టాలీవుడ్ స్టార్ హీరోను పెళ్లి చేసుకోబోతున్న కోలీవుడ్ హీరోయిన్..?

హీరోయిన్ సంజన గల్రానీ చెల్లెలిగా ఇండస్ట్రీకి ఎంట్రీ ఇచ్చినా.. తనకంటూ ప్రత్యేక గుర్తింపు సాధించుకున్న నటి నిక్కీ గల్రానీ. ఆమె త్వరలోనే పెళ్లి పీటలను ఎక్కబోతుందని తెలుస్తోంది. ఓ టాలీవుడ్ స్టార్ హీరోను వివాహమాడనుందని పుకార్లు షికార్లు కొడుతున్నాయి. వివరాల్లోకి వెళ్లితే..

సౌత్‌లోని అన్ని భాషల్లో నిక్కీ గల్రానీ సినిమాలు చేసింది. ‘యాగవరాయినుం నా కాక్క’ అనే తమిళ సినిమాలో ఆది పినిశెట్టి సరసన నిక్కీ నటించింది. ఈ చిత్రం తెలుగులోను ‘మలుపు’ పేరుతో విడుదలైంది. ఈ సినిమా చేస్తున్నప్పుడే నిక్కీకి, ఆదితో పరిచయం ఏర్పడిందట. అనంతరం ఆ పరిచయం కాస్తా.. ప్రేమగా మారిందని సమాచారం. దీంతో కొన్నేళ్లుగా వీళ్లు రిలేషన్‌షిప్‌ను కొనసాగిస్తున్నారని తెలుస్తోంది. ఈ బంధాన్ని మరో మెట్టు ఎక్కించాలని వీరు నిర్ణయించుకున్నారని కోలీవుడ్ వర్గాలు తెలుపుతున్నాయి. ఆది పినిశెట్టి ఇంట్లో 2020 జులైలో జరిగిన ఓ ఫంక్షన్‌కు కూడా ఆమె హాజరైంది. ఈ ఫంక్షన్ జరిగిన కొన్ని నెలలకు హైదరాబాద్ ఎయిర్‌పోర్టులో వీరు జంటగా దర్శనమివ్వడంతో.. ఈ వదంతులకు మరింత బలం చేకూరినట్లైంది. 

నిక్కీ గల్రానీ- ఆది పినిశెట్టి త్వరలోనే పెళ్లి చేసుకోబోతున్నారని ఈ జంటతో సన్నిహితంగా మెలిగే ఓ వ్యక్తి తెలిపారు. ‘‘ప్రస్తుతం నిశ్చితార్థానికి సంబంధించిన పనులు జరుగుతున్నాయి. ఈ ఫంక్షన్ సన్నాహాలను ఇప్పటికే మొదలుపెట్టారు. త్వరలోనే పెళ్లి జరిగే తేదీని నిర్ణయిస్తారు’’ అని కోలీవుడ్ వర్గాలు పేర్కొంటున్నాయి. ఈ వార్తలపై ఆది, నిక్కీ ఇప్పటి వరకు స్పందించలేదు. మరి ఈ జంట పెళ్లి చేసుకుంటారా, లేదా అనేది తెలియాలంటే మాత్రం కొంతకాలం ఆగాల్సిందే.  ‘సరైనోడు’, ‘నిన్ను కోరి’, ‘అజ్ఞాత వాసి’ వంటి సినిమాల్లో ఆది పినిశెట్టి నటించిన సంగతి అందరికీ తెలిసిందే.