వార‌ణాసి ఓకే.. వాట్ నెక్ట్స్! మ‌హేశ్ బాబు ప‌య‌నమెటు.. ఎవ‌రితో?

టాలీవుడ్ వర్గాల నుంచి అందుతున్న లేటెస్ట్ అప్‌డేట్ ప్రకారం, ఈ ఏడాది అక్టోబర్‌ కల్లా మహేష్ బాబు ‘వారణాసి’ షూటింగ్ నుంచి పూర్తిగా రిలీవ్ కానున్నారు.

సూపర్‌స్టార్ మహేష్ బాబు (Mahesh Babu), ఎస్.ఎస్. రాజమౌళి (SS Rajamouli) దర్శకత్వంలో తెరకెక్కుతున్న ప్రతిష్టాత్మక చిత్రం ‘వారణాసి’ (Varanasi). ఈ చిత్రం కోసం మహేష్‌ ఎన్నడూ లేని విధంగా కష్టపడుతూ తన పూర్తి సమయాన్ని కేటాయించారు. ప్రస్తుతం మహేష్ దృష్టంతా వారణాసి మీద తప్ప, మరో సినిమా గురించి లేదు. ఈ సినిమా కోసం ఏకంగా మూడేళ్ల పాటు ఎలాంటి కొత్త కమిట్‌మెంట్స్‌ లేకుండా కేవలం ఈ ఒక్క ప్రాజెక్ట్‌పైనే మహేష్‌ పూర్తిగా దృష్టి పెట్టారు. ఇండియన్ సినిమా చరిత్రలోనే మైలురాయిగా నిలవబోయే ఈ ప్రాజెక్ట్ కోసం మహేష్ పడుతున్న శ్రమ, ఆయన ఇస్తున్న కమిట్‌మెంట్ అభిమానుల్లో అంచనాలను తారాస్థాయికి చేర్చాయి. అయితే టాలీవుడ్ వర్గాల నుంచి అందుతున్న లేటెస్ట్ అప్‌డేట్ ప్రకారం, ఈ ఏడాది అక్టోబర్‌ కల్లా మహేష్ బాబు ఈ చిత్రం షూటింగ్ నుండి పూర్తిగా రిలీవ్ కానున్నారు.

2027 ఫిబ్రవరి నుంచి ‘వారణాసి’ సినిమా ప్రమోషన్స్ అధికారికంగా ప్రారంభమయ్యే వరకు మహేష్ బాబుకు మధ్యలో భారీగా సమయం లభిస్తోంది. ఈ గ్యాప్‌ను సద్వినియోగం చేసుకోవాలని ఆయన భావిస్తున్నారు. ఈ నేపథ్యంలో బ్యాక్-టు-బ్యాక్ రెండు కొత్త ప్రాజెక్ట్‌లను పట్టాలెక్కించాలని ప్లాన్ చేస్తున్నారు. టాలీవుడ్ ప్రముఖ నిర్మాణ సంస్థలైన మైత్రీ మూవీ మేకర్స్, ఏషియన్ సునీల్, దిల్ రాజు, కేవీఎన్ ప్రొడక్షన్స్, అలాగే పాన్-ఇండియా రేంజ్‌లో దూసుకెళ్తున్న హోంబలే ఫిలింస్ వంటి దిగ్గజ సంస్థల అధినేతలు ఇప్పటికే మహేష్‌ను కలిసి కథలు చర్చించారు.

అయితే భారీ నిర్మాణ సంస్థల నుంచి ఆఫర్లు క్యూ కట్టినప్పటికీ, ఏ ఒక్క ప్రాజెక్ట్ కూడా ఇప్పటివరకు పూర్తిగా ఫైనల్ కాలేదు. మహేష్ బాబు తన నెక్స్ట్ లైనప్ కోసం ఏ మార్గాన్ని ఎంచుకోవాలనే దానిపై తీవ్రమైన ఆలోచనలో ఉన్నారు. ఓవైపు తెలుగు దర్శకుడితో స్ట్రైట్ కమర్షియల్ సినిమా చేయాలా, లేక పాన్-ఇండియన్ స్థాయికి తగ్గట్టుగా భారీ విజన్ ఉన్న డైరెక్టర్‌తో వెళ్లాలా అనే సంధిగ్దత కొనసాగుతోంది. ఇండస్ట్రీలో కొందరు ప్రముఖ స్టార్ డైరెక్టర్ల పేర్లు బలంగా వినిపిస్తున్నప్పటికీ, వారంతా ప్రస్తుతం వేర్వేరు భారీ ప్రాజెక్ట్‌లతో బిజీగా ఉన్నారు. దీంతో సరైన కథ, పర్‌ఫెక్ట్ కాంబినేషన్ సెట్ చేయడంపైనే ఇప్పుడు ప్రధానంగా చర్చలు జరుగుతున్నాయి.

రాజమౌళి సినిమా తర్వాత మహేష్ బాబు చేయబోయే సినిమాలపై ప్రేక్షకుల్లో, ట్రేడ్ వర్గాలలో విపరీతమైన ఆసక్తి నెలకొంది. త్వరలోనే ఈ కన్ఫ్యూషన్ అంతా వీడి, మహేష్ బాబు తన తదుపరి చిత్రాలపై పూర్తి స్పష్టత ఇవ్వనున్నారు. బాక్సాఫీస్ వద్ద మరోసారి సరికొత్త రికార్డులు సృష్టించేందుకు సిద్ధమవుతున్న ఈ సూపర్ స్టార్ నెక్స్ట్ స్టెప్స్ ఎలా ఉండబోతున్నాయనేది ప్రస్తుతం సినీ వర్గాల్లో హాట్ టాపిక్‌గా మారింది.