Tiger Shroff: టైగర్‌ ష్రాఫ్‌ కేసులో .. 22 ఏళ్ళ యువతి అరెస్ట్‌
ABN, Publish Date - Nov 03 , 2026 | 02:02 PM
బాలీవుడ్‌ హీరో టైగర్‌ ష్రాఫ్‌ (Tiger Shroff) కారుపై జరిగిన కాల్పుల ఘటనకు సంబంధించి పోలీసుల దర్యాప్తు కొనసాగుతోంది. ఈ కేసులో తాజాగా మరో అరెస్టు చోటుచేసుకుంది
బాలీవుడ్‌ హీరో టైగర్‌ ష్రాఫ్‌ (Tiger Shroff) కారుపై జరిగిన కాల్పుల ఘటనకు సంబంధించి పోలీసుల దర్యాప్తు కొనసాగుతోంది. ఈ కేసులో తాజాగా మరో అరెస్టు చోటుచేసుకుంది. హరియాణాలోని కర్నాల్‌కు చెందిన 22 ఏళ్ల యువతిని ముంబయి క్రైమ్‌ బ్రాంచ్‌ అధికారులు అదుపులోకి తీసుకున్నారు. దీంతో ఈ కేసులో ఇప్పటివరకు అరెస్టయిన వారి సంఖ్య 13కు చేరింది.పోలీసులు అరెస్టు చేసిన యువతిని సుభేహా పండిట్‌గా గుర్తించారు. ఈ కేసులో ఇప్పటికే రాధ, బబిత అనే ఇద్దరు మహిళలు అరెస్టయ్యారు. గతంలో పట్టుబడిన ఇద్దరు మహిళలు నిందితులకు ఆయుధాలు అందించడంలో సహకరించినట్లు ఆరోపణలు ఉన్నాయి. క్రైమ్‌ బ్రాంచ్‌ విచారణలో సుభేహా పండిట్‌కు కూడా ఈ నేర వ్యవహారంతో సంబంధాలున్నట్లు గుర్తించినట్లు సమాచారం. దీంతో నవంబర్‌ 1న హరియాణా పోలీసుల సహాయంతో కర్నాల్‌లో ఆమెను అరెస్టు చేశారు. ఈ కాల్పుల వెనుక ఉన్న వ్యక్తులు, వారి నెట్‌వర్క్‌, ఇతరుల ప్రమేయంపై పోలీసులు మరింత లోతుగా దర్యాప్తు చేస్తున్నారు.
మరో బాలీవుడ్‌ స్టార్‌ కూడా టార్గెట్‌?
అక్టోబర్‌ 18న ముంబయిలోని జుహు ప్రాంతంలో ఈ కాల్పుల ఘటన జరిగింది. ఫుట్‌బాల్‌ మైదానం నుంచి టైగర్‌ ష్రాఫ్‌ కారులో బయలుదేరిన సమయంలో బైక్‌పై వచ్చిన ముగ్గురు వ్యక్తులు ఆయన వాహనంపై కాల్పులు జరిపారు. ఈ ఘటనలో టైగర్‌కు స్వల్ప గాయాలు కాగా, ఆయన డ్రైవర్‌తో పాటు ఉమేశ్‌ అనే అభిమాని తీవ్రంగా గాయపడ్డారు. ఈ దాడి వెనుక మరింత పెద్ద కుట్ర ఉన్నట్లు పోలీసుల విచారణలో వెల్లడైనట్లు సమాచారం. తొలుత మరో బాలీవుడ్‌ ప్రముఖ నటుడిని లక్ష్యంగా చేసుకున్న దుండగులు.. అక్కడ భద్రతా ఏర్పాట్లు అధికంగా ఉండటంతో తమ ప్రణాళికను మార్చుకున్నట్లు తెలుస్తోంది. ఆ తర్వాత టైగర్‌ ష్రాఫ్‌ కారుపై కాల్పులకు పాల్పడినట్లు దర్యాప్తులో వెలుగులోకి వచ్చినట్లు సమాచారం.