Belraj Kalarickal: దర్శకుడిగా తొలి విజయం.. అంతలోనే తీరని విషాదం!
ABN, Publish Date - Oct 17 , 2026 | 04:22 PM
ఆరేళ్లుగా ప్రేమించిన యువతిని గత నెలలోనే వివాహం చేసుకున్న ఆయన.. కొత్త జీవితాన్ని ప్రారంభించిన కొద్ది రోజులకే గుండెపోటుతో కన్నుమూశారు.
సినిమా రంగంలో ఎన్నో కలలతో అడుగుపెట్టే యువతకు తమకంటూ ప్రత్యేక గుర్తింపు తెచ్చుకోవాలనే ఆశ ఉంటుంది. అందుకోసం ఎన్నో ఏళ్లపాటు కష్టపడుతూ, అవకాశాల కోసం ఎదురుచూస్తుంటారు. అలాంటి ప్రయాణంలో తొలి విజయాన్ని అందుకుని, తమ కలను నిజం చేసుకున్న ఆనందంలో ఉన్న ఓ యువ దర్శకుడి జీవితం అర్ధాంతరంగా ముగిసింది. ఆరేళ్లుగా ప్రేమించిన యువతిని గత నెలలోనే వివాహం చేసుకున్న ఆయన.. కొత్త జీవితాన్ని ప్రారంభించిన కొద్ది రోజులకే గుండెపోటుతో కన్నుమూశారు. కేవలం 27 ఏళ్ల వయసులోనే తుదిశ్వాస విడిచిన మలయాళ యువ దర్శకుడు బేల్‌రాజ్‌ కలరిక్కల్‌ (Belraj Kalarickal) మరణవార్త సినీ వర్గాలను తీవ్ర విషాదంలోకి నెట్టింది.
బేల్‌రాజ్‌ కలరిక్కల్‌ మలయాళ చిత్ర పరిశ్రమలో అసిస్టెంట్‌ డైరెక్టర్‌గా పనిచేశారు. దర్శకత్వంపై ఉన్న ఆసక్తితో ఎన్నో కష్టాలను ఎదుర్కొంటూ, తనకంటూ ఓ ప్రత్యేక గుర్తింపు సంపాదించుకోవాలని కలలు కన్నారు. ఈ క్రమంలో ‘నిళల్‌’, ‘మధురం’, ‘డాకిని’ వంటి చిత్రాలకు సహాయ దర్శకుడిగా పనిచేసి, సినిమా నిర్మాణంలోని వివిధ అంశాలపై అనుభవాన్ని సంపాదించుకున్నారు. పరిశ్రమలో తన ప్రయాణాన్ని కొనసాగిస్తూ, ఎప్పటికైనా దర్శకుడిగా ప్రేక్షకుల ముందుకు రావాలనే లక్ష్యంతో అడుగులు వేశారు. ఎట్టకేలకు ‘కప్పి స్క్వాడ్‌’ (Kappi Squad) వెబ్ సిరీస్‌తో దర్శకుడిగా తన కలను సాకారం చేసుకున్నారు. ఒకవైపు వృత్తిపరంగా కొత్త ప్రయాణం ప్రారంభమవడం, మరోవైపు ఆరేళ్లుగా ప్రేమించిన యువతితో వివాహ బంధంలోకి అడుగుపెట్టడం.. ఇలా ఆయన జీవితంలో సంతోషకరమైన పరిణామాలు చోటుచేసుకున్నాయి. కెరీర్‌లో తొలి విజయాన్ని ఆస్వాదిస్తూ, వ్యక్తిగత జీవితంలోనూ కొత్త అధ్యాయానికి శ్రీకారం చుట్టిన సమయంలోనే ఈ విషాదం చోటుచేసుకోవడం అందరినీ కలచివేస్తోంది.
విడుదలైన మరుసటి రోజే మృత్యు ఒడిలోకి..
బేల్‌రాజ్‌ దర్శకత్వం వహించిన ‘కప్పి స్క్వాడ్‌’ వెబ్ సిరీస్‌ శుక్రవారం జియో హాట్‌స్టార్‌లో స్ట్రీమింగ్‌కు వచ్చింది. దర్శకుడిగా తన ప్రతిభను ప్రేక్షకులకు పరిచయం చేసుకునే అవకాశం లభించిన తరుణంలో, ఆ ఆనందాన్ని పూర్తిగా ఆస్వాదించకముందే ఆయన కన్నుమూయడం విషాదకరం. వెబ్ సిరీస్‌ విడుదలైన మరుసటి రోజే ఆయన మరణవార్త వెలుగులోకి రావడంతో సన్నిహితులు, సినీ వర్గాల వారు తీవ్ర దిగ్భ్రాంతికి గురయ్యారు. చిన్న వయసులోనే గుండెపోటుతో ఆయన ప్రాణాలు కోల్పోవడం పలువురిని కలచివేస్తోంది.
ఇవి కూడా చదవండి:
Jailer2: ‘జైలర్ 2’ టికెట్‌ ధరలపై విమర్శలు.. నాగవంశీ కీలక వ్యాఖ్యలు!
కావ్య మారన్‌తో పెళ్లి.. తెలుగువాళ్లకి అనిరుధ్ మరింత దగ్గర కాబోతున్నాడా?