Ghantasala: 'ఘంటసాల' బయోపిక్ ను అడ్డుకోవాలని చూస్తున్నారు....

గాన గాంధర్వుడు ఘంటసాల (Ghantasala) బయోపిక్ 'ఘంటసాల ది గ్రేట్'ను డిసెంబర్ 12న విడుదల చేయబోతున్నారు ఆ సినిమా దర్శక నిర్మాత సిహెచ్ రామారావు. కృష్ణ చైతన్య (Krishna Chaitanya) ఘంటసాలగానూ, ఆయన భార్య మృదుల (Mrudhula) ఘంటసాల సావిత్రమ్మ (Ghantasala Savitramma) గానూ నటించిన ఈ సినిమా నిజానికి ఎప్పుడో విడుదల కావాల్సింది. ఒకేసారి ఈ సినిమాను రెండు రాష్ట్రాలలో విడుదల చేయడం కష్టం అని భావించిన మేకర్స్ జిల్లాల వారిగా రెండు రోజులు ఒక్కో ఊరిలో ఈ సినిమాను ప్రదర్శించాలని గతంలో పథక రచన చేశారు. అది ఏ మేరకు సఫలీకృతం అయ్యిందో తెలియదు కానీ ఇప్పుడు మరోసారి డిసెంబర్ 12న ఈ సినిమాను విడుదల చేయబోతున్నట్టు ప్రకటించారు.

ఈ విషయాన్ని తెలియచేసేందుకు ఏర్పాటు చేసిన పాత్రికేయుల సమావేశంలో మూవీ టీజర్ ను దర్శక నిర్మాత ఆదిత్య హాసన్ రిలీజ్ చేశారు. ఈ సందర్భంగా ఆయన మాట్లాడుతూ, 'ఇండస్ట్రీలో అశోక్ అనే మిత్రుడు ద్వారా బాలాజీ గారు, రామారావు గారి వద్ద పని చేసే అవకాశం వచ్చింది. కేవలం పన్నెండు రోజులు మాత్రమే రామారావు గారి వద్ద పని చేశాను. నా ఫస్ట్ రెమ్యూనరేషన్ కూడా ఆయనే ఇచ్చారు. ఆ తరువాత ఫారిన్ వెళ్లాను. మళ్లీ గ్యాప్ తీసుకుని వచ్చి సొంతంగా దర్శకుడిగా ఎదిగాను. ‘ఘంటసాల’ స్క్రిప్ట్ ఎంతో ఎమోషనల్‌గా ఉంటుంది. ఈ మూవీని ప్రతీ ఒక్కరూ చూడండి. ఈ చిత్రం పెద్ద విజయం సాధించాలని కోరుకుంటున్నాను’ అని అన్నారు.

