‘శ్యామ్ సింగరాయ్’ ఫస్ట్ సింగిల్ ఎప్పుడంటే..?

నేచురల్ స్టార్ నాని, సాయి పల్లవి, కృతి శెట్టి, మడోన్నా సెబాస్టియన్‌ హీరోహీరోయిన్లుగా నిహారిక ఎంటర్‌టైన్‌మెంట్స్ బ్యానర్‌పై వెంకట్ బోయనపల్లి నిర్మించిన చిత్రం ‘శ్యామ్ సింగరాయ్’. టాలెంటెడ్ డైరెక్టర్ రాహుల్ సంకృత్యాన్ దర్శకత్వంలో రూపొందుతోన్న ఈ చిత్రంలోని ఫస్ట్ సింగిల్ విడుదలకు సంబంధించిన వివరాలను తెలుపుతూ చిత్రయూనిట్ శనివారం ఓ ప్రోమోని విడుదల చేసింది.

‘రైజ్ ఆఫ్ శ్యామ్’ అంటూ విడుదల చేయనున్న ఈ లిరికల్ వీడియో సాంగ్ ప్రోమో అందరినీ ఆకట్టుకుంటుంది. నవంబర్ 6న ఈ ఫస్ట్ సింగిల్ రాబోతోందని ప్రకటించారు. శ్యామ్ పాత్రకు సంబంధించిన క్యారక్టరైజేషన్‌ని తెలియజేసేలా ఆ పాట సాగుతుంది. ఈ మేరకు విడుదల చేసిన పోస్టర్‌లో హీరో నాని కుర్చీలో కూర్చుని.. చేతిలో సిగరెట్ పట్టుకుని.. సీరియస్ లుక్కుతో కనిపిస్తున్నారు. సత్యదేవ్ జంగా కథతో వస్తోన్న ఈ చిత్రానికి మిక్కీ జే మేయర్ మ్యూజిక్ అందిస్తున్నారు. భారీ స్థాయిలో క్రిస్మస్ కానుకగా.. తెలుగు, తమిళ, కన్నడ, మళయాల భాషల్లో డిసెంబర్ 24న ఈ చిత్రాన్ని విడుదల చేయబోతున్నట్లుగా మేకర్స్ ప్రకటించారు.