Andhra King Thaluka Review: రామ్ పోతినేని.. 'ఆంధ్రా కింగ్ తాలూకా' మూవీ రివ్యూ

రామ్ పోతినేని, భాగ్యశ్రీ బోర్సే జంటగా మహేష్ బాబు పి దర్శకత్వంలో మైత్రి మూవీ మేకర్స్ సంస్థ నిర్మించిన 'ఆంధ్రా కింగ్ తాలూక' సినిమా శుక్రవారం ప్రేక్షకుల ముందుకు వచ్చింది. సరైన హిట్ కోసం ఎదురు చూస్తున్న రామ్ కి ఈ చిత్రం విజయం అందించిందా..   

సినిమా రివ్యూ: 'ఆంధ్రా కింగ్ తాలూకా'

విడుదల తేదీ: 27-11-2025

హీరో రామ్ కు (Ram pothineni) హిట్ వచ్చి చాలా కాలమైంది... హీరోయిన్ భాగ్యశ్రీ బోర్సే (Bhagya Sri borse) ఖాతాలో ఇంతవరకూ హిట్టే పడలేదు. ఉపేంద్ర కూడా సాలీడ్ హిట్ కోసం కొంతకాలంగా ఎదురు చూస్తున్నాడు. ఇటు దర్శకుడు మహేశ్ బాబు కు ఆ మధ్య వచ్చిన 'మిస్ శెట్టి మిస్టర్ పోలిశెట్టి' ఎబౌ యావరేజ్ మూవీగా మిగిలిపోగా, మైత్రీ మూవీ మేకర్స్ సంస్థతోనూ జయాపజయాలు దోబూచులాడుతున్నాయి. ఈ నేపథ్యంలో వీరందరి కలయికలో వచ్చింది 'ఆంధ్రా కింగ్ తాలూకా' (Andhraking thaluka) మూవీ. మరి అది ఎలా ఉందో తెలుసుకుందాం.

'ఆంధ్ర కింగ్ తాలూకా' అనే పేరు వినగానే చాలా మంది పెదవి విరిచారు. మరికొందరు ఆంధ్ర కింగ్ సూర్య కుమార్ గా ఉపేంద్ర నటించాడనగానే కనుబొమ్మలు ఎగరేశారు. తెలుగు స్టార్స్ ఎవరూ దొరకనట్టు ఉపేంద్రను తీసుకోవడం ఏమిటని ప్రశ్నించారు. 'ఆంధ్ర కింగ్ తాలూకా' అనే టైటిల్ ను తెలంగాణ వాళ్ళు ఎందుకు ఓన్ చేసుకుంటారనే సందేహాన్ని మరి కొందరు వ్యక్తం చేశారు. అయితే ఇది ఆంధ్ర - తెలంగాణ రెండు రాష్ట్రాలుగా ఏర్పడక ముందు జరిగే కథ. సో అది ఇష్యూ కాదు. అలానే స్టార్ హీరో ఉపేంద్రను తుళు వాడిగా చూపి, తెలుగు భాష నేర్చుకుని ఇక్కడ స్టార్ గా ఎదిగినట్టు చూపించారు. సో... థియేటర్ కు వచ్చిన వారికి ఈ అంశాలపై పెద్దంత అభ్యంతరం ఉండే ఆస్కారం లేదు.

కథ 

ఈ సినిమా కథను సింపుల్ గా చెప్పాలంటే... సాగర్ (రామ్ పోతినేని) చిన్నప్పటి నుండి హీరో సూర్య కుమార్ (ఉపేంద్ర) ఫ్యాన్. అతని తెర మీద పాత్రలను తనకు తాను అన్వయించుకుంటూ, చిన్నప్పటి నుండి ఎదురైన అవరోధాలను అధిగమిస్తూ ముందుకు సాగుతుంటాడు. సూర్య కుమార్ ను ఎవరైనా ఏమైనా అంటే చాలా వారితో గొడవ పడిపోతాడు. తన హీరోకు అచ్చి వచ్చిన మహాలక్ష్మీ థియేటర్ ఓనర్ కూతురు మహాలక్ష్మీ (భాగ్యశ్రీ బోర్సే)ని సాగర్ ప్రేమిస్తాడు. అతడిని, అతను ఉండే లంక గ్రామాన్ని, అక్కడి మట్టిని అవమానించాడనే కోపంతో మహాలక్ష్మీ తండ్రికి సాగర్ సవాల్ విసురుతాడు. తన ఊరిలోనే మహాలక్ష్మీ పేరుతోనే ఓ కొత్త డీటీఎస్ థియేటర్ ను కట్టి, అందులో సూర్య కుమార్ నటించిన వందో సినిమాను ప్రదర్శిస్తానని చెబుతాడు. మరో వైపు వరుస పరాజయాల కారణంగా సూర్య కుమార్ వందో సినిమా మధ్యలో ఆగిపోతుంది. మరి సాగర్ అభిమానించే సూర్య వందో సినిమా పూర్తి చేశాడా? దిగువ మధ్య తరగతికి చెందిన సాగర్ తన లంక గ్రామంలో సినిమా థియేటర్ కట్టి మహాలక్ష్మీని పెళ్ళి చేసుకున్నాడా? సాగర్ ముక్కుముఖం కూడా తెలియని సూర్యకుమార్... అతన్ని వెతుక్కుంటూ ఆ లంక గ్రామానికి ఎందుకెళ్ళాడు? ఈ ప్రయాణంలో తనని తాను ఎలా తెలుసుకున్నాడు? అనేదే ఈ సినిమా కథ.

