ఫుడ్ డెలివరీ బాయ్గా కపిల్ శర్మ.. ఎవరికీ చెప్పొద్దంటోన్న స్టార్ కమెడియన్..
ABN , First Publish Date - 2022-03-20T22:51:31+05:30 IST
బాలీవుడ్లో అందరికీ సుపరిచితమైన పేరు కపిల్ శర్మ
బాలీవుడ్లో అందరికీ సుపరిచితమైన పేరు కపిల్ శర్మ. కామెడీ షోలతో దేశ వ్యాప్తంగా అతడు గుర్తింపు తెచ్చుకున్నాడు. 2007లో ‘ది గ్రేట్ ఇండియన్ లాఫ్టర్ ఛాలెంజ్’ విజేతగా నిలిచాడు. ఆ తర్వాత పలు కామెడీ షోల్లో పాల్గొని అందరిని నవ్వించాడు. అనంతరం ‘కామెడీ నైట్స్ విత్ కపిల్ శర్మ’ టాక్ షోను నిర్వహించాడు. ఈ షో విజయవంతం కావడంతో స్టార్ కమెడియన్గా మారాడు. తాజాగా కపిల్ శర్మ ఫుడ్ డెలివరీ బాయ్గా మారాడు. ఈ ఫొటో నెట్టింట వైరల్గా మారింది. ఈ స్టార్ కమెడియన్ ఫుడ్ను ఎందుకు డెలివరీ చేస్తున్నాడో తెలుసుకోవాలనుందా..
నందితా దాస్ దర్శకత్వంలో కపిల్ ఓ సినిమా చేస్తున్నాడు. ఈ మూవీ షూటింగ్ ఒడిషాలోని భువనేశ్వర్లో జరుగుతుంది. ప్రస్తుతం కపిల్కు సంబంధించిన సీన్లను చిత్రీకరిస్తున్నారు. అందులో భాగంగానే అతడు ఫుడ్ను డెలివరీ చేస్తున్నాడు. ఈ సీన్ చేస్తున్న సమయంలోనే ఓ అభిమాని అతడిని ఫొటో తీశాడు. అనంతరం సోషల్ మీడియాలో కపిల్కు ట్యాగ్ చేశాడు. ‘‘లైవ్లో మిమ్మల్ని చూశాను సార్’’ అని ఫ్యాన్ కామెంట్ చేశాడు. ఆ కామెంట్కు స్టార్ కమెడియన్ రిప్లై ఇచ్చాడు. ‘‘ఎవరికీ చెప్పకు’’ అని కొంటెగా కపిల్ సమాదానమిచ్చాడు. ఈ మూవీ షూట్లో భాగంగా కపిల్, నందితా దాస్ ఒడిషా ముఖ్యమంత్రి నవీన్ పట్నాయక్ను కూడా కలిశారు.