హుషార్‌ పిట్టలు.. కొన్ని చోట్ల కేకలు పెట్టిస్తుంది

ఆగస్టు 15న విడుదల కానున్న 'హుషార్ పిట్టలు' చిత్ర ట్రైలర్ ఆగస్టు 10న విడుదల కానుంది.

యువతను ఆకట్టుకునే అంశాలతో పాటు బలమైన భావోద్వేగాలను మేళవించి రూపొందిన 'హుషార్ పిట్టలు' చిత్రం ఆగస్టు 15న ప్రేక్షకుల ముందుకు రానుంది. అన్షు, వాసవి గణేషన్ జంటగా నటించిన ఈ చిత్రానికి బిక్షు దర్శకత్వం వహించగా, వెంకట్ యాదవ్ నిర్మించారు. చిత్రీకరణ పూర్తిచేసుకున్న ఈ సినిమాను ఏషియన్ సురేష్ ఫిలింస్ థియేటర్లలో విడుదల చేయనుంది. ఇప్పటికే విడుదలైన టీజర్, తాజాగా వచ్చిన పాటలకు మంచి స్పందన లభించగా, ఆగస్టు 10న ట్రైలర్‌ను విడుదల చేయనున్నట్లు చిత్రబృందం ప్రకటించింది.

ట్రైలర్ విడుదల నేపథ్యంలో నిర్వహించిన మీడియా సమావేశంలో దర్శకుడు బిక్షు మాట్లాడుతూ, సినిమా విడుదలకు ముందే బుక్‌మైషోలో అడ్వాన్స్ బుకింగ్స్ ప్రారంభించడం ఆనందంగా ఉందన్నారు. ప్రేక్షకులు ఒకసారి సినిమా చూస్తే మరొకరికి తప్పకుండా సిఫారసు చేసేంత బలమైన కథతో ఈ చిత్రం రూపొందిందని తెలిపారు. ట్రైలర్ విడుదల తర్వాత సినిమాపై ఉన్న అభిప్రాయం మరింత మారుతుందని, ఈ చిత్రం తన కెరీర్‌లో ప్రత్యేక మైలురాయిగా నిలుస్తుందనే నమ్మకం వ్యక్తం చేశారు.

ప్రముఖ నిర్మాత బెక్కెం వేణుగోపాల్ మాట్లాడుతూ, సినిమా చూసిన తర్వాత ఇది విజయాన్ని అందుకుంటుందనే విశ్వాసం తనకు కలిగిందన్నారు. యూత్‌ను మాత్రమే కాదు, కుటుంబ ప్రేక్షకులను కూడా ఆకట్టుకునేలా కమర్షియల్ అంశాలతో పాటు మంచి సందేశాన్ని దర్శకుడు చక్కగా మిళితం చేశారని ప్రశంసించారు. ముఖ్యంగా క్లైమాక్స్ ప్రేక్షకుల హృదయాలను తాకేలా ఉంటుందని చెప్పారు.సంగీత దర్శకుడు చరణ్ అర్జున్ మాట్లాడుతూ, ఈ చిత్రం తన కెరీర్‌లో కీలక మలుపు అవుతుందనే ఆశాభావం వ్యక్తం చేశారు. పాటలకు వస్తున్న స్పందన ఎంతో ఆనందాన్ని ఇస్తోందని, సినిమాలోని భావోద్వేగాలు ప్రేక్షకులను బలంగా కదిలిస్తాయని అన్నారు. ఈ సినిమా ద్వారా తన సంగీతానికి మరింత గుర్తింపు లభిస్తుందనే నమ్మకం ఉందన్నారు.

నిర్మాత వెంకట్ యాదవ్ మాట్లాడుతూ, టీజర్, పాటలకు ప్రేక్షకుల నుంచి వచ్చిన స్పందన తమకు మరింత ధైర్యాన్ని ఇచ్చిందన్నారు. ట్రైలర్‌లో సినిమా అసలు బలం ఏమిటో ప్రేక్షకులకు చూపించబోతున్నామని, థియేటర్‌కు వచ్చే ప్రతి ఒక్కరూ పూర్తి సంతృప్తితో బయటకు వస్తారనే నమ్మకం వ్యక్తం చేశారు. హీరో అన్షు మాట్లాడుతూ, టీజర్, పాటలపై వచ్చిన స్పందన తమలో మరింత ఆత్మవిశ్వాసాన్ని పెంచిందన్నారు. సినిమా విడుదల తర్వాత ప్రేక్షకుల అభిప్రాయం పూర్తిగా మారుతుందని, ఆగస్టు 15న థియేటర్లలో తమ చిత్రాన్ని ఆదరించాలని కోరారు.

హీరోయిన్ వాసవి గణేషన్ మాట్లాడుతూ, ఈ చిత్రం వినోదంతో పాటు హృదయాన్ని తాకే భావోద్వేగాలను కూడా అందిస్తుందని తెలిపారు. నవ్వులు, భావోద్వేగాలు, కుటుంబ అనుబంధాలతో ప్రేక్షకులను కట్టిపడేసే సినిమా ఇదని, థియేటర్ నుంచి బయటకు వెళ్లే సమయానికి ప్రతి ఒక్కరి మనసును తాకుతుందని చెప్పారు. ఈ కార్యక్రమంలో గీత రచయిత చిరంజీన్, సినిమాటోగ్రాఫర్ రుద్రసాయి, నటులు గోవర్థన్, భాను, నవీన్ తదితరులు పాల్గొని చిత్ర విజయంపై తమ ఆశాభావాన్ని వ్యక్తం చేశారు.