ఎక్కుపెట్టిన రామబాణం

రామాయణ ఇతిహాసం నేపథ్యంగా ప్రభాస్‌ హీరోగా బాలీవుడ్‌ దర్శకుడు ఓం రౌత్‌ రూపొందిస్తున్న ప్రతిష్ఠాత్మక చిత్రం ‘ఆదిపురుష్‌’. కృతి సనన్‌ కథానాయికగా నటిస్తున్న ఈ చిత్రంలో సైఫ్‌ అలీఖాన్‌, సన్నీ సింగ్‌ ఇతర కీలక పాత్రలను పోషిస్తున్నారు. అత్యున్నత సాంకేతిక విలువలతో, భారీ బడ్జెట్‌తో టీ సిరీస్‌, రెట్రో ఫైల్స్‌ సంస్థలు ఈ  చిత్రాన్ని నిర్మిస్తున్నాయి. ఈ చిత్రనిర్మాణంలో యూవీ క్రియేషన్స్‌ అధినేతలు వంశీ, ప్రమోద్‌ కూడా భాగస్వాములు. ఈ సినిమా కోసం దేశవ్యాప్తంగా ప్రేక్షకులు ఎంతో ఆసక్తితో ఎదురు చూస్తున్నారు. గురువారం ఉదయం ఈ మూవీ నుంచి ప్రభాస్‌ పోస్టర్‌ను విడుదల చేశారు. బాణాన్ని ఆకాశం వైపు ఎక్కు పెట్టినట్లు ఈ పోస్టర్‌లో ఉంది. చెడుపై మంచి విజయం సాధించేందుకు శ్రీరాముడి పాత్రలో ప్రభాస్‌ ఎలాంటి ధర్మ పోరాటం చేశారనేది ఈ చిత్రంలో మెయిన్‌ పాయింట్‌. శ్రీరాముడు జన్మించిన అయోధ్యలో ఆదివారం సాయంత్రం ఏడు గంటలకు ‘ఆదిపురుష్‌’ టీజర్‌ విడుదల చేయనున్నారు. ఐ మ్యాక్స్‌ ఫార్మెట్‌తో పాటు త్రీ డీలో కూడా ‘ఆదిపురుష్‌’ చిత్రాన్ని వచ్చే ఏడాది జనవరి 12న విడుదల చేయనున్నారు.