Akhanda2: డిసెంబర్ 4 రాత్రి నుంచే.. 'అఖండ-2-తాండవం' ప్రీమియర్స్‌

ఇప్పటి దాకా బాలకృష్ణ (Balakrishna)-బోయపాటి శ్రీను కాంబినేషన్ లో వచ్చిన మూడు చిత్రాలూ అభిమానులకు అమితానందం పంచాయి.

ఇప్పటి దాకా బాలకృష్ణ (Balakrishna)-బోయపాటి శ్రీను కాంబినేషన్ లో వచ్చిన మూడు చిత్రాలూ అభిమానులకు అమితానందం పంచాయి. వారిద్దరి కాంబోలో నాల్గవ చిత్రంగా రూపొందిన అఖండ-2- తాండవం (Akhanda2) కూడా అదే రూటులో సాగుతుందని ఫ్యాన్స్ ఆశిస్తున్నారు. ఈ నేపథ్యంలోనే నవంబర్ 28వ తేదీన హైదరాబాద్ లోని కైతలాపూర్ మైదానంలో జరిగిన 'ప్రీ రిలీజ్ ఈవెంట్'తో ఫ్యాన్స్ లో మరింత ఉత్సాహం నెలకొంది. 'జై బాలయ్యా..' అంటూ కైతలాపూర్ ప్రాంగణం దద్దరిల్లింది.

నిజానికి ఈ వేడుకలో పాల్గొనాలని ఆంధ్రప్రదేశ్, కర్ణాటకలోని అభిమానులు ఆశించారు. అయితే బాలకృష్ణ ముందుగానే ఎవరి ఊళ్ళలో వారు ఉండి ప్రీరిలీజ్ ఈవెంట్ ను తిలకించాలని పిలుపునిచ్చారు. ఎందుకంటే 'అఖండ-2- తాండవం' ఖచ్చితంగా ఘనవిజయం సాధిస్తుందని, అప్పుడు ఎవరి ఊళ్ళలో వారు ఉత్సవాలు చేసుకోవాలన్నదే బాలయ్య అభిలాషట! డిసెంబర్ 4వ తేదీ రాత్రి నుంచే 'అఖండ-2-తాండవం' ప్రీమియర్ షోస్ సాగనున్నాయి. దాంతో ఫ్యాన్స్ లో రోజురోజుకూ 'అఖండ-2' పై ఆసక్తి పెరుగుతోంది...

'అఖండ-2-తాండవం' ప్రీ రిలీజ్ ఈవెంట్ లోనే ఈ సినిమాకు సంబంధించిన కొత్త టీజర్ ను రిలీజ్ చేశారు... గతంలో వచ్చిన టీజర్ కంటే మిన్నగా ఇది అలరిస్తోందని అంటున్నారు. ఈ సినిమాలో హైందవధర్మం ప్రధాన పాత్ర పోషిస్తుందని తెలుస్తోంది. హైందవధర్మం అందరినీ కలుపుకుపోయేదని, ఆ సత్యాన్ని బోధిస్తూ ఈ చిత్రం రూపొందిందని ప్రీ రిలీజ్ వేడుకలో వక్తలు చెప్పారు. అభిమానులను అలరించే అన్ని అంశాలు ఇందులో ఉన్నాయని భరోసా ఇచ్చారు.

ఇప్పటి దాకా బాలకృష్ణ సినిమాలో ఏ మూవీకి జరగనంత బిజినెస్ ఈ 'అఖండ-2' చిత్రానికి జరిగిందని సమాచారం. పాన్ ఇండియా మూవీగా తెలుగుతో పాటు తమిళ, కన్నడ, మళయాళ, హిందీ భాషల్లో డిసెంబర్ 5వ తేదీన 'అఖండ-2' సందడి సాగనుంది. బాలకృష్ణ కెరీర్ లో తొలి పాన్ ఇండియా మూవీగా రిలీజవుతోన్న 'అఖండ-2' బాక్సాఫీస్ వద్ద ఏ తీరున మురిపిస్తుందో చూడాలి.