4 పెద్దవి.. 10 చిన్నవి: Sunil

ABN , First Publish Date - 2022-05-15T03:05:58+05:30 IST

సక్సెస్ ఫుల్ చిత్రాల నిర్మాత దిల్ రాజు (Dil Raju) సమర్పణలో.. విక్టరీ వెంకటేష్ (Victory Venkatesh), మెగా ప్రిన్స్ వరుణ్ తేజ్ (Mega Prince Varun Tej) హీరోలుగా.. అనిల్ రావిపూడి (Anil Ravipudi) దర్శకత్వంలో శ్రీ వెంకటేశ్వర క్రియేషన్స్ (SVC) బ్యానర్..

4 పెద్దవి.. 10 చిన్నవి: Sunil

సక్సెస్ ఫుల్ చిత్రాల నిర్మాత దిల్ రాజు (Dil Raju) సమర్పణలో.. విక్టరీ వెంకటేష్ (Victory Venkatesh), మెగా ప్రిన్స్ వరుణ్ తేజ్ (Mega Prince Varun Tej) హీరోలుగా.. అనిల్ రావిపూడి (Anil Ravipudi) దర్శకత్వంలో శ్రీ వెంకటేశ్వర క్రియేషన్స్ (SVC) బ్యానర్ పై శిరీష్ నిర్మించిన భారీ మల్టీస్టారర్ చిత్రం ‘ఎఫ్ 3’ (F3). ప్రేక్షకులకు నవ్వులు పంచడానికి మే 27న ప్రపంచవ్యాప్తంగా భారీగా ఈ చిత్రం విడుదల కాబోతోంది. ప్రస్తుతం ఈ చిత్రానికి సంబంధించి  ప్రమోషన్ కార్యక్రమాలు జోరుగా సాగుతున్నాయి. అవుట్ అండ్ అవుట్ ఎంటర్‪టైనర్‪గా తెరకెక్కిన ఈ చిత్రంలో ఈసారి సునీల్ కూడా భాగమయ్యారు. ‘ఎఫ్ 3’ ప్రమోషన్స్‪లో భాగంగా సునీల్ (Sunil) మీడియాకు చిత్ర విశేషాలను తెలిపారు. ఆయన తెలిపిన ‘ఎఫ్ 3’ విశేషాలివే..


దాదాపు 25ఏళ్ల సినీ ప్రయాణం. ఇది మీకు సిల్వర్ జూబ్లీ ఇయర్.. ఈ ప్రయాణం ఎలా సాగింది?

నా సినీ ప్రయాణం విలక్షణంగా సాగుతుంది. మొదట కమెడియన్‪గా చేశాను. తర్వాత హీరో. నాలో వున్న హిడెన్ ట్యాలెంట్ డ్యాన్స్‪ని బయటపెట్టాను. ఇంత లావు వున్న నేను సిక్స్ ప్యాక్ చేశాను. తర్వాత విలన్‪గా మారాను. పుష్పలో నా వయసుకు మించిన పాత్ర చేశాను. నేను ఏది చేసినా ప్రేక్షకులు గొప్పగా ఆదరించారు. వారు ఆదరించడం వల్లనే నా ప్రయాణం ఇంత విలక్షణంగా సాగింది. నన్ను ఇంతలా ఆదరిస్తున్న ప్రేక్షకులకి మరోసారి కృతజ్ఞతలు తెలుపుతున్నాను.


‘ఎఫ్ 3’లో ఎలా భాగమయ్యారు?

‘కామెడీ రాసే వాళ్ళు తగ్గిపోయారు. మనం కలసి చేస్తే బావుంటుంది కదా’ అని ‘సరిలేరు నీకెవ్వరు’ సినిమా షూటింగ్ సమయంలో దర్శకుడు అనిల్ రావిపూడితో చెప్పా. ‘తప్పకుండా చేద్దాం అన్నగారు.. మీరు చేసిన సొంతం సినిమా పదేపదే చూస్తుంటా. మీ టైమింగ్‪లోనే మాట్లాడుతుంటాం. మనం కలసి చేద్దాం’ అన్నారు అనిల్. చెప్పినట్లే ఎఫ్ 3లో మంచి పాత్ర ఇచ్చారు. ఎఫ్ 3లో వింటేజ్ సునీల్‪ని చూస్తారు.


