నా బెస్ట్ క్రిటిక్ నా భార్యే: సుధీర్ బాబు

సుధీర్ బాబు హీరోగా చేసిన తొలి చిత్రం ‘శివ మనసులో శృతి’. 10 ఫిబ్రవరి 2012న విడుదలైంది. గురువారానికి ఆయ‌న సినిమాలలోకి వ‌చ్చి ప‌దేళ్ళు పూర్త‌వుతాయి. ప్రస్తుతం ఆయన ‘ఆ అమ్మాయి గురించి మీకు చెప్పాలి’ అనే రొమ్-కామ్‌లో చేస్తున్నారు. పదేళ్ళు పూర్తయిన సంద‌ర్భంగా సుధీర్ బాబు త‌న సినీ జ‌ర్నీని మీడియాతో పంచుకున్నారు. 

ఆయన మాట్లాడుతూ..

‘‘నటుడిగా 10 సంవత్సరాలు పూర్తయ్యాయి. వెనక్కి తిరిగి చూసుకుంటే, న‌టుడిగా వంద‌శాతం కష్టపడ్డాను. ఆ సంతృప్తి నాకు ఉంది. నేను చేసిన సినిమాల సంఖ్య, సంపాదించిన అభిమానుల సంఖ్య కంటే, నాకు నటుడిగా నేను సంపాదించిన గౌరవమే ముఖ్యం. ఈ జర్నీలో కొన్ని సినిమాలను వ‌దిలేశాను. మరికొన్నింటికి ప‌నిచేశాను. నా కెరీర్‌లో వైఫల్యాలు నాకు విలువైన పాఠాలు నేర్పాయి. స్క్రిప్ట్‌లను ఎలా ఎంచుకోవాలో నేర్చుకున్నాను. కథతో పాటు బడ్జెట్‌, టెక్నికల్ టీమ్‌ని కూడా పరిగణనలోకి తీసుకోవాలని గ్ర‌హించాను. మొద‌ట్లో ఇన్నేళ్ళ కెరీర్ ఉంటుందని రాలేదు. సినిమాపై త‌ప‌న‌తోనే వ‌చ్చాను. నాకు యాక్ష‌న్ సినిమాలంటే ఇష్టం. వాటిలో రాణిస్తానని అన్నారు. నేను నా హార్డ్ వ‌ర్క్‌ను న‌మ్ముతాను. నేను మొద‌ట్లో 60ల‌క్ష‌లు పెట్టి సినిమా తీశా.

మొదటి రోజు షూటింగ్‌లో.. సుధీర్‌బాబు సినిమా పరిశ్రమలో నిలదొక్కుకోవడం చాలా కష్టమని సెట్‌లో కెమెరామెన్ చెప్పడం విన్నాను. అదే ఆలోచించేలా చేసింది. నా బెస్ట్ ఇచ్చాను. పునరాలోచనలో, నాపై అతని ప్రతికూల విశ్వాసం నన్ను నేను నిరూపించుకోవ‌డానికి ప్రేరేపించింది. నాకంటూ గుర్తింపు, గౌరవం ఉండాల‌నే ఏకైక లక్ష్యంతో సినిమా రంగంలోకి అడుగుపెట్టాను. మా నాన్న బిజినెస్ చూసుకోమ‌న్నారు. కొన్నాళ్ళు చేశాక‌.. ఏదో సాధించాల‌ని ఈ రంగంలోకి వ‌చ్చాను. సినిమాల్లో ఎప్పుడూ ఖచ్చితమైన ప్రణాళిక లేదు. ఎప్పటికప్పుడు క‌థ‌ల ఎంపికలు చేసుకుంటూ ముందుకు సాగాను.

నాకు యాక్షన్ చిత్రాలంటే ఇష్టం. జాకీచాన్‌కి పెద్ద అభిమానిని. బెంచ్ మార్క్ యాక్షన్ సినిమాలు చేయబోతున్నాను. నటుడు-రచయిత-దర్శకుడు హర్షవర్ధన్‌తో ఓ సినిమా చేస్తాను. ‘లూజర్ 2’ (వెబ్ సిరీస్) దర్శకుడు నాతో ఓ సినిమా చేయనున్నాడు. కొత్త జోనర్‌లను ప్రయత్నించాలని ‘సమ్మోహనం’, ‘ప్రేమ కథా చిత్రమ్‌’ చేశాను. నేను హీరోగా ప్రారంభించాను కానీ నటుడిగా కూడా నిరూపించుకోవాలనుకున్నాను. అందుకే నేను హిందీలో ‘బాఘీ’ ఆఫ‌ర్ వ‌స్తే చేశాను, అందులో నాది చాలా మంచి పాత్ర. దర్శకుడు మోహనకృష్ణ ఇంద్రగంటి గారికి నన్ను సాఫ్ట్‌గా చూపించాల‌నే ఉండటంతో ‘స‌మ్మోహ‌నం’ చేశాను.