ఘంటసాల పాత్రధారి కృష్ణ చైతన్య మాట్లాడుతూ .. 'ఘంటసాల గారి పాటలు వింటూ పెరిగిన నేను ఈ రోజు ఇలా ఆయన జీవిత చరిత్రను చెప్పే క్రమంలో భాగమైనందుకు సంతోషంగా ఉంది. ఆయన ప్రయాణాన్ని ఈ చిత్రంలో ఆడియెన్స్ చూస్తారు. నాకు అవకాశం ఇచ్చిన రామారావు గారికి థాంక్స్. ఇప్పటికే చాలా మంది ఈ మూవీని చూశారు. చూసిన వారంతా కూడా భావోద్వేగానికి గురయ్యారు. తెలుగు సినీ సంగీతంలో మొదటిగా చెప్పుకునే పేరు ఘంటసాల. ఘంటసాల గారు, బాలు గారు రెండు కళ్లలాంటి వారు. వారి ఆశీర్వాదంతో డిసెంబర్ 12న ఈ చిత్రం రాబోతోంది. అందరూ మా సినిమా చూసి ఆదరిస్తారని కోరుకుంటున్నాను’ అని అన్నారు. దర్శకుడు రామారావు మాట్లాడుతూ, 'నా శిష్యుడు ఆదిత్య హాసన్ నా చిత్ర కార్యక్రమానికి వచ్చి టీజర్‌ను రిలీజ్ చేయడం ఆనందంగా ఉంది. పాట అని అనగానే అందరికీ ఘంటసాల గుర్తుకు వస్తారు. సింగర్‌గా కంటే ఆయన వ్యక్తిత్వం గురించి అందరికీ తెలియాలని ఈ సినిమాను తీశాను. ఘంటసాల వారి పాత్రను పోషించమని చాలా మంది స్టార్లను అడిగాను. 'స్వరాభిషేకం'లో కృష్ణ చైతన్య గారిని చూసిన తరువాత ఘంటసాల వారిలా కనిపించారు. ఈ మూవీ ప్రివ్యూ చూసిన ప్రతీ ఒక్కరూ భావోద్వేగానికి లోనయ్యారు. డిసెంబర్ 12న ఈ చిత్రం రాబోతోంది. ఈ మూవీ బయటకు రాకుండా చేయాలని కొంత మంది ప్రయత్నిస్తున్నారు. కానీ వారి ప్రయత్నాలన్నీ విఫలం కావాలని ఆ దేవుడ్ని కోరుకుంటున్నాను. ఎన్ని శక్తులు అడ్డు పడినా కూడా డిసెంబర్ 12న ఈ సినిమాను రిలీజ్ చేస్తాను’ అని అన్నారు.

నిర్మాత రామ సత్య నారాయణరాజు మాట్లాడుతూ, ‘బయోపిక్ తీయాలంటేనే చాలా ధైర్యం కావాలి. రామారావు గారు ఎంతో ధైర్యంతో ‘ఘంటసాల ది గ్రేట్’ మూవీని తీస్తున్నారు. ఈ చిత్రాన్ని చూశాను. ఎంతో భావోద్వేగానికి గురయ్యాను. ఈ తరం వారికి ఘంటసాల గారి గొప్పదనం తెలియకపోవచ్చు. అందరికీ ఘంటసాల గారి గొప్పదనం తెలిసేలా ఈ మూవీని తెరకెక్కించారు. చదలవాడ శ్రీనివాసరావు గారు ఈ మూవీని చూసి మెచ్చుకున్నారు. ‘మహానటి’లా ఘంటసాల గొప్ప సినిమా అవుతుందని అభిలషించారు’ అని చెప్పారు. నిర్మాత శోభా రాణి మాట్లాడుతూ, ‘ఘంటసాల గారి గురించి చెప్పే స్థాయి నాకు లేదు. ఘంటసాల గారు సింగర్‌గా అందరికీ తెలుసు. కానీ ఆయన ఓ స్వాతంత్ర్య సమరయోధులు. క్విట్ ఇండియా ఉద్యమంలో పాల్గొని జైలుకి కూడా వెళ్లారు. అలాంటి ఆయన జీవిత చిత్రానికి ప్రభుత్వాలు కచ్చితంగా సాయమందించాలి’ అని అన్నారు. కర్రి బాలాజీ మాట్లాడుతూ, ‘కష్టపడితే విజయం వస్తుందని ఘంటసాల గారు నిరూపించారు. ఆదిత్య హాసన్ కూడా దాన్ని నిరూపించారు. దర్శకుడిగా, నిర్మాతగా ఆదిత్య హాసన్ ఎంతో గొప్ప స్థాయికి వెళ్లారు. రామారావు గారు కూడా ఈ మూవీ కోసం చాలా కష్టపడ్డారు. ఇందులోని పాత్రలన్నీ కూడా ఎంతో సహజంగా ఉంటాయి. ఈ చిత్రం అందరికీ నచ్చుతుంది’ అని తెలిపారు.

Also Read: Shraddha Kapoor: రూ. 252 కోట్ల డ్రగ్ రాకెట్ కేసులో ప్రభాస్ బ్యూటీస్..

Also Read: Super Star Krishna: మహేశ్ 'గ్లోబ్ ట్రాటర్' ఈవెంట్ తో ఫుల్ జోష్