Koragajja: ‘కాంతార’ తర్వాత ‘కొరగజ్జ’ మెప్పిస్తుంది
ABN, Publish Date - Nov 14 , 2025 | 11:04 AM
భూతకోళ అంటూ ‘కాంతార’ ఇండియన్ బాక్సాఫీస్‌ను షేక్ చేసింది. కర్ణాటక, కేరళ, ముంబైలోని కొన్ని ప్రాంతాలు, మరీ ముఖ్యంగా తులునాడులో పూజించబడే దైవం కొరగజ్జ కథతో కన్నడ నుంచి మరో చిత్రం రాబోతోంది
భూతకోళ అంటూ ‘కాంతార’ (kanthara) ఇండియన్ బాక్సాఫీస్‌ను షేక్ చేసింది. కర్ణాటక, కేరళ, ముంబైలోని కొన్ని ప్రాంతాలు, మరీ ముఖ్యంగా తులునాడులో పూజించబడే దైవం కొరగజ్జ (koragajja) కథతో కన్నడ నుంచి మరో చిత్రం రాబోతోంది. ‘కొరగజ్జ’ టైటిల్‌తో రానున్న ఈ చిత్రాన్ని సుధీర్ అత్తవర్ తెరకెక్కిస్తున్నారు. త్రివిక్రమ్ సాపల్య నిర్మాత. గోపీ సుందర్ మ్యూజిక్ అందిస్తున్నారు. ఇటీవల మంగళూరులో ఆడియో ఆవిష్కరణ ఘనంగా నిర్వహించారు. ఈ కార్యక్రమంలో పాత్రధారులు విభిన్న గెటప్స్‌లో కనిపించడం, కొరగజ్జ థీమ్‌లో అందరూ ఈవెంట్‌లో సందడి చేయడం ప్రధాన ఆకర్షణగా నిలిచింది.
నిర్మాత త్రివిక్రమ్ సాపల్య మాట్లాడుతూ ' మేం రిలీజ్ చేసిన పోస్టర్, 3డీ మోషన్ పోస్టర్‌కు అద్భుతమైన రెస్పాన్స్ వచ్చింది. త్వరలోనే సినిమాను రిలీజ్ చేయబోతోన్నాం. అందరినీ సర్ ప్రైజ్ చేసేలా మా మూవీ ఉంటుంది’ అని అన్నారు.
దర్శకుడు సుధీర్ అత్తవర్ మాట్లాడుతూ ‘కన్నడ పరిశ్రమలో ముప్పై ఏళ్ల క్రితమే పాన్ వరల్డ్ చిత్రాలు వచ్చాయి. ‘నాగరహోలి’ అనే సినిమా ప్రపంచ వ్యాప్తంగా 13 భాషల్లో విడుదలైంది. కన్నడలో ఎన్నో గొప్ప చిత్రాలు వచ్చాయి. అందులో ‘కాంతార’ కూడా ఒకటి. కన్నడ నుంచి వచ్చిన కల్పన మనకు రష్యాలో అంబాసిడర్‌గా ఉండేవారు. మాకు ఎక్కువగా గ్రామపీఠ అవార్డులు వచ్చాయి. ఇక ఇప్పుడు మా నుంచి ‘కొరగజ్జ’ చిత్రం రాబోతోంది. ఈ చిత్రం అందరినీ మెప్పిస్తుంది’ అని అన్నారు.
శృతి మాట్లాడుతూ ‘కొరగజ్జ’ లాంటి అద్భుతమైన చిత్రంతో నాకు పాత్ర దొరకడం ఆనందంగా ఉంది. కన్నడలో ప్రస్తుతం ఎన్నో గొప్ప చిత్రాలు వస్తున్నాయి. మన భారత సంస్కృతి, ఆచారాలు చాటే చిత్రాలెన్నో వస్తున్నాయి. ‘కాంతార’ తరువాత కన్నడ నుంచి ‘కొరగజ్జ’ రాబోతోంది. అందరు ఆదరించండి’ అని అన్నారు.
నటుడు సందీప్ సొపర్‌కర్ మాట్లాడుతూ 'కన్నడలో ఇది నాకు మొదటి చిత్రం. సుధీర్ సర్, త్రివిక్రమ్ వంటి వారితో పని చేయడం ఆనందంగా ఉంది. ఇందులోని ప్రతీ పాత్ర, ప్రతీ పాట అద్భుతంగా ఉంటుంది. సాహిత్యం, సంగీతం, కళ అనేవి లేకపోతే మానవ మనుగడ ఉండదు’ అని అన్నారు.