‘ఎఫ్ 3’లో మీ పాత్ర సినిమా అంతటా ఉంటుందా?

సినిమా అంతా ఉంటుంది. ఐతే ఫస్టాఫ్‪లో ఎక్కువ సోలో పెర్ఫార్మెన్స్‪కి అవకాశం వుంటుంది. సెకండాఫ్ వచ్చేసరికి గ్రూప్ కామెడీగా ఉంటుంది. నేనూ, వరుణ్ తేజ్ ఒక బ్యాచ్.. వెంకటేష్ గారు , రఘుబాబు ఒక బ్యాచ్.. తమన్నా ఫ్యామిలీ ఒక బ్యాచ్.. పృథ్వీగారు, స్టంట్ శివ ఒక  బ్యాచ్.. మురళి శర్మ, శ్రీకాంత్ అయ్యంగార్ ఒక బ్యాచ్.. వెన్నల కిషోర్, రాజేంద్రప్రసాద్‪గారు ఒక బ్యాచ్.. మళ్ళీ అందరం కలసి ఒక బ్యాచ్. అందరం కలిసిన తర్వాత కామెడీ మాములుగా వుండదు. నాన్ స్టాప్ నవ్వులే. ఎఫ్ 2కి మించిన ఫన్ ఎఫ్3లో వుంటుంది.


ఎఫ్2 - అంటే ఫన్ అండ్ ఫ్రస్ట్రేషన్.. మరి ఎఫ్3 అంటే మీరేం చెప్తారు?

ఫన్ అండ్ ఫ్రస్ట్రేషన్.. మూడు రెట్లు (నవ్వుతూ). ఐతే ఫ్రస్ట్రేషన్‪లో కూడా ఫన్ వుంటుంది. ఫ్యామిలీ అంతా థియేటర్‪కి వెళ్లి గట్టిగా నవ్వుకొని మళ్ళీ వెళ్దాం అనుకునే సినిమా ‘ఎఫ్ 3’.


వరుణ్ తేజ్ కాంబినేషన్‪లో చేశారు కదా.. ఆయనలో మీకు నచ్చిన బెస్ట్ క్వాలిటీ?

వరుణ్ తేజ్ అప్పియరెన్స్ చూస్తే రష్యా సినిమాలో కూడా హీరోగా పెట్టేయవచ్చు. హాలీవుడ్ కటౌట్ ఆయనది. అలాంటి అప్పియరెన్స్ వున్న వరుణ్ గారు.. ఒక మిడిల్ క్లాస్ రోల్ చేయడం సర్‪ప్రైజింగ్‪గా అనిపిస్తుంది. చాలా మంచి వ్యక్తి. చిన్నప్పటి నుంచి తెలుసు. హీరో అయిన తర్వాత కూడా ఎలాంటి మార్పు లేదు. ‘అన్నా’ అని పిలుస్తారు. వరుణ్‪గారిలో చాలా ఫన్ వుంది. ఈ సినిమాతో అది బయటికి వచ్చింది. దీని తర్వాత ఆయన నుండి ఫన్ ఓరియంటెడ్ సినిమాలు కూడా వస్తాయి.


‘ఎఫ్3’ లో మీరు ఫేస్ చేసిన ఛాలెంజ్ ఏంటి?

‘ఎఫ్ 3’, ‘పుష్ప’..  ఒకే సమయంలో షూట్స్‪లో పాల్గొన్నా. రెండూ డిఫరెంట్ రోల్స్. ఒకటి కామెడీ, రెండు విలనీ. పొద్దున్న కామెడీ చేసి.. రాత్రికి విలనీ చేయడం కాస్త ఛాలెంజింగ్‪గా అనిపించింది.


‘ఎఫ్3’తో సునీల్ ప్రేక్షకులకు ఎలాంటి వినోదాన్ని ఇవ్వబోతున్నారంటే?

