Vijay: 'జన నాయగన్' బదులు 'పోలీస్'
ABN, Publish Date - Jan 17 , 2026 | 06:36 PM
విజయ్ హీరోగా నటించిన 'జన నాయగన్' సినిమా విడుదలలో జాప్యం జరగడంతో ఆ లోటును భర్తీ చేస్తూ 'తెరి' సినిమా రాబోతోంది. ఈ సినిమా తెలుగు అనువాదం 'పోలీస్'ను సైతం ఈ నెల 23న విడుదల చేయబోతున్నారు.
కోలీవుడ్ స్టార్ హీరో కమ్ పొలిటీషియన్ విజయ్ నటించిన 'జన నాయగన్' (Jana Nayagan) నిజానికి పొంగల్ కానుకగా విడుదల కావాల్సి ఉంది. కానీ సి.బి.ఎఫ్.సి. (CBFC) ఛైర్మన్ రిలీజ్ కు మోకాలడ్డటంతో ఈ సినిమా నిర్మాతలు కోర్టుల చుట్టూ తిరుగుతున్నారు. సుప్రీమ్ కోర్టులోనూ నిర్మాతకు చుక్కెదురైంది. ఈ నెల 21లోపు హైకోర్టులోనే తేల్చుకోమని, తాము ఈ సమయంలో ఈ వ్యవహారంలో తలదూర్చలేమని సుప్రీమ్ కోర్టు తేల్చిచెప్పేసింది. దాంతో విజయ్ అభిమానులను నిరాశ చెందకుండా తన చిత్రం 'తెరి' (Theri) ని సంక్రాంతికి రీ-రిలీజ్ చేస్తామని నిర్మాత కలైపులి ఎస్ థాను ప్రకటించారు. కానీ ఇతర నిర్మాతల కోరిక మేరకు ఆయన ఆ నిర్ణయాన్ని వాయిదా వేసుకున్నారు. ఇప్పుడు తాజాగా ఈ సినిమాను జనవరి 23న విడుదల చేయబోతున్నట్టు తెలిపారు.
విశేషం ఏమంటే... గతంలోనే 'తెరి' సినిమా తెలుగులో 'పోలీస్' పేరుతో డబ్ అయ్యి విడుదలైంది. ఇక్కడ మించి విజయాన్ని అందుకుంది. ఇప్పుడు తమిళంతో పాటు దీనిని తెలుగులోనూ రీ-రిలీజ్ చేయబోతున్నారు. విజయ్ (Vijay) సరసన ఇందులో సమంత (Samantha) నాయికగా నటించింది. అట్లీ (Atlee) దీనిని డైరెక్ట్ చేశారు. ఈ చిత్రాన్ని నైజాం ప్రాంతంలో ప్రముఖ పంపిణీ సంస్థ ఏషియన్ ఫిలిమ్స్, ఆంధ్రా లో సురేష్ మూవీస్ భారీ స్థాయిలో విడుదల చేయబోతున్నాయి. ఇప్పటికే రీ-రిలీజ్ వార్తతో సోషల్ మీడియాలో భారీ స్పందన వస్తుండగా, విజయ్ అభిమానులతో పాటు సినిమా ప్రేమికులు మరోసారి ఈ ఎమోషనల్ యాక్షన్ ఎంటర్టైనర్ను థియేటర్లలో చూసేందుకు ఆసక్తిగా ఎదురు చూస్తున్నారు.
తండ్రి, కూతురు అనుబంధం, పోలీస్ బ్యాక్డ్రాప్, భావోద్వేగాలు, యాక్షన్, కమర్షియల్ ఎలిమెంట్స్ను సమపాళ్లలో మేళవించి అట్లీ ఈ 'పోలీస్' చిత్రాన్ని రూపొందించారు. విజయ్ ద్విపాత్రాభినయంలో మెప్పించగా, సమంత పాత్ర ప్రేక్షకులను ఎంతగానో ఆకట్టుకుంది. అలాగే మరో హీరోయిన్ గా అమీ జాక్సన్ నటించారు. ప్రభు, రాధిక శరత్ కుమార్ పాత్రలు కూడా ఈ చిత్రానికి కీలకం. ముఖ్యంగా క్లైమాక్స్ సన్నివేశాలు, భావోద్వేగ క్షణాలు సినిమాకే హైలైట్గా నిలిచాయి. ఈ చిత్రానికి సంగీతం అందించిన జీవీ ప్రకాష్ కుమార్ పాటలు అప్పట్లో చార్ట్బస్టర్స్గా నిలిచాయి. నేపథ్య సంగీతం, సినిమాటోగ్రఫీ, యాక్షన్ సన్నివేశాలు ప్రేక్షకులను థియేటర్లకు ఆకర్షించడంలో కీలక పాత్ర పోషించాయి. ఈ 'పోలీస్' విజయ్కు తెలుగులో కూడా బలమైన అభిమాన వర్గాన్ని మరింత పెంచింది. ఇప్పుడు ఆధునిక సాంకేతికతతో మెరుగైన క్వాలిటీతో రీ-రిలీజ్ అవుతున్న ఈ చిత్రం మరోసారి బాక్సాఫీస్ వద్ద తన సత్తా చాటుతుందని ట్రేడ్ వర్గాలు భావిస్తున్నాయి. విజయ్, సమంత అభిమానులకు ఇది నిజంగా తీపి కబురే!