‘హత్య’ చేసిందెవరు?

విజయ్‌ ఆంటోనీ డిటెక్టివ్‌ పాత్ర పోషిస్తున్న చిత్రం ‘హత్య’. రితికా సింగ్‌ కథానాయిక. బాలాజీ కుమార్‌ దర్శకుడు. లోటస్‌ పిక్చర్స్‌, ఇన్ఫినిటీ వెంచర్స్‌ సంస్థలు సంయుక్తంగా నిర్మించాయి. సోమవారం హైదరాబాద్‌లో ట్రైలర్‌ ఆవిష్కరించారు. ఈ సందర్భంగా విజయ్‌ మాట్లాడుతూ ‘‘బాలాజీ ప్రతిభావంతుడైన దర్శకుడు. తనకు అన్ని విభాగాల్లో పట్టుంది. ఓ మంచి కథని తయారు చేశాడు. తొలిసారి డిటెక్టివ్‌ పాత్రలో నటించాను. తెలుగులో నా సినిమాల్ని ప్రేక్షకులు బాగా ఆదరించారు. ఈ సినిమాకీ అదే స్థాయిలో ఆదరణ దక్కుతుందన్న నమ్మకం ఉంది’’ అన్నారు. దర్శకుడు మాట్లాడుతూ ‘‘లైలా అనే అమ్మాయి హత్యకు గురవుతుంది. ఆ హత్య ఎవరు చేశారు? అనే విషయాన్ని అన్వేషిస్తూ సాగే కథ ఇది. ప్రేక్షకుల్ని ఉత్కంఠకు, ఆశ్చర్యానికీ గురి చేసే అంశాలు చాలా ఉన్నాయ’’న్నారు.