కెరీర్ ప‌రంగా.. కృష్ణ‌గారు, మ‌హేష్ నుంచి చాలా నేర్చుకున్నా. షూటింగ్ వున్నా.. సాయంత్రానికి కుటుంబంతో గ‌డిపేవారు. వారి నుంచి అవి నేర్చుకున్నా. నేను ఇంటికి తిరిగి వచ్చిన తర్వాత పని నుండి ఎలా స్విచ్ ఆఫ్ చేయాలో నేను కృష్ణ‌గారు నుండి నేర్చుకున్నాను. ‘ప్రేమ కథా చిత్రమ్’ విడుదలైనప్పుడు మహేష్ న‌న్ను మెచ్చుకున్నారు. గత పదేళ్లలో నేనెప్పుడూ మహేష్‌ని ఏ ఫేవర్ కోసం సంప్రదించలేదు. అది నేను పాటిస్తున్న సూత్రం. దర్శకనిర్మాతలు నా ప్రతిభను గౌరవిస్తున్నారు. అదే కారణంతో నాకు ఆఫర్లు వస్తున్నాయి. మంచి కథ దొరికితే మహేష్‌తో నటించాలనేది నా కోరిక. నా పిల్ల‌లు కూడా బాల‌న‌టులుగా చేస్తున్నారు. వారి అభిరుచి మేర‌కు ఏ రంగంలో ఉంటార‌నేది ముందు ముందు తెలుస్తుంది.

సినిమాల్లోకి రాకముందు బ్యాడ్మింటన్ ఆడాను. పుల్లెల గోపీచంద్ బయోపిక్ తెరకెక్కుతోంది. పెద్ద సంస్థ ముందుకు వ‌చ్చింది. త్వ‌ర‌లో సెట్ పైకి వెళ్ళ‌బోతోంది. పాన్ ఇండియా సినిమాలు చేయాలని వుంది. తెలుగులో పాన్ ఇండియా క‌థ‌లు ఉన్నాయి. నా సినిమాలన్నీ హిందీలోకి డబ్ అయి హిందీ ప్రేక్షకులు వీక్షించారు. ‘బాహుబలి’ రాకముందే ప్రభాస్, ఎస్ఎస్ రాజమౌళిల సినిమాలను హిందీ ప్రేక్షకులు వీక్షిస్తున్నారు. అందుకే బాహుబ‌లి అంత పెద్ద హిట్ అయింది. స్టార్ డైరెక్టర్స్ అందరితోనూ కలిసి పనిచేయాలని అనుకుంటున్నాను. కానీ కొత్త దర్శకులతో పనిచేయడం వ‌ల్ల చాలా కొత్త విష‌యాలు నేర్చ‌ుకునే అవ‌కాశం ఉంటుంది. నా బెస్ట్ క్రిటిక్ నా భార్యే. స్నేహితులు కూడా కొన్ని సూచ‌న‌లు చేస్తుంటారు. మీడియాలోనూ కొంద‌రు ఉన్నారు.

మొదటి రోజుల్లో నా వాయిస్‌కి మిశ్రమ స్పందన వచ్చిన మాట నిజం. నేను ఒకసారి నా వాయిస్‌ని మెరుగుపరచుకోవడానికి సూచనల కోసం ఆర్‌పి పట్నాయక్‌గారిని సంప్రదించాను. నా వాయిస్‌ని చక్కగా ట్యూన్ చేయడానికి నేను అతని సూచనలలో కొన్నింటిని అనుసరించాను. ఏ సినిమాకైనా డబ్బింగ్ పనులు ప్రారంభించే 2-3 రోజుల ముందు వాయిస్ ఎక్సర్‌సైజులు చేస్తాను..’’ అని తెలిపారు.