Discover Andhra - Sai Tej: ఆంధ్రాలో ఇన్ని అద్భుతాలు ఉన్నాయా..

ఆంధ్రప్రదేశ్‌ అటవీశాఖ, ఏపీ ఉప ముఖ్యమంత్రి పవన్‌ కల్యాణ్‌ సహకారంతో నవదీప్‌, సాయి దుర్గ తేజ్‌ సారథ్యంలో శ్రీకాంత్‌ మన్నెపురి ‘డిస్కవర్‌ ఆంధ్ర’ డాక్యుమెంటరీని తెరకెక్కించారు.

ఆంధ్రప్రదేశ్‌ అటవీశాఖ(Ap Forest Dept), ఏపీ ఉప ముఖ్యమంత్రి పవన్‌ కల్యాణ్‌ (APDCM pawan kalyan) సహకారంతో నవదీప్‌, సాయి దుర్గ తేజ్‌ (Sai durga tej) సారథ్యంలో శ్రీకాంత్‌ మన్నెపురి ‘డిస్కవర్‌ ఆంధ్ర’ (Discover Andhra) డాక్యుమెంటరీని తెరకెక్కించారు. ఈ ప్రాజెక్ట్‌ని పడాల సురేందర్‌ రెడ్డి, శ్రావ్య కూనం నిర్మించారు. ఈ డాక్యుమెంటరీ టైటిల్‌, గింప్స్‌ను శనివారం విడుదల చేశారు. ఈ సందర్భంగా ఏర్పాటు చేసిన విలేకరుల సమావేశంలో టీమ్‌ పాల్గొన్నారు.

సాయి దుర్గా తేజ్‌ మాట్లాడుతూ ‘ఆంధ్రాను ఇంత అద్భుతంగా చూపిస్తున్న శ్రీకాంత్‌కు థ్యాంక్స్‌. మన చుట్టూనే ఇన్ని అద్భుతాలు ఉన్నాయా? అని అందరూ ఆశ్చర్యపోతారు. 2020లో నాకు ఈ వైల్డ్‌ లైఫ్‌ గురించి ఎక్కువగా ఆలోచనలు వచ్చాయి. అందుకే ‘గ్రీన్‌ పాస్‌’ అనే ఎన్జీవోని నా స్నేహితుడితో కలిసి మొదలుపెట్టాను. బీచ్‌ క్లీన్‌ చేయడం, కోస్టల్‌ ఏరియాలోని జీవుల్ని, పక్షుల్ని రక్షించే ప్రయత్నం చేస్తున్నాం. మన చుట్టూ ఉన్న ఈ వైల్డ్‌ లైఫ్‌ను కాపాడుకోవాల్సిన బాధ్యత మనదే. మణిశర్మ గారు ఈ ప్రాజెక్ట్‌కి సపోర్ట్‌ చేయడం ఆనందంగా ఉంది’ అని అన్నారు.

దర్శకుడు శ్రీకాంత్‌ మన్నెపురి మాట్లాడుతూ ‘అటవీశాఖలో వాలంటీర్‌గా చేసిన తరువాత నాకు చాలా విషయాలు తెలిశాయి. మన ఆంధ్రాలోనే ఎన్నో అద్భుతాలున్నాయి. మన దగ్గర ఉన్న వాటి గురించి అవగాహన కల్పించాలనే ఉద్దేశంతోనే ఈ ప్రాజెక్ట్‌ చేయాలని అనుకున్నాను. ఈ ప్రయాణంలో సహకరించిన ప్రతి ఒక్కరికీ థ్యాంక్స్‌’ అన్నారు.

నవదీప్‌ మాట్లాడుతూ ‘శ్రీకాంత్‌ తీసిన డాక్యుమెంటరీని చూసి, ఇదంతా ఏపీలో తీసిందా? అని ఆశ్చర్యపోయాను.  ‘ఆంధ్రాలోని వైల్డ్‌ లైఫ్‌ను ప్రపంచానికి చూపించాలని తేజ్‌ చెప్పగానే, డిప్యూటీ సీఎం పవన్‌ కల్యాణ్‌తో మాట్లాడించి కావాల్సిన సహాయ సహకారాలన్ని అందేలా చేశారు. తెలుగు జాతి గర్వపడేలా మన ఆంధ్రాలోని అద్భుతాల్ని చూపించాలని శ్రీకాంత్‌ ఎన్నో ఏళ్ల నుంచి కష్టపడ్డారు’ అని అన్నారు.