బాలీవుడ్‌లో రేపటి నుంచి RRR కు కలెక్షన్లు తగ్గుతాయా..? రాజమౌళి సినిమాకు పోటీగా..

‘ఆర్‌ఆర్‌ఆర్‌’.. మరోసారి తెలుగు సినిమాకు జాతీయ స్థాయిలో గుర్తింపు తెచ్చిపెట్టిన చిత్రం ఇది. బాహుబలి తర్వాత ఎస్‌ఎస్ రాజమౌళి దర్శకత్వం వహించిన ఈ చిత్రం బక్సాఫీసు వద్ద కలెక్షన్ల సునామీ సృష్టిస్తోంది. మార్చి 25న విడుదలైన ఈ పాన్‌ ఇండియా మూవీ రూ.500 కోట్లకు పైగా వసూళ్లు రాబట్టింది. ఇక ఈ సినిమా హిందీ బెల్ట్‌లో సైతం రూ.100 కోట్లకు పైగా కలెక్షన్స్‌ కొల్లగొట్టింది. ప్రస్తుతం ఎక్కడ చూసిన ఆర్‌ఆర్‌ఆర్‌ మానియానే కనిపిస్తోంది. అయితే ఎన్టీఆర్, రామ్ చరణ్ హీరోలుగా నటించిన ఈ చిత్రానికి కొత్తగా ఓ ప్రమాదం వచ్చిపడింది. అదే జాన్ అబ్రహాం నటించిన ‘ఎటాక్’.

జాన్ అబ్రహాంకి బాలీవుడ్‌లో మంచి ఫ్యాన్ ఫాలోయింగ్ ఉంది. యాక్షన్ సిక్వెన్స్‌లతో ప్రేక్షకులను అలరిస్తూ ఉంటాడు. ఈ హీరోగా తాజాగా నటించిన చిత్రం ‘ఎటాక్’ ఏప్రిల్ 1న విడుదల కానుంది. జాన్ నటించిన సత్యమేవ జయతే 2, బాట్లా హౌస్, పర్మా వంటి చిత్రాలు కరోనా టైంలో విడుదలై కూడా మంచి విజయాలను అందుకున్నాయి. దీంతో ఈ సినిమా ఎఫెక్ట్ ‘ఆర్ఆర్ఆర్’ సినిమాపై ఉండే అవకాశం ఉందని సినీ విశ్లేషకులు అంచనా వేస్తున్నారు.

రకుల్ ప్రీత్ సింగ్, జాక్వెలిన్ ఫెర్నాండెజ్ హీరోయిన్లుగా నటించిన ‘ఎటాక్’ ట్రైలర్ ఇటీవలే విడుదలై మంచి రెస్పాన్స్ అందుకుంది. దీంతో ఈ సినిమాపై జాన్ అభిమానులకు భారీ అంచనాలు ఏర్పాడ్డాయి. కాబట్టి ఈ సినిమా మంచి ఓపెనింగ్స్‌నే రాబట్టే అవకాశం ఉంది. ఈ సినిమాకి ఒకవేళ హిట్ టాక్ వస్తే మాత్రం హిందీ బెల్ట్‌లో ‘ఆర్ఆర్ఆర్’ కలెక్షన్లపై ప్రభావం పడే అవకాశాలు మెండుగా ఉన్నాయి. అంతేకాకుండా జాన్ సినిమా సైతం యాక్షన్ ఎంటర్‌టైనర్ కావడం కూడా దీనికి ఉపకరించవచ్చు.