మరోసారి డైరెక్టర్‌గా మారనున్న ధనుష్..?

బాక్సాఫీస్ హిట్‌లతో సంబంధం లేకుండా ప్రయోగాత్మక చిత్రాలు చేసే నటుడు ధనుష్. బాలీవుడ్ నుంచి హాలీవుడ్ వరకు అన్ని ఇండస్ట్రీల్లో సినిమాలు చేస్తున్నాడు. అతడు మరోసారి డైరెక్టర్‌గా మారనున్నట్టు సమాచారం. ఓ ప్రాజెక్టును తెరకెక్కించే ఆలోచనలో ధనుష్ ఉన్నట్టు తెలుస్తోంది.  

ధనుష్ గతంలో ‘పవర్ పాండి’ అనే సినిమాకు దర్శకత్వం వహించాడు. రాజ్ కిరణ్, రేవతి కీలక పాత్రల్లో నటించిన ఈ చిత్రం రొమాంటిక్ ఎంటర్ టైనర్‌గా తెరకెక్కింది. ఈ మూవీ 2017లో విడుదల కాగా బాక్సాఫీస్ వద్ద భారీ విజయాన్ని నమోదు చేసింది. ‘పవర్ పాండి’కీ అభిమానుల మన్ననలతో పాటు, విమర్శకుల ప్రశంసలు కూడా దక్కాయి. ధనుష్ అదే ఉత్సాహంతో డైరెక్టర్‌గా ఓ మల్టీ స్టారర్‌ను పట్టాలెక్కించాడు. నాగార్జున, ఎస్.జే. సూర్య, శ్రీకాంత్, శరత్ కుమార్, అదితి రావ్ హైదరీ ఈ చిత్రంలో నటించారు. శ్రీ తేనాండ్రల్ స్టూడియోస్ ఈ మూవీకీ నిర్మాతగా వ్యవహరించింది. కానీ, అనుకోని కారణాల వల్ల ఈ చిత్రానికి బ్రేక్ పడింది. తాజాగా కోలీవుడ్ మీడియా నుంచి అందుతున్న సమాచారం ప్రకారం.. ధనుష్ త్వరలోనే ఓ ప్రాజెక్టుకు దర్శకత్వం వహించబోతున్నట్టు తెలుస్తోంది. ఈ విషయాన్ని తమిళ నటుడైన రోబో శంకర్ ఓ షోలో చెప్పాడు. ఈ సినిమాలో ధనుష్ టైటిల్ రోల్‌లో నటించనున్నట్టు తెలిపాడు. తనతో పాటు రామర్ కూడా ఈ మూవీలో కీలక పాత్రలు పోషించనున్నారని రోబో శంకర్ స్పష్టం చేశాడు. గతంలో తాను దర్శకత్వం వహించిన మల్టీస్టారర్ ప్రాజెక్టునే ధనుష్ తిరిగి ప్రారంభించనున్నట్టు కూడా వార్తలు వెలువడుతున్నాయి. ఈ సినిమాలోనే రామర్, రోబో శంకర్ నటించనున్నట్టు పుకార్లు షికార్లు చేస్తున్నాయి.