ప్రేక్షకులు ఇదివరకటి సునీల్‪ని చూస్తారు. ఇప్పుడు అంతా నేచురల్ కామెడీ అంటున్నారు. ఇక్కడ ఒక విషయం చెప్పాలి. నేచురాలిటీ లొకేషన్‪పై ఆధారపడివుంటుంది. మా ఊరికి వెళితే యాసతో ఇంకా వెటకారంగా మాట్లాడతారు. అక్కడ పరిస్థితులు అలా వుంటాయి. ఇక్కడకి వచ్చేసరికి యాస కొంచెం తగ్గుతుంది. ఐతే అది అసహజం అనుకుంటే.. హిందీ సినిమాలు చూసి హాలీవుడ్ వాళ్ళు అసహజం అనుకుంటారు. తండ్రిపోయి మనం ఏడుస్తుంటే ఆ సీన్ చూసి హాలీవుడ్ ప్రేక్షకుడు.. వీళ్ళకేమైనా మానసిక రోగం వచ్చిందా అనుకుంటాడు. పరిస్థితులు, ప్రాంతాలను బట్టి మార్పు వుంటుంది. సినిమా అనేది అల్టీమేట్‪గా వినోదం. కష్టపడి పని చేసిన తర్వాత మనిషి రిలాక్స్ అవ్వాలి. అలా రిలాక్స్ అవ్వాలంటే కామెడీ సినిమాలే ఎక్కువ రావాలి. ప్రతి రోగానికి మందు నవ్వు. నేను అదే నమ్ముతా.


ఇప్పుడు కామెడీ సినిమాలు చేసే దర్శకులు తగ్గిపోయారు కదా.. ఆర్టిస్ట్‪గా మీ మీద ఎలాంటి ప్రభావం వుంటుంది?

నామీద కంటే ప్రేక్షకుల మీద ఆ ప్రభావం ఎక్కువ వుంటుంది. నవ్వించే సినిమాలు చేయడం అంత తేలిక కాదు. నవ్వించడం కూడా అంత తేలిక కాదు. సరదాగా నవ్వుకొని వుంటే ఇమ్యునిటీ పెరుగుతుందని డాక్టర్లు కూడా చెప్తున్నారు కదా.  సో.. కామెడీ సినిమాలు ఎక్కువ రావాలి. ప్రేక్షకులని నవ్వించాలి. సీరియస్ పాత్రలతో పోల్చుకుంటే కామెడీ చేయడమే కష్టం. అన్ని జోనర్ సినిమాలూ రావాలి. కానీ కామెడీ సినిమాలకే ఎక్కువ ప్రాధాన్యత ఇవ్వాలని కోరుకుంటాను.


సీరియస్ రోల్స్ ఈజీ అంటున్నారు. ‘కలర్ ఫోటో’లో చాలా సెటిల్‪గా చేశారు. దీనికి కూడా క్రాఫ్ట్ మీద కంట్రోల్ కావాలి కదా?

నిజమే. అయితే ఆ క్రెడిట్ ఇప్పుడు వస్తున్న యంగ్ దర్శకులకు దక్కుతుంది. నా సినిమాలు స్కూల్, కాలేజీ డేస్‪లో చూశారు. ఇప్పుడు వాళ్ళు అప్డేట్ వర్షన్. నన్ను కొత్తగా చూపించే ప్రయత్నం చేస్తున్నారు. అలా వచ్చిందే ‘కలర్ ఫోటో’.


విలన్ అవుదామని ఇండస్ట్రీ‪కి వచ్చారు. ‘పుష్ప’లో చేసిన పాత్ర మీ డ్రీమ్‪ని పూర్తి చేసిందని భావిస్తున్నారా?

అవును. ‘పుష్ప’.. నాలోని మరో కోణాన్ని ఆవిష్కరించింది. నా కెరీర్‪లో మర్చిపోలేని పాత్ర అది. ‘పుష్ప 2’లో కూడా నా పాత్ర ఉంటుంది.


సంపూర్ణ నటుడు అయ్యారని అనుకుంటున్నారా?

లేదండీ. ఇది మహా సముద్రం. కమల్ హాసన్‪గారి నాలుగు సినిమాలు చూస్తే చాలు. అందులో మనం ఇంకా చేయలేనివి వంద కనిపిస్తాయి. ఐతే విలక్షణ పాత్రలు చేసే అవకాశం వచ్చింది.


ఇతర భాషల నుంచి అవకాశాలు వస్తున్నాయా?

