50 ఏళ్ల క్రితం నాటి కేసులో తీర్పు.. మైనర్‌గా ఉన్నప్పుడు లైంగికంగా వేధించాడంటూ US Comedianపై..

దాదాపు ఐదు దశాబ్దాల క్రితం ప్లేబాయ్ మాన్షన్‌లో యూఎస్ కమెడియన్ బిల్ కాస్బీ (Bill Cosby) ఓ మైనర్ బాలిక జూడీ హుత్‌‌పై లైంగిక వేధింపులకు పాల్పడ్డాడు. కొన్ని సంవత్సరాల తర్వాత ఆమె కేసు వేసింది. దీంతో ఆ కేసు విచారించిన కాలిఫోర్నియాలోని జ్యూరీ జూన్ 21 (మంగళవారం)న బిల్ కాస్బీ నేరాన్ని నిర్ధారించింది. అంతేకాకుండా జూడీకి 5 లక్షల డాలర్లు నష్టపరిహారం చెల్లించాలని తీర్పు చెప్పింది.

1975లో కాస్బీ వయస్సు 36 కాగా.. జూడీకి కేవలం 16 ఏళ్లు మాత్రమే. ఆ వయసులో ఉన్న జూడీ హుత్‌‌ను కాస్బీ లైంగికంగా వేధించాడు. ఓ మూవీ సెట్‌లో జరిగిన ఈ ఘటనలో జూడీతో పాటు ఆమె 17 ఏళ్ల స్నేహితురాలు డొన్నా శామ్యూల్ సన్ సైతం బాధితురాలైంది. ప్రస్తుతం 84 ఏళ్ల వయస్సులో ఉన్న కాస్బీపై పలువురు మహిళలు లైంగిక ఆరోపణలు చేస్తూ కేసులు వేశారు. ఈ తరుణంలో ఈ కేసులో అతనికి వ్యతిరేకంగా తీర్పు వచ్చింది. అయితే.. కాస్బీ 2018లోనే ఒక క్రిమినల్ కేసులో జైలు పాలయ్యాడు. కానీ.. పలు కారణాల వల్ల నేరాన్ని రద్దు చేయడంతో గత సంవత్సరం విడుదలయ్యాడు.