మరోసారి రియల్ హీరో అనిపించుకున్న సోనూ సూద్

గత రెండేళ్లుగా కరోనా మహమ్మారి ప్రపంచాన్ని పీడిస్తోంది. దీంతో అన్ని దేశాల ప్రభుత్వాలూ కొంతకాలం లాక్‌డౌన్ విధించాయి. ఆ సమయంలో నిత్యావసరాలు తప్ప మిగిలిన రంగాలు అన్ని స్థంభించిపోయాయి. అన్నింటితో పాటు రవాణా వ్యవస్థ సైతం బంద్ కావడంతో ఎంతోమంది వలస కార్మికులు కాలినడకనే తమ సొంత ప్రాంతాలకు తరలి వెళ్లారు. ఆ తరుణంలో అలాంటి నిస్సహాయులకు సహాయం చేసిన సోనూ సూద్ రియల్ హీరో అనిపించుకున్నాడు. అనంతరం కూడా ఎంతోమంది పేదవారికీ ఆయన సహాయం చేశారు. ఈ నటుడు తాజాగా మరోసారి తనలోని మానవత్వాన్ని నిరూపించాడు.

పంజాబ్‌లోని మోగా ప్రాంతంలో ఫిబ్రవరి 7న ఓ రోడ్డు ప్రమాదం జరిగింది. అందులో 19 ఏళ్ల కుర్రాడు ఒకరు తీవ్రంగా గాయపడ్డాడు. ఆ సమయంలో అటుగా వెళుతున్న సోనూ అది చూసి అపస్మారక స్థితిలో ఉన్న ఆ కుర్రాడిని రక్షించాడు. అయితే యాక్సిడెంట్‌కి  గురైన ఆ కారుకి సెంట్రల్ లాక్ ఉండడంతో అతన్ని బయటికి తీయడం కొంచెం కష్టమయ్యింది. కానీ కష్టపడి బాధితున్ని బయటికి తీసిన ఈ నటుడు అతన్ని వెంటనే దగ్గరలోని హాస్పిటల్‌కి తరలించాడు. దీంతో సరైన సమయానికి వైద్యం అందడంతో ఆ కుర్రాడు కోలుకుంటున్నాడు.