రీ ఎంట్రీ ఇస్తున్న ‘రామ్ తేరీ గంగా మైలీ’ నటి

నిన్నటి తరం తారలందరూ బాలీవుడ్‌లోకి రీ ఎంట్రీ ఇస్తున్నారు. ఈ జాబితాలోకి మరో నటి చేరబోతుంది. ఆమెవరో కాదు రాజ్ కపూర్ దర్శకత్వం వహించిన ‘రామ్ తేరీ గంగా మైలీ’లో నటించి పేరు ప్రఖ్యాతలు సంపాదించుకున్న నటి మందాకిని. ఓ మ్యూజిక్ వీడియో ద్వారా ఆమె వెండితెర పైకి తిరిగి రంగప్రవేశం చేయనుంది. ‘మా ఓ మా’ అనే మ్యూజిక్ వీడియోలో ఆమె నటించనుంది. ఈ పాట ద్వారానే మందాకిని కొడుకు రబ్బిల్ ఠాకూర్ కూడా ఎంట్రీ ఇవ్వనున్నాడు. మందాకిని ఏప్రిల్ చివరి వారంలో మ్యూజిక్ వీడియో షూటింగ్ మొదలుపెట్టనుంది. సాజన్ అగర్వాల్ ఈ సాంగ్‌కు లిరిక్స్‌ రాయడంతో పాటు డైరెక్షన్ కూడా చేశాడు. బబ్లీ హక్, మీరా ఈ పాటకు మ్యూజిక్‌ను అందించనున్నారు. 

కొత్త ప్రయాణం ప్రారంభిస్తున్న సందర్భంగా మందాకిని మీడియాతో ముచ్చటించింది. ‘‘నాకు సాజన్ అగర్వాల్ చాలా కాలంగా తెలుసు. అతడితో పనిచేయడం ఎంతో సంతోషంగా ఉంది. ‘మా ఓ మా’ అద్భుతమైన పాట. నేను వినగానే ఫిదా అయిపోయాను. నా కుమారుడు రబ్బిల్ ఈ పాటలో ప్రధాన పాత్రలో కనిపిస్తాడు. ఏప్రిల్ చివరి వారంలో పాట షూటింగ్‌ను ప్రారంభిస్తాం’’ అని మందాకిని పేర్కొంది. కైలాశ్ రాయ్గర్ గురు ఈ పాటకు నిర్మాతగా వ్యవహరిస్తున్నారు. ఫిల్మిక్లాప్ ప్రొడక్షన్ హౌస్ పతాకంపై తెరకెక్కిస్తున్నారు.