కార్తీక్ సుబ్బరాజ్ బ్యానర్లో సినిమా చేస్తున్నా
ABN, Publish Date - Feb 17 , 2026 | 10:18 PM
సుహాస్, శివానీ నగరం జంటగా నటించిన చిత్రం 'హే బల్వంత్' శుక్రవారం ప్రేక్షకుల ఎదుటకు రానుంది.
ఇటీవల లిటిల్హార్ట్స్, రాజు వెడ్స్ రాంబాయి, ఈషా వంటి బ్లాక్బస్టర్స్ చిత్రాలను అందించిన బన్నీవాస్, వంశీ నందిపాటి సక్సెస్ఫుల్ ద్వయం తాజాగా నందిపాటి ఎంటర్ టైన్ మెంట్స్, బన్నీ వాస్ వర్క్స్ బ్యానర్స్ పై ‘హే బల్వంత్' (హే భగవాన్ చిత్రం టైటిల్ మార్పు) అనే ఫుల్లెంగ్త్ అవుట్ అండ్ అవుట్ ఎంటర్టైనర్ను ప్రేక్షకుల ముందుకు తీసుకు వస్తున్నారు. ఈ చిత్రంలో సుహాస్, శివానీ నగరం, సీనియర్ నటుడు నరేష్, యాంకర్ స్రవంతి కీలక పాత్రలు పోషించారు. గోపీ అచ్చర దర్శకత్వంలో త్రిశుల్ విజనరీ స్టూడియోస్ పతాకంపై బి.నరేంద్ర రెడ్డి ఈ చిత్రాన్ని నిర్మించారు. మరో రెండు రోజుల్లో ఈ చిత్రం థియేటర్లలోకి రానుంది. ఈ నేపథ్యంలో హీరో సుహాస్ మంగళవారం పాత్రికేయులతో ముచ్చటించారు. ఆ విశేషాలివి.
' హే భగవాన్' నుండి 'హే బల్వంత్' టైటిల్ మార్చడానికి కారణమేమిటి?
భగవాన్ అంటే భగవంతుడు అనే అర్థం వస్తుంది కాబట్టి టైటిల్ మార్చాలని సెన్సారు వారు సూచించడంతో హే బల్వంత్గా మార్చాం. సినిమాలో నరేష్ క్యారెక్టర్ పేరు మార్చాం. సినిమా టైటిల్తో పాటు సినిమా కాన్సెప్ట్ను కూడా సెన్సారు వాళ్లు పరిగణనలోకి తీసుకున్నారు.
ఈ సినిమాలో మీ పాత్ర ఎలా ఉంటుంది?
చిన్నప్పటి నుంచి బిజినెస్ చేయాలని ఆలోచించే కుర్రాడు, నాన్న బిజినెస్ను టేకప్ చేయాలని అనుకుంటాడు. అప్పుడు అతనికి ఎదురైన పరిణామాలు ఏమిటి? నాన్న బిజినెస్ ఏమిటి? ఇలా సినిమా పూర్తి ఎంటర్ టైన్మెంట్గా, నా పాత్ర కూడా వినోదాత్మకంగా ఉంటుంది.
ఈ సినిమా చాలా తక్కువ వర్కింగ్ డేస్లో పూర్తి చేశారట?
అవునండి.. నా కెరీర్లో కథ ఓకే కాగానే పూర్తి చేసి చాలా త్వరితగతిన విడుదల చేస్తున్న సినిమా 'హే బల్వంత్'. సినిమా కూడా ఎంతో క్వాలిటీగా ఉంటుంది. నా కెరీర్లో మళ్లీ ఇంత ఫాస్ట్గా సినిమా జరుగుతుందా అనిపించింది.
సినిమా ఓకే చేయడానికి కారణం?
కథ వినగానే నచ్చింది. ముఖ్యంగా ఎంటర్టైన్మెంట్తో పాటు ఎమోషన్గా కనెక్ట్ అయ్యాను. సినిమా మేము అనుకున్నదాని కంటే వంద రెట్లు బెటర్గా ఉంది.
ఈ సినిమా సుహాస్ 2.0 అనుకోవచ్చా?
