Rashmika Mandanna: గర్జన వినడానికి కాదు.. భయపెట్టడానికి
ABN, Publish Date - Jun 28 , 2025 | 02:13 AM
సాంప్రదాయక చీర, ముక్కు పుడక, ఇతర ఆభరణాలతో గోండు యువతిగా రష్మిక కనిపించే కొత్త చిత్రం మైసా. దర్శకుడు హను రాఘవపూడి శిష్యుడు రవీంద్ర పుల్లే ఈ సినిమాతో దర్శకుడిగా పరియమవుతున్నారు.
సాంప్రదాయక చీర, ముక్కు పుడక, ఇతర ఆభరణాలతో గోండు యువతిగా రష్మిక కనిపించే కొత్త చిత్రం ‘మైసా’. దర్శకుడు హను రాఘవపూడి శిష్యుడు రవీంద్ర పుల్లే ఈ సినిమాతో దర్శకుడిగా పరియమవుతున్నారు. అజయ్‌, అనిల్‌ సయ్యపురెడ్డి నిర్మిస్తున్న ఈ చిత్రం ఫస్ట్‌ లుక్‌, పోస్టర్‌ను దర్శకుడు హను రాఘవపూడి విడుదల చేశారు. తమిళ పోస్టర్‌ను తమిళ హీరో ధనుష్‌, మలయాళ పోస్టర్‌ను దుల్కర్‌ సల్మాన్‌, కన్నడ పోస్టర్‌ను శివరాజ్‌ కుమార్‌, హిందీ పోస్టర్‌ను విక్కీ కౌశల్‌ విడుదల చేశారు. వీరందరూ రష్మికకు శుభాకాంక్షలు తెలిపారు. ఇంతకు ముందెన్నడూ చూడని విధంగా ముఖాన రక్తపు మరకలు, చేతిలో ఆయుధంతో కొత్తగా కనిపించారు రష్మిక. ‘ఓర్పు ఆమె ఆయుధం. ఆమె గర్జన వినడానికి కాదు.. భయపెట్టడానికి’ అని చిత్ర నిర్మాణ సంస్థ పేర్కొంది. టైటిల్‌, ఆమె లుక్‌.. ప్రాజెక్ట్‌ మీద అంచనాలు పెంచాయి. ‘రెండేళ్ల కష్టానికి రూపం ‘మైసా’ చిత్రం. గోండు తెగల ప్రపంచం ఆధారంగా ఎమోషనల్‌ యాక్షన్‌ థ్రిల్లర్‌గా ఈ సినిమా ఉంటుంది’ అని దర్శకుడు చెప్పారు.