విశ్లేషణ: (Andhra King Taluka review)

కథానాయకుడు, అభిమాని నేపథ్యంలో ఇప్పటికే చాలా భాషల్లో చాలానే సినిమాలు వచ్చాయి. కానీ ఇది వాటికి భిన్నమైన సినిమా. దర్శకుడు మహేశ్ బాబు ఈ సినిమాకు తనే కథ, మాటలు, కథనం రాసుకున్నాడు. సినిమా ప్రారంభం నుండి ఇంటర్వెల్ వరకూ చాలా వేగంగా, ఆసక్తికరంగా సాగింది. కానీ అక్కడ నుండి కాస్త దారితప్పింది. సాగర్ తన లక్ష్యాన్ని చేరడం కోసం చేసే ప్రయత్నాలు అంత హార్ట్ టచ్చింగ్ అనిపించవు. అలానే క్లయిమాక్స్ పేలవంగా ఉంది. ఇది దాదాపు పాతికేళ్ళ క్రితం జరిగే కథే అయినా... మూడు కోట్ల రూపాయలను అదీ వంద సినిమాలు చేసిన స్టార్ హీరోకు ఓ పెద్ద సమస్యగా చూపడంతో మెయిన్ పాయింట్ తో ఆడియెన్స్ కనెక్ట్ కాలేని పరిస్థితి నెలకొంది. భావోద్వేగాలను తెరపై బాగానే పండించే ప్రయత్నం చేసినా... వాటికి కారణంగా చూపించిన కారణాలు పేలవంగా ఉన్నాయి. అలాని సినిమాలో మెరుపులాంటి సన్నివేశాలు లేవని కాదు. 'నేను పదేళ్ళుగా మీ ఫ్యాన్ ని... వాడు పదేళ్ళకే మీ ఫ్యాన్' వంటి డైలాగ్స్, తన అభిమానిని వెతుక్కుంటూ వెళ్ళే క్రమంలో హీరోకు ఎదురయ్యే అనుభావాలు, సాగర్ కు మహాలక్ష్మీతోనే డబ్బులు ఇప్పించడం వంటి సీన్స్ బాగున్నాయి. కానీ సినిమా చూసిన తర్వాత ఇంకేదో మిస్ అయ్యిందనే భావన ప్రేక్షకులకు కలుగుతుంది.

నటీనటుల విషయానికి వస్తే రామ్... సాగర్ పాత్రలో ఒదిగిపోయాడు. నూటికి నూరుపాళ్ళు ఫ్యాన్ బాయ్ గా మారిపోయాడు. భాగ్యశ్రీ బోర్సే మహాలక్ష్మీ పాత్రలో ఇమిడిపోయింది. చక్కని అభినయం కనబర్చింది. ఉపేంద్ర పాత్రను మలిచిన తీరు బాగుంది. తెలుగు స్టార్ హీరోలు ఈ పాత్ర చేసి ఉంటే అంతగా నప్పేది కాదేమో! ఇందులో ఇతర ప్రధాన పాత్రలను సింధూ తులానీ, రావు రమేశ్‌, తులసీ, మురళీశర్మ, రాజీవ్ కనకాల, రాహుల్ రామకృష్ణ, రఘుబాబు, శివారెడ్డి, సత్య, నాగ మహేశ్ తదితరులు పోషించారు. అనంత శ్రీరామ్, వడ్లమాని శ్రీనివాస్, హర్షవర్ధన్, విటీవీ గణేశ్‌ కొన్ని సన్నివేశాల్లో మెరుపులా మెరిశారు.

రామ్ రాసిన 'నువ్వుంటే చాలే' పాట సినిమాకు హైలైట్. మిగిలినవి పెద్దంత చెప్పుకోదగ్గలా లేదు. సిద్ధార్థ్‌, జార్జ్ సి విలియమ్స్ సినిమాటోగ్రఫీ, వివేక్ - మార్విన్ నేపథ్య సంగీతం బాగున్నాయి. మైత్రీ మూవీ మేకర్స్ కథను నమ్మి బాగానే ఖర్చు పెట్టారు. సినిమా నేపథ్యంలో సాగే ఈ సినిమా ఏమేరకు ప్రేక్షకులను, అభిమానులను ఆకట్టుకుంటుందనేది వేచి చూడాలి. హీరోస్ బయోపిక్స్ నే జనాలు చూడని ఈ రోజుల్లో ఫ్యాన్ బయోపిక్ ను చూస్తారా? లెట్స్‌ వెయిట్ అండ్ సీ.

ట్యాగ్ లైన్: ఫ్యాన్ మూమెంట్

రేటింగ్: 2.75/ 5