Chiranjeevi - Stalin: వినోదంతోపాటు.. సందేశమిచ్చిన సినిమా
ABN, Publish Date - Aug 16 , 2025 | 10:09 PM
'ఓ మనిషి సాయం పొందిన తర్వాత రుణం ఎలా తీర్చుకోవాలో ఆలోచించకుండా.. ఓ ముగ్గురికి సాయం చేయమని, ఆ ముగ్గురిని ఒక్కొక్కరిని మరో ముగ్గురికి సాయం చేయమని, ఇలా ఛైన్‌ లింక్‌లాగా సమాజానికి ఉపయోగపడాలని చెప్పిన చిత్రం స్టాలిన్‌
'ఓ మనిషి సాయం పొందిన తర్వాత రుణం ఎలా తీర్చుకోవాలో ఆలోచించకుండా..
ఓ ముగ్గురికి సాయం చేయమని, ఆ ముగ్గురిని ఒక్కొక్కరిని మరో ముగ్గురికి సాయం చేయమని,
ఇలా ఛైన్‌ లింక్‌లాగా సమాజానికి ఉపయోగపడాలని చెప్పిన చిత్రం స్టాలిన్‌. ఈతరం ఆడియన్స్‌కి వినోదం పంచడమే కాకుండా సమాజం పట్ల బాధ్యతగా వ్యవహరించాలని చెప్పిన చిత్రమిదని మెగాస్టార్‌ చిరంజీవి (Chiranjeevi) అన్నారు.
ఆయన కీలక పాత్రలో ఏఆర్‌ మురుగదాస్‌ (AR Murugados) దర్శకత్వంలో రూపొందించారు. త్రిష కథానాయిక. ఖుష్బూ, ప్రకాశ్‌రాజ్‌, సునీల్‌ కీలక పాత్రధారులు. అంజనా ప్రొడక్షన్స్‌ పతాకంపై కె.నాగబాబు ( K Nagababu) నిర్మించారు. ఈ చిత్రం మళ్లీ ప్రేక్షకుల ముందుకు రానుంది. ఆగస్టు 22న చిరంజీవి పుట్టినరోజు సందర్భంగా ఈ సినిమా రీ-రిలీజ్‌ చేస్తున్నారు. ఈ సందర్భంగా చిరంజీవి ‘స్టాలిన్‌’ సినిమా గురించి మాట్లాడారు.
‘స్టాలిన్‌’ విడుదలై ఇరవై ఏళ్లు కావోస్తుంది. ఇన్నేళ్ల తర్వాత నా పుట్టినరోజున మీ ముందుకు తీసుకురావడానికి నిర్మాత, నా తమ్ముడు నాగబాబు సిద్థమవుతున్నాడు. ఈ సినిమా నాకు చాలా ప్రత్యేకమైనది. ఈ చిత్రం మంచి సందేశాన్ని సమాజానికి అందించింది. వీర జవానుగా దేశ సరిహద్దుల్లో శత్రువుతో పోరాడటమే కాదు, దేశం లోపల ఉన్న శత్రువులతోనూ పోరాటం చేయాల్సిన అవసరం ఎంతైనా ఉందని హీరో స్టాలిన్‌ రంగంలోకి దిగుతాడు. ఒక సామాజిక స్పృహ కలిగిన పౌరుడిగా మారతాడు. ఈ సమాజంలో తాను చేస్తున్న మంచి వల్ల ప్రయోజనం పొందిన వాళ్లు కృతజ్ఞతలు చెప్పడమే కాదు, అలాంటి మంచి పని మరొక ముగ్గురు.. ఆ ముగ్గురూ మరో ముగ్గురికి చేసుకుంటూ వెళ్లాలని ఒక చక్కటి సందేశాన్ని స్టాలిన్‌ ఇస్తాడు. ఇందులో నటించిన ఖుష్బూ, త్రిష ఇతర నటీనటులు, మణిశర్మ, దర్శకుడు ఏఆర్‌ మురుగదాస్‌కు, కెమెరామెన్‌ చోటా కె నాయుడు, నా తమ్ముడు నాగబాబుకి నా హృదయపూర్వక అభినందనలు. ఈ చిత్రం మీ అందరికీ మంచి అనుభూతి ఇస్తుందనడంలో ఎలాంటి సందేహం లేదని నమ్ముతున్నా’ అని చిరంజీవి ఓ వీడియోలో తెలిపారు.