Oka Manchi Prema Katha: జనాల్లో ఆలోచనను రేకెత్తించేలా   

రోహిణి హట్టంగడి, రోహిణి ముల్లేటి, సముద్రఖని, హిమాంశు పోపూరి, సౌమ్య, అనన్య నన్నపనేని ప్రధాన పాత్రలో రానున్న చిత్రం ‘ఒక మంచి ప్రేమ కథ’.

రోహిణి హట్టంగడి, రోహిణి ముల్లేటి, సముద్రఖని, హిమాంశు పోపూరి, సౌమ్య, అనన్య నన్నపనేని ప్రధాన పాత్రలో రానున్న చిత్రం ‘ఒక మంచి ప్రేమ కథ’. హిమాంశు పోపూరి నిర్మిస్తుండగా.. అక్కినేని కుటుంబరావు తెరకెక్కించారు. ఈ సినిమా ట్రైలర్  ఇటీవల  విడుదల చేశారు. 

నటి రోహిణి ముల్లేటి మాట్లాడుతూ 'కోర్ట్’ సినిమాతో ఆడియన్స్ ముందుకు వచ్చాను. ఎప్పుడూ మంచి కథలతో ప్రేక్షకుల ముందుకు రావడం ఆనందంగా ఉంది. ఇప్పుడు ‘ఒక మంచి ప్రేమ కథ’తో రాబోతున్నాను. కుటుంబరావు గారి ‘తోడు’ సినిమా నాకు ఎంతో ఇష్టం. మళ్లీ ఇన్నేళ్లకు ఆయన ఇలా సినిమా తీయడం సంతోషంగా ఉంది. ఈ సినిమాలో నా పాత్రను చూస్తే ఆడియెన్స్ కోప్పడతారు. అవుట్ ఫుట్ చూసి  కంటతడి పెట్టుకున్నాను' అని అన్నారు.

రచయిత్రి ఓల్గా మాట్లాడుతూ ‘నేను ఈ కథను ముందుగా చిన్నగా రాసుకున్నాను. సినిమాగా తీస్తే బాగుంటుందని చాలా మంది సలహాలు ఇచ్చారు. హిమాంశు ఈ కథను సినిమాగా తీయాలని పట్టుబట్టారు. రోహిణి ముందు నుంచీ ఈ కథతో ప్రయాణం చేశారు.  సముద్రఖని గారు ఎంత బిజీగా ఉన్నా కూడా మాకు డేట్లు ఇచ్చారు.  1985 నుంచి 2017 వరకు నేను రాసిన ప్రతీ నవల చతురలో వచ్చింది. నేను ఉషా కిరణ్ మూవీస్ బ్యానర్‌లోనూ చాలా కాలం పని చేశాను. మళ్లీ ఇప్పుడు నా సినిమా ఈటీవీ విన్‌లో రావడం ఆనందంగా ఉంది. పెద్దవాళ్లందరూ కలిసి నటించిన చిత్రమే అయినా ఇది యువతరానికి సంబంధించిన కథ’ అని అన్నారు.

దర్శకుడు అక్కినేని కుటుంబరావు మాట్లాడుతూ ‘సినిమాకి స్క్రిప్ట్ ఎంత ముఖ్యమో..  ఆర్టిస్టులు, టెక్నీషియన్లు  ముఖ్యం. రోహిణి  లేకపోతే ఈ చిత్రం ముందుకు వచ్చేది కాదు. సముద్రఖని గారు ఎంత బిజీగా ఉన్నా కూడా మాకు సపోర్ట్ చేశారు. ఓల్గా గారు మంచి కథను, మాటల్ని, పాటల్ని ఇచ్చారు. ఈ తరం కోట్లు సంపాదించేందుకు పరుగులు పెడుతున్నారు.. కానీ తల్లిదండ్రుల్ని పట్టించుకోవడం లేదు. అందరిలోనూ ఆలోచనను రేకెత్తించేలా ఈ సినిమాను తెరకెక్కించాను.  బోర్ కొట్టించకుండా నవ్విస్తూ, ఏడ్పించేలా ఈ సినిమా ఉంటుంది' అన్నారు.