

క‌థ ఇదే..

అప్ప‌టికే పెళ్లై ఐదేండ్ల వ‌య‌సు కూతురు ఉన్న ఓ యువ‌కుడు ఆటో న‌డుపుతూ ఫ్యామిలీని పోషిస్తుంటాడు. అయితే తాగుబోతైన ఆ యువ‌కుడు ఓ రోజు భార్య‌తో గొడ‌వ ప‌డి ఆటోతో లాంగ్ డ్రైవ్‌కి వెళ్లి ఓ ఇంట్లో చిక్కుకు పోతాడు. అక్క‌డి నుంచి బ‌య‌ట ప‌డే మార్గం లేక‌, మాట్లాడే తోడు లేక ఒక్క‌డే విల‌విల లాడిపోతుంటాడు. ఇదే స‌మ‌యంలో ఓ కొత్త వ్య‌క్తి వ‌చ్చి అత‌నికి సాయం చేసే ప్ర‌య‌త్నం చేస్తాడు. ఈ క్ర‌మంలో వారిరువురితో పాటు అత‌ని చుట్టూ స‌మాజంలోని మ‌న‌షుల మ‌ధ్య జ‌రిగే సంఘ‌ర్ష‌ణ, ఎమోష‌న‌ల్‌, డివైన్ రైడ్‌ ఈ సినిమా. ఇదిలాఉంటే.. గ‌తంలో గోపాల గోపాల సినిమాలో ప‌వ‌న్ క‌ల్యాణ్ కృష్ణుడిగా న‌టించి మెప్పించ‌గా ఇప్పుడు రామ్ చ‌ర‌ణ్ వ‌ద్ద‌కు అదే త‌ర‌హా పాత్ర రావ‌డం మెగా ఫ్యాన్స్‌ను ఉబ్బి త‌బ్బిబ‌య్యేలా చేస్తోంది.