తమిళ్, కన్నడ, బాలీవుడ్ నుంచి విలన్ పాత్రలకు సంప్రదించారు. బాలీవుడ్ నుంచి కొన్ని కామెడీ రోల్స్ కూడా ఆఫర్స్ వచ్చాయి. రెండు ఓకే చేశా. త్వరలోనే వివరాలు చెప్తా.


‘ఎఫ్3’లో  తమన్నా, మెహ్రీన్, సోనాల్ చౌహాన్ ముగ్గురు హీరోయిన్స్ .. వీరిలో మీరు గమనించిన బెస్ట్ క్వాలిటీస్?

తమన్నా గారు హైలీ ఎనర్జిటిక్, ఇంటిలిజెంట్.మెహ్రీన్‪లో తెలియని అమాయకత్వం వుంటుంది. సోనాల్ చౌహాన్ చాలా సెన్సిబుల్, షార్ప్.


ఎక్కువ కామెడీ సినిమాలు రావాలని కోరుకుంటున్నారు కదా.. మీ వరకూ ఏం ప్లాన్స్ చేస్తున్నారు?

నిజానికి నేను ప్లాన్ చేయడం మానేశాను. నా కోసం నేచర్ ఏం ప్లాన్ చేస్తుందో గుర్తిస్తున్నాను. కామెడీ చేయమన్నా ఓకే, పదహారేళ్ళ అమ్మాయికి ఫాదర్‪గా చేయమన్నా ఓకే. అయితే వచ్చిన అవకాశానికి న్యాయం చేయడానికి వంద శాతం కష్టపడతాను. ఐతే నా వరకూ కామెడీ చేసి నవ్వించడమే ఇష్టం.


ఒక పాత్ర చెప్పినపుడు మీ వెటకారం, బాడీ లాంగ్వేజ్ జోడిస్తారా? లేదా దర్శకుడు చెప్పినట్లు మౌల్డ్ అవుతారా?

కొన్ని మనల్ని అనుకోని రాస్తారు. కొన్ని మనం ఏమైనా చేస్తామని రాసి తెస్తారు. నా వరకూ అవతలి నుండి ఏదైనా వస్తేనే రియాక్షన్ వస్తుంది. ఏదైనా స్పాంటేనియస్‪గా రావాల్సిందే. అంతేకాని కూర్చుని అమరకావ్యాలు రాసే టైపు కాదు. ప్లాన్ చేస్తే ఒక్క ముక్కరాదు (నవ్వుతూ).


‘ఎఫ్ 3’ ట్రైలర్‪లో మీరు చెప్పిన ‘ఆడాళ్ళు బంగారం చూస్తే సైకోలు అయిపోతారు’  డైలాగ్ బాగా పేలింది. నిజ జీవితంలో మీ వైఫ్‪కి ఏ సందర్భాల్లో బంగారం కొనిచ్చారు..  రియాక్షన్ ఏంటి?

ఒకసారి కొని తీసుకెళ్ళాను. ‘మీకు నచ్చిన డిజైన్ తీసుకురావద్దు, మళ్ళీ మాకు నచ్చక మార్చుకోవడం పెద్ద తలనొప్పి. డబ్బులు ఇచ్చేయండి చాలు. నచ్చింది కొనుక్కుంటాం’ అన్నారు. అంతే, ఆ తర్వాత ఎప్పుడూ తీసుకెళ్లలేదు( నవ్వుతూ).. చీరల విషయంలో కూడా ఇదే జరుగుతుంది.


మీ స్నేహితుడు త్రివిక్రమ్ సినిమా ఎప్పుడు చేస్తున్నారు?

తన కొత్త సినిమాలో నేను వుంటాను. అవకాశం వున్న ప్రతి చోట నన్ను పెట్టాలని ప్రయత్నిస్తుంటారు. ఆఖరికి ‘భీమ్లా నాయక్’ సాంగ్‪లో కూడా పెట్టారు (నవ్వుతూ).


దర్శకుడు అనిల్ రావిపూడితో వర్క్ చేయడం ఎలా అనిపించింది?

