Mahesh Bhatt about Mohit suri Saiyaara : ‘ఆషికి’ రోజుల్ని తలుచుకోవడం ఆనందం
ABN , Publish Date - Jul 15 , 2025 | 04:57 PM
'ఆషికి' వంటి సూపర్ హిట్ మూవీతో కుర్రకారు గుండెల్లో గుబులు లేపారు ప్రముఖ దర్శకుడు మహేశ్ భట్. త్వరలో యశ్ రాజ్ ఫిలిమ్స్ తీసిన 'సయారా' విడుదల కాబోతున్న నేపథ్యంలో తన 'ఆషికి' సినిమాను గుర్తు చేసుకోవడం ఆనందంగా ఉందంటున్నారాయన.
భారతదేశంలో అత్యంత ప్రసిద్ధమైన ఫిల్మ్ మేకర్స్‌లో ఒకరైన మహేష్ భట్ తాజాగా ‘సయారా’పై స్పందించారు. మహేష్ భట్ తీసిన ‘ఆషికి’ (Aashiqui) చిత్రంతో రాహుల్ రాయ్ (Rahul Roy), అను అగర్వాల్‌ (Anu Aggarwal) ఓవర్ నైట్ స్టార్స్ అయ్యారన్న సంగతి తెలిసిందే. 'ఆషికి' ఇప్పటికీ, ఎప్పటికీ ఇండియన్ స్క్రీన్స్‌పై ఓ ఎవర్ గ్రీన్ క్లాసికల్ లవ్ స్టోరీగా నిలిచిపోతుంది. 'ఆషికి' చిత్రానికి సంబంధించిన సంగీతం కూడా బ్లాక్ బస్టర్‌గా ఇప్పటికీ శ్రోతల్ని అలరిస్తూనే ఉంటుంది. అదేవిధంగా యశ్ రాజ్ ఫిలిమ్స్ సంస్థ 'సయారా' మూవీ ద్వారా హీరో, హీరోయిన్లుగా అహాన్ పాండే (Ahaan Panday), అనీత్ పద్దా (Aneet Padda) లను పరిచయంచేస్తున్నారు. ఇప్పటికే ‘సయారా’ పాటలు బ్లాక్ బస్టర్‌లుగా నిలిచాయి.
‘సయారా’ గురించి మహేష్ భట్ మాట్లాడుతూ, ‘ప్రతి తరానికి ఒక ప్రేమకథ ఉంటుంది. ఆ తరానికి ప్రతిబింబంలా ఆ ప్రేమ కథ నిలుస్తుంది. నా దృష్టిలో ‘సయారా’ ఈ తరానికి చెందిన ప్రేమ కథగా, ప్రేమకు నిర్వచనంగా మారుతుంది. నేను 'ఆషికి' సినిమాను ఎంతో నిజాయితీతో, స్వచ్ఛమైన ప్రేమతో చేశాను. అందుకే ప్రేక్షకులు ఆ చిత్రానికి ఎమోషనల్‌గా కనెక్ట్ అయ్యారు. ఆ తరువాత అందులో నటించిన వారు రాత్రికి రాత్రే స్టార్లుగా మారారు. ‘సయారా’తో మోహిత్ సూరి కూడా అదే చేస్తారని నేను ఆశిస్తున్నాను. 'సయారా' సినిమా చూసినప్పుడు జనాలకు ఆషికి లాంటి నోస్టాల్జియా ఫీలింగ్ రావడం చాలా ఆశ్చర్యంగా ఉంది. కానీ నేటి కాలంలో, నేటి తరానికి రొమాంటిక్ సినిమా ఎలా ఉండాలో చెప్పే నియమాల్ని సయారా తిరిగి రాస్తుందని నమ్మకంగా చెప్పగలను. ప్రతి కొత్త తరం మునుపటి తరాన్ని ప్రతిదానిలోనూ అధిగమించాలి. ‘సయారా’ కూడా అలానే చేయాలని కోరుకుంటున్నాను. మోహిత్ ఓ అద్భుతం. అతను నన్ను అన్ని విధాలుగా అధిగమిస్తే నేను చాలా సంతోషిస్తాను. ‘సయారా’ను తెరకెక్కించిన తీరు చూసి మోహిత్ పట్ల గర్వపడుతున్నాను. ఇంత వరకు మోహిత్ తీసిన చిత్రాల్లో ఇది చాలా భిన్నంగా అనిపిస్తోంది. ఈ చిత్రంలో మోహిత్ తనలోని ప్రేమ, లోతుని చూపించినట్టుగా కనిపిస్తోంది. ఇలాంటి ఓ గొప్ప ప్రేమ కథను ప్రపంచానికి అందిస్తున్నందుకు ఎంతో సంతోషంగా ఉంది. ‘సయారా’ను ప్రేక్షకులు ఎప్పుడెప్పుడు చూస్తారా? అని నేను చాలా ఉత్సాహంగా ఎదురుచూస్తున్నాను' అని అన్నారు.
మోహిత్ సూరి (Mohit Suri) గురించి మహేశ్ భట్ మాట్లాడుతూ, 'తెరపై ఇద్దరు ప్రతిభావంతులైన నటులతో ‘సయారా’ను మోహిత్ తెరకెక్కించారు. ఇంత గొప్ప సినిమాను తీసేందుకు ముందుకు వచ్చిన యశ్ రాజ్ ఫిలిమ్స్ వంటి స్టూడియోని చూస్తే నాకు గర్వంగా, సంతోషంగా ఉంది. ‘సయారా’ చాలా కొత్తగా కనిపిస్తోంది. కొత్తవారితో మాత్రమే జరిగే ఓ మ్యాజిక్‌లా ఉంది. ‘సయారా’ చిత్రంపై నా అంచనాలు తారాస్థాయిలో ఉన్నాయి. జూలై 18న ఈ మూవీని చూడాలని వెయిట్ చేస్తున్నాను’ అని అన్నారు.
Also Read: Lokesh Kanagaraj: నాగార్జునను ఒప్పించడమే కష్టమైంది...
Also Read: Yellamma: ఎల్ల‌మ్మ‌కు.. త‌మ్ముడి దెబ్బ