చిరంజీవి అమెరికా టూర్.. ‘కాకా’ ఫస్ట్ సాంగ్‌పై థమన్ అదిరిపోయే అప్‌డేట్!

మెగాస్టార్ చిరంజీవి, డైరెక్టర్ బాబీ కొల్లి కాంబినేషన్‌లో వస్తున్న ‘కాకా’ సినిమా ఫస్ట్ సాంగ్ డిసెంబర్‌లో విడుదల కానుంది.

వాల్తేరు వీరయ్య వంటి హిట్ తర్వాత మెగాస్టార్ చిరంజీవి (Chiranjeevi), డైరెక్టర్ బాబీ కొల్లి (bobby kolli) కాంబినేషన్‌లో వస్తున్న మూవీ ‘కాకా’. బాక్సాఫీస్ వద్ద భారీ అంచనాలు నెలకొల్పుకున్న ఈ సినిమా షూటింగ్ ప్రస్తుతం శరవేగంగా జరుగుతోంది. కేవీఎన్ ప్రొడక్షన్స్‌పై వెంకట్ కె. నారాయణ ఈ చిత్రాన్ని నిర్మిస్తుండగా.. వచ్చే ఏడాది జనవరి 13న సినిమా విడుదల కానుంది. దీంతో అనుకున్న సమయానికి చిత్రీకరణ పూర్తి చేసి, ప్రేక్షకులను అలరించేందుకు చిత్ర యూనిట్ వేగంగా అడుగులు వేస్తోంది. ఈ తరుణంలో సంగీత దర్శకుడు ఎస్. థమన్ (Thaman S) సోషల్ మీడియా వేదికగా పంచుకున్న ఒక ఆసక్తికర పోస్ట్ ఇప్పుడు మెగా అభిమానుల్లో కొత్త జోష్ నింపింది.

మెగాస్టార్ చిరంజీవితో కలిసి దిగిన ఒక మోనోక్రోమ్ ఫోటోను తమన్ షేర్ చేస్తూ.. సినిమా ప్రమోషన్స్‌కు సంబంధించి కొన్ని ఇంట్రెస్టింగ్ విషయాలు పంచుకున్నారు. డిసెంబర్‌లో ఈ సినిమాలోని మొదటి పాట విడుదల కానుందని, ఆ సమయంలో చిరంజీవి అమెరికాలో ఉండబోతున్నారని థమన్ తెలిపారు. దీంతో మెగాస్టార్ యూఎస్ టూర్ వార్త నెట్టింట వైరల్ అవుతోంది. చిరంజీవి అమెరికాకు ఎందుకు వెళ్తున్నారు? పాట విడుదల కార్యక్రమం అక్కడ ఎలా జరగబోతోంది? అభిమానులతో ఆయన ప్రత్యేకంగా సమావేశం అవుతారా? అనే ప్రశ్నలపై ప్రస్తుతం జోరుగా చర్చ సాగుతోంది. దీనికి సంబంధించిన అధికారిక తేదీలు త్వరలోనే వెలువడే అవకాశం ఉంది.

ఇక తమన్ ఈ సినిమాకి అదిరిపోయే రేంజ్‌లో సంగీతం అందించినట్లు తెలుస్తోంది. అయితే, మొదటి పాటే డిసెంబర్‌లో విడుదలవుతుందంటే.. అనుకున్నట్లుగానే జనవరిలో సినిమా వస్తుందా? లేక సినిమా విడుదల వాయిదా పడుతుందా? అనే చిన్నపాటి అనుమానాలు కూడా మెగా అభిమానుల్లో వ్యక్తమవుతున్నాయి. కానీ, చిత్ర బృందం మాత్రం పక్కా ప్రణాళికతో ముందుకు వెళ్తోందట. ముందుగా ప్రకటించినట్లుగానే వచ్చే ఏడాది జనవరి 13న సంక్రాంతి కానుకగా 'కాకా'ను ప్రేక్షకుల ముందుకు తీసుకురావడానికి సన్నాహాలు చేస్తున్నారు. ఫస్ట్ సింగిల్ రిలీజ్ వేళ ఈ విడుదల తేదీపై మరింత స్పష్టత వచ్చే అవకాశం ఉంది.

ఈ చిత్రంలో మెగాస్టార్ చిరంజీవి కూతురిగా యంగ్ అండ్ టాలెంటెడ్ నటి అనస్వర రాజన్ (anaswara rajan) నటిస్తుండగా.. బాలీవుడ్ ప్రముఖ దర్శకుడు, నటుడు అనురాగ్ కశ్యప్, అలాగే నివేదా పేతురాజ్ కీలక పాత్రల్లో అలరించనున్నారు. గతంలో ‘వాల్తేరు వీరయ్య’ సినిమాలో చిరంజీవి మాస్ బాడీ లాంగ్వేజ్‌ను, ఎనర్జీని పర్‌ఫెక్ట్‌గా ఎలివేట్ చేసిన బాబీ.. ఈసారి ‘కాకా’తో ఎలాంటి సరికొత్త కథను తెరకెక్కించబోతున్నారనేది సర్వత్రా ఆసక్తి రేకెత్తిస్తోంది. ఇక డిసెంబర్‌లో రాబోయే ఫస్ట్ సాంగ్‌తో ప్రమోషన్స్‌ను పీక్స్‌కి తీసుకెళ్లాలని చిత్ర యూనిట్ చూస్తోంది. మరి మెగాస్టార్ చిరంజీవి, బాబీల ఈ మ్యాజికల్ కాంబినేషన్ బాక్సాఫీస్ వద్ద ఎలాంటి రికార్డులు సృష్టిస్తుంది.. ఈ సంక్రాంతికి మెగా రచ్చ ఏ స్థాయిలో ఉండబోతుందో తెలియాలంటే జనవరి వరకు ఆగాల్సిందే.