Rashmi Gautam: సూపర్ నేచురల్ థ్రిల్లర్ గా వైతరణి

తెలుగులో, బుల్లితెర, పెద్దతెరపై తన అందాల విందు చేస్తూ వీక్షకులను ఆకట్టుకుంది రష్మీ గౌతమ్. ఇప్పుడు బాలీవుడ్ లోకి హీరోయిన్ గా ఎంట్రీ ఇవ్వబోతోందామె.

బుల్లితెర ద్వారా పాపులారిటీ సంపాదించుకున్న రష్మీ గౌతమ్ (Rashmi Gautam) ఇప్పటికే పలు చిత్రాలలో నటించింది. డిజిటల్ కెమెరాల్లో సినిమాలు తీయడం మొదలైన కొత్తలోనే ఆమె 'సవ్వడి' (Savvadi) అనే చిత్రంలో నటించింది. అలానే పలు చిత్రాలలో కీలక పాత్రలు పోషించడంతో పాటు కొన్ని సినిమాల్లో హీరోయిన్ గానూ యాక్ట్ చేసింది. అయితే సిల్వర్ స్క్రీన్ పై రాని పేరు ఆమెకు టీవీ ప్రోగ్రామ్స్ ద్వారా లభించింది. అయితే నటిగా తనను తాను ప్రూవ్ చేసుకోవాలనే కోరిక రష్మీ గౌతమ్ లో ఇంకా సజీవంగానే ఉంది.

రష్మీ గౌతమ్ తాజాగా 'వైతరణి' (Vaitarani) అనే మూవీలో నటించింది. ఇది తెలుగుతో పాటు హిందీలోనూ తీసి సూపర్ నేచురల్ థ్రిల్లర్ మూవీ. ఇప్పటికే రష్మీ గౌతమ్ హిందీలో ఒకటి రెండు సినిమాల్లో చిన్న చిన్న పాత్రలను పోషించింది. హీరోయిన్ గా ఎంట్రీ ఇవ్వడం మాత్రం 'వైతరణి' మూవీతోనే. ఈ సినిమా ఫస్ట్ లుక్ పోస్టర్ ను మేకర్స్ విడుదల చేశారు. అఖిల్ బాబు దర్శకత్వం వహించిన ఈ సినిమాలో రుద్ర ప్రతాప్ (Rudhra Pratap), రామారావ్ జాదవ్, సంతోష్ నందివాడ ఇతర కీలక పాత్రలు పోషించారు.

వైతరణి అనేది భారతీయ ఇతిహాసాలలో చెప్పిన ఓ నది. మరణించిన మనిషి ఆత్మ వైతరణీ నది దాటి వెళ్ళుతుందని, దానిని దాటటం అంత ఆషామాషీ వ్యవహారం కాదని గరుడపురాణంలో ఉన్నట్టు చెబుతుంటారు. అలాంటి వైతరణి నది పేరునే ఈ సినిమాకు పెట్టడం ఆసక్తిని కలిగిస్తోంది. మనిషి జీవితానికి మరణానికి సంబంధించిన అంశాలను ఈ సైకలాజికల్, సూపర్ నేచురల్ మూవీలో ప్రస్తావిస్తారని అర్థం అవుతోంది. ఆర్.కె. కాంతలక్ష్మీ, ఆర్. రమేశ్‌ బాబు ఈ సినిమాను నిర్మించారు. తాజాగా విడుదలైన పోస్టర్ ను చూస్తుంటే 'తుంబాడ్ (Thubbad), పిశాసు (Pisaasu), నికిత రాయ్ (Nikita Roy)' వంటి సినిమాలను జ్ఞప్తికి తెచ్చేలా ఉంది. మరి తెలుగువారి మదిలో ఇప్పటికే చోటు సంపాదించుకున్న రష్మీ గౌతమ్ 'వైతరణి'తో ఉత్తరాది వారి మనసును ఏమేరకు గెలుచుకుంటుందో చూడాలి.

Also Read: July Releases జులైలో లక్కు కిక్కు చూసేదెవరో...

Also Read: Tv Movies: తండేల్‌, ప‌ట్టుద‌ల‌, బాపు. డ్రాగ‌న్‌.. ఈ ఆదివారం జూన్‌29న‌ తెలుగు టీవీ ఛాన‌ళ్ల‌లో వ‌చ్చే సినిమాలివే