Akhanda2: 12న అఖండ తాండవం.. అధికారికంగా ప్రకటన
ABN, Publish Date - Dec 09 , 2025 | 10:52 PM
అనుకున్నదే జరిగింది. బాలకృష్ణ అఖండ తాండవం (Akhanda 2) రిలీజ్ డేట్ ఫిక్స్ అయింది.
నందమూరి బాలయ్య అభిమానులకు శుభవార్త. ‘అఖండ 2: తాండవం’ (Akhanda 2)సినిమా విడుదల తేదీ ఖరారు అయింది. ఈనెల 12న ప్రపంచ వ్యాప్తంగా విడుదల చేయనున్నట్లు నిర్మాతలు అధికారికంగా ప్రకటించారు. ఈనెల 11న గ్రాండ్ ప్రీమియర్స్ ప్రదర్శించ నున్నారు. నిజానికి షెడ్యూల్ ప్రకారం ఈనెల 5నే సినిమా విడుదల కావాల్సి ఉంది. చిత్ర నిర్మాణ సంస్థ 14 రీల్స్ ప్లస్ నుంచి తమకు రావాల్సిన బకాయిలు ఇప్పించాలని కోరుతూ ఈరోస్ ఇంటర్నేషనల్ సంస్థ మద్రాస్ హైకోర్టును ఆశ్రయించింది. దాంతో ‘అఖండ’ విడుదలపై కోర్టు స్టే విధించింది. అనంతరం డిసెంబరు 12, డిసెంబరు 25 లేదా సంక్రాంతికి విడుదల అంటూ రకరకాల ఊహాగానాలు తెరమీదకు వచ్చాయి. అయితే మంగళవారం మధ్యాహ్నం ఈరోస్ ఇంటర్నేషనల్ సంస్థతో సెటిల్మెంట్ చేసుకున్నట్లు 14 రీల్స్ ప్లస్ సంస్థ కోర్టు దృష్టికి తీసుకెళ్లింది. ‘అఖండ’ ఆగమనానికి అడ్డంకులు తొలగి మార్గం సుగమం అయింది.
ఇక.. ఈ యేడాదిలో చివరి క్రేజీయెస్ట్ ప్రాజెక్ట్ గా 'అఖండ-2-తాండవం' వస్తోందని మొదటి నుంచీ వినిపించింది. డిసెంబర్ 5న రావలసిన 'అఖండ-2' కొన్ని అనివార్య కారణాల వల్ల వాయిదా పడిన సంగతి తెలిసిందే. ఈ చిత్రాన్ని డిసెంబర్ 12వ తేదీన రిలీజ్ చేయడానికి నిర్మాతలు సర్వం సిద్ధం చేశారు. ఈ నేపథ్యంలో ముందుగా డిసెంబర్ 12న తమ చిత్రాలను విడుదల చేస్తామని ప్రకటించిన వారు అయోమయంలో పడ్డారు. ఆ రోజున దాదాపు 15 చిత్రాలు విడుదల కావలసి ఉన్నాయి.
వాటిలో 'ఈషా, మోగ్లీ' వంటి స్ట్రెయిట్ మూవీస్, 'అన్నగారు వస్తారు, లాక్ డౌన్' లాంటి డబ్బింగ్ సినిమాలు ఉన్నాయి. మిగిలినవి అంతగా చెప్పుకోదగ్గవి కాకపోయినా, 12వ తేదీన రావడానికి సిద్ధమయ్యాయి. 'అఖండ-2' వంటి క్రేజీ ప్రాజెక్ట్ ఇప్పుడు అదే డేట్ ను లాక్ చేసుకోవడంతో ఆ పదిహేను చిత్రాల్లో మోగ్లీ, ఈషా వంటి సినిమాలు వాయిదా వేసుకున్నారు.
'అఖండ-2' సినిమా వాస్తవానికి డిసెంబర్ 4వ తేదీ రాత్రి ప్రీమియర్ షోస్ తో మొదలు కావాలి. అయితే ఫైనాన్సియల్ ప్రాబ్లెమ్స్ వల్ల 'అఖండ-2' అనుకున్న సమయానికి జనం ముందుకు రాలేకపోయింది. డిసెంబర్ 4వ తేదీ సాయంత్రానికి ఈ మూవీకి భలే బజ్ నెలకొంది. కొన్ని కేంద్రాలలో ప్రీమియర్ షోస్ టిక్కెట్స్ సైతం ఇష్యూ చేశారు. అంత క్రేజ్ వచ్చిన 'అఖండ-2' అనుకున్న సమయానికి ప్రేక్షకులను పలకరించలేకపోయింది. దాంతో ఫ్యాన్స్ లో మునుపటి ఉత్సాహం కరవయిందని వినిపిస్తోంది.