అంత పెద్ద పదాలు వాడకండి. కాకపోతే ఈ సినిమా అయితే నాకు విజయాన్ని అందిస్తుందనే నమ్మకం ఉంది.
ప్రతి సినిమా కోసం మీరు ఎంతో ఎఫర్ట్ పెడుతున్నారు? కానీ సరైన సక్సెస్ రాలేకపోతే ఎలా అనిపిస్తుంది?
విజయం కోసం ఎదురుచూడటమే.. పరాజయం పాలైతే బాధగా అనిపిస్తుంది. కానీ వెంటనే తదుపరి సినిమాకు రెడీ అవుతుంటాను.
హే బల్వంత్ పట్ల ఎలాంటి అంచనాలు ఉన్నాయి?
ఈ సినిమాపై అందరికీ నమ్మకం ఉంది. వంశీ నందిపాటి గారు మాకు ఎంతో ధైర్యం ఇచ్చారు. వరుస ఫెయిల్యూర్స్ తరువాత అందరూ కంట్రోల్గా ఆలోచించి చేయమని అన్నారు. ఇంట్లో మా శ్రీమతి కూడా అదే చెప్పింది. అందుకే మంచి సినిమాలు చేయాలని కొంత బ్రేక్ ఇచ్చి 'హేబల్వంత్' చేశాను. ఈ సినిమా విజయంపై చాలా నమ్మకం ఉంది.
తమిళ్ సినిమా 'మందాడి'లో మీ పాత్ర ఎలా ఉండబోతుంది?
'మందాడి'లో మెయిన్ విలన్ గా చేస్తున్నాను. సినిమా విడుదల తరువాత తమిళంలో బిజీ అయ్యే అవకాశం ఉంది. నేను వెయిట్ చేసిన లుక్ అండ్ క్యారెక్టర్. 'అంబాజీ పేట...' సినిమా చూసి 'మందాడి' కోసం నన్ను అప్రోచ్ అయ్యారు.
మీకు సక్సెస్ రావాలని అందరూ కోరుకుంటున్నారు. ఇది మీరు గమనించారా?
మంచి యాక్టర్, మంచి సినిమా పడాలి అనే సానుభూతి అందరిలో ఉంది. ఇది నా అదృష్టంగా భావిస్తున్నాను.
తమిళ సినిమా చేయడం ఎలా ఉంది?
విలన్ పాత్ర చేస్తున్నాను. చాలా డిఫరెంట్ లుక్. ఆ లుక్ను ఎలా రిసీవ్ చేసుకుంటారో అనే టెన్షన్ అయితే ఉంది.
ఇంతకు ముందు దాదాపుగా అన్నీ సీరియస్ పాత్రలే చేశారు. తొలిసారిగా హే బల్వంత్లో మీ పాత్రలో కామెడీ కనిపిస్తోంది?
నా కెరీర్ ప్రారంభంలో షార్ట్ ఫిల్మ్స్ లో నేను కామెడీ పాత్రలే చేశాను. ఈ సినిమాలో నా పాత్రను చూసి మా ఆవిడ కూడా ఇలాంటి సినిమాలు చేయమని కోరింది. లక్కీగా నాకు ఈ సినిమా వచ్చింది.
కెరీర్ ఎలా అనిపిస్తోంది?
నేను పూర్తి శాటిస్ఫాక్షన్గా ఉన్నాను. ఈ సినిమా హిట్ అయితే అది ఇంకా పెరుగుతుంది. అందరూ సినిమా మీద ఫుల్ కాన్పిడెంట్గా ఉన్నారు. పెద్ద విజయం రాబోతుంది. ఈ సినిమా మా వైఫ్ కూడా చూసి ఫుల్ ఎంజాయ్ చేసింది. ఇలాంటి సినిమాలు కదా నువ్వు చేయాల్సింది అని అంది.
మీ తదుపరి సినిమా ?
కార్తీక్ సుబ్బరాజు బ్యానర్లో ఓ సినిమా చేస్తున్నాను. ఆయన కథ అందిస్తున్నాడు. వాళ్ల అసోసియేట్... దర్శకుడు. తెలుగులో కొన్ని కథలు వింటున్నాను. త్వరలోనే ఫైనల్ అవుతాయి.