‘న్యూటన్’ పాన్ కార్డు దుర్వినియోగం

బాలీవుడ్‌లో విభిన్నమైన పాత్రలు పోషిస్తూ ప్రయోగాత్మక సినిమాలకు కేరాఫ్ అడ్రస్‌గా నిలిచిన నటుడు రాజ్ కుమార్ రావ్. ‘క్వీన్’, ‘న్యూటన్’, ‘స్త్రీ’, ‘లూడో’ వంటి చిత్రాలతో అభిమానులను అలరించాడు. ఈ మధ్యనే ‘బధాయి దో’ మూవీతో ప్రేక్షకులను పలకరించాడు. తన పాన్ కార్డు దుర్వినియోగమైందని తాజాగా రాజ్‌కుమార్ రావ్ ఆరోపించాడు. ఈ విషయాన్ని తెలుపుతూ సోషల్ మీడియాలో ఓ పోస్ట్ పెట్టాడు. 

‘‘నా పాన్ కార్డు దుర్వినియోగమైంది. నా పేరును ఉపయోగించుకుని రూ.2500లను లోన్‌గా తీసుకున్నారు. దీంతో నా క్రెడిట్ స్కోర్‌పై ప్రభావం పడింది. ముందు జాగ్రత్త చర్యలు తీసుకుని, ఈ సమస్యను పరిష్కరించాలని సిబిల్‌ను కోరుతున్నాను’’ అని రాజ్ కుమార్ రావ్ తెలిపాడు. బాలీవుడ్ అందగాడు ఈ ఏడాది రెండో సారి మోసపోయాడు. అంతకు ముందు.. తన పేరును కొందరు దుర్వినియోగం చేశారని.. రూ.3కోట్ల మేరకు మోసం చేసే ఉద్దేశంతో ఇతరులకు మెయిల్ పంపిచారని రాజ్ కుమార్ రావ్ పేర్కొన్నాడు. ఇక కెరీర్ విషయానికి వస్తే.. రాజ్ కుమార్ రావ్ ఈ మధ్యనే ‘బధాయి దో’ చిత్రంతో అభిమానులను అలరించాడు. ఈ మూవీలో భూమి ఫడ్నేకర్ కీలక పాత్ర పోషించింది. ‘మోనికా’, ‘ఓ మై డార్లింగ్’ అనే ప్రాజెక్టులు కూడా అతడి చేతిలో ఉన్నాయి. ఈ సినిమాలు 2022లోనే విడుదల కానున్నాయి.