చాలా రోజుల తర్వాత అవుట్ అండ్ అవుట్ కామెడీ చేస్తున్నాం. ఈ మధ్య నెట్ ప్రాక్టీస్ తప్పింది కదా.. చిన్న  భయం వుంటుంది. అయితే దర్శకుడు అనిల్ రావిపూడిని చూస్తే ఆ భయం పోయింది. అనిల్ గ్రేట్ ఆల్‪రౌండర్. తన కాలేజీ డేస్‪లో మాకులానే స్టేజ్ షోలు చేసి వచ్చాడు. అనిల్ లో గ్రేట్ ఆర్టిస్ట్ వున్నాడు. అతనే చేసి చూపిస్తాడు. నా టైమింగ్ నా కంటే అనిల్‪కే బాగా తెలుసు. ఛార్లీ చాప్లీన్‪లా యాక్ట్ చేసే పోటీలో ఛార్లీ చాప్లీన్‪కే సెకండ్ ప్రైజ్ వచ్చినట్లు.. నా టైమింగ్‪ని అంతలా పట్టేశారు. ఎలాంటి పరిస్థితిలోనైనా నవ్వుతూనే ఉంటాడు. ఇంతమంది స్టార్ కాస్ట్‪తో ఈ మధ్య కాలంలో ఎవరూ సినిమా తీయలేదు. ఒకవేళ తీసిన ఇంతమంది ఆర్టిస్ట్‪లకి వేరే సినిమాలకి సర్దుబాటు చేస్తూ తీయలేదు. అనిల్‪ని చూసిన వెంటనే ఒక పాజిటివ్ ఎనర్జీ, స్మైల్ వస్తుంది. అది నాకు బాగా నచ్చింది. ఆయన సక్సెస్ సీక్రెట్ కూడా ఇదే. ఆయన ఎంత ఎనర్జిటిక్, పాజిటివ్‪గా ఉంటారో ఆయన సినిమాలు కూడా అలానే వుంటాయి.


ఈ సినిమాలో వెంకటేష్ , వరుణ్ తేజ్ ఫెర్ఫార్మెన్స్ ఎలా ఉండబోతుంది?

వెంకటేష్‪గారి టైమింగ్ గురించి మళ్ళీ ప్రత్యేకంగా చెప్పాల్సిన పని లేదు. ‘ఎఫ్ 3’లో ఆయన స్టీల్ ది షో.  వరుణ్ తేజ్‪గారిని ఇప్పటివరకూ ఇంత కామెడీ చేసిన రోల్‪లో చూసి వుండరు. ఎఫ్ 3 గురించి ఒక్క మాటలో చెప్పాలంటే నాన్ స్టాప్‪గా నవ్వుతూనే వుంటారు. ఈ సినిమాకి ఖచ్చితంగా రిపీట్ ఆడియన్స్ వుంటారు.


డబ్బే మనిషిని శాసిస్తుందని ‘ఎఫ్ 3’ ట్రైలర్‪లో చూపించారు కదా .. దీనికి మీరేం చెప్తారు?

కలియుగంలో డబ్బే మనిషిని శాసిస్తుంది కదా.. డబ్బే అన్నిటికి మూలమైపోయింది. అయితే నేను హ్యూమన్ రిలేషన్స్‪కి ప్రాధాన్యత ఇస్తా. నాకు వ్యాపారం చేతకాదు. డబ్బుల లెక్కలు అంతగా రావు. బాత్ రూమ్ కట్టాలన్నా కోటి రూపాయిలు వేసేయవచ్చు (నవ్వుతూ).  ఏం వ్యాపారం చేసినా ఎంతో కొంత అబద్దం ఆడాలి. అది మళ్ళీ మన పిల్లలకి తగులుతుందని భయపడి నవ్వించి డబ్బులు సంపాదించాలని ఇక్కడి వచ్చా.


కొత్త ప్రాజెక్ట్స్ ఏం చేస్తున్నారు?

మెగాస్టార్ చిరంజీవిగారి ‘గాడ్ ఫాదర్’, రామ్ చరణ్ -శంకర్‪గారి సినిమా చేస్తున్నా.  మరో 13  చిన్న, మీడియం సినిమాలు కూడా వున్నాయి. అందరికీ అందుబాటులో వుండాలని నిర్ణయించుకున్నా. ఒక నాలుగు పెద్ద సినిమాలు చేస్తే మరో పది చిన్న సినిమాలు చేయాలని భావిస్తున్నాను.

Updated Date - 2022-05-15T03:05:58